ރާއްޖެ އައި ސްރީ ލަންކާ މީހަކު ރާއްޖެ އެތެރެވާން ހުއްދަ ނުދިނީ އޭނާއަކީ މީގެކުރިން އިމިގްރޭޝަނުން ޑީޕޯޓްކޮށްފައިވާ މީހަކަށް ވާތީ ކަމަށް އެ އިދާރާއިން ބުނެފި އެވެ.
އެތެރެވިޔަ ނުދީ ފޮނުވާލީ ދިވެއްސަކާ ކުރިން ކައިވެނިކޮށްގެން އުޅުނު ނަދީޝް ޕެރޭރާ ކިޔާ މީހެކެވެ.
އޭނާ ރާއްޖެ އެތެރެވުމުގެ ފުރުސަތު ނުދިނުމުން އޭނާގެ ވަކީލުންނާއި އާންމު ބައެއް މީހުން ވެސް ސޯޝަލް މީޑއާގައި އަންނަނީ ކަންބޮޑުވުން ފާޅުކުރަމުންނެވެ.
އިމިގްރޭޝަންގެ މީޑިއާ އޮފިޝަލަކު "މިހާރު" އަށް ވިދާޅުވީ އެ މީހާ އަކީ އިމިގްރޭޝަންގެ ގާނޫނުގެ އަށް ވަނަ މާއްދާގެ ދަށުން ރާއްޖެ އެތެރެވުމުގެ ހުއްދަ ނެތް މީހެއް ކަމަށެވެ.
އެހެންވެ އިމިގްރޭޝަންގެ ގާނޫނުގެ 20 ވަނަ މާއްދާ އަށް ރިއާޔަތްކޮށް އެ ގާނޫނުގެ 33 ވަނަ މާއްދާގެ ދަށުން މި މަހުގެ ހަތަރު ވަނަ ދުވަހުން ފެށިގެން ވަކިމުއްދަތަކަށް ރާއްޖެ ނާދެވޭގޮތަށް ފޮނުވާލާފައިވާ މީހެއް ކަމަށް ވެސް އެ އޮފިޝަލް ވިދާޅުވި އެވެ.
އެ މާއްދާގައި ވަނީ ގާނޫނައި ގަވާއިދާ ޚިލާފުވެގެން ބިދޭސީންނަށް އަދަބު ކަނޑައެޅުމެވެ.
އެ މައްސަލާގައި ކޮންޓްރޯލަ ޖެނެރަލް އޮފް އިމިގްރޭޝަން މުހައްމަދު ޝަމްއާން ވިދާޅުވީ ރާއްޖެ އިން ފުރައިގެން ދާން ބޭނުންވާ މީހުންނާއި، ރާއްޖެއަށް އެތެރެވާ މީހުންނާއި އަދި ރާއްޖެ އެތެރެވެ ރާއްޖޭގައި ތިބި ބިދޭސީންގެ މައްޗަށް ވެސް އިމިގްރޭޝަން ގާނޫނު ހިންގުމުގައި ފަސްޖެހިވަޑައިނުގަންނަވާނެ ކަމަށެވެ.
