އިމިގްރޭޝަންގެ ކޮންޓްރޯލަރުގެ މަގާމުން ވަކިކުރި މުހައްމަދު ޝަމްއާން ވަހީދު 25 އަހަރަށް ޖަލަށްލާން ކްރިމިނަލް ކޯޓުން ކުރި ހުކުމް އިސްތިއުނާފު ކުރަން ހައި ކޯޓަށް ހުށަހަޅައިފި އެވެ.
ދައުލަތާ ދެކޮޅަށް ޝަމްއާންގެ ފަރާތުން އެ މައްސަލަ ހައި ކޯޓަށް ހުށަހަޅާފައިވާއިރު، މިހާތަނަށް މައްސަލަ ބަލައިގަތުމާ މެދު ގޮތެއް ނިންމާފައެއްނުވެ އެވެ.
އިމިގްރޭޝަންގެ ބެލުމުގެ ދަށަށް ގެންދިޔަ ބިދޭސީއަކު ދޫކޮށްލުމަށްފަހު އޭނާގެ އަތުން 500،000ރ. އަތުލައިގެން އިމިގްރޭޝަންގެ މުވައްޒަފުންތަކެއް ޝަމްއާންގެ ގެއަށް ގެންދިޔަ ކަމަށް ބުނެ ޝަމްއާންގެ މައްޗަށް ތިން ދައުވާއެއް ދައުލަތުން ކުރި އެވެ.
އެ މައްސަލާގައި ކޯޓުން ހުކުމްކުރީ ޝަމްއާންގެ މައްޗަށް ކުރި ފޭރުމުގައި ބައިވެރިވުމުގެ ދައުވާ އާއި ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާ އަދި މަނީލޯންޑްރިންގެ ދައުވާ ސާބިތުވާތީ 25 އަހަރަށް ޖަލަށްލުމަށެވެ.
އެއީ މަނީ ލޯންޑްރިންގެ ކުށުގައި 15 އަހަރުގެ ޖަލު ހުކުމަކާއި ފޭރުމުގައި ބައިވެރިވި ކަމުގެ ދައުވާގެ އަދަބެއްގެ ގޮތުން އަށް އަހަރުގެ ޖަލު ހުކުމަކާއި ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ އަދަބެއްގެ ގޮތުން ދެ އަހަރުގެ ޖަލު ހުކުމެކެވެ.
އެ މައްސަލައިގެ ތަހުގީގާއި ޝަރީއަތުގެ މަރުހަލާގައި ޝަމްއާން ވަނީ ނުވަ މަހާއި 10 ދުވަސް ޖަލުގައި ހޭދަކޮށްފަ އެވެ. އެހެންވެ، އެ ބައި އަދަބުން އުނިކުރަން ހުކުމުގައި އަންގާފައިވެ އެވެ.
ޖަލަށްލުމުގެ އިތުރުން ޝަމްއާން ފަސްލައްކަ ރުފިޔާއިން ޖޫރިމަނާ ކުރުމަށާއި އަދި ބިދޭސީ މީހާގެ އަތުން ފޭރިގަތް ފަސްލައްކަ ރުފިޔާ ތިން މަސް ތެރޭގައި އެމީހާއަށް އަނބުރާ ދެއްކުމަށް ވެސް ހުކުމްގައި އަންގާފައިވެ އެވެ.
މީގެ އިތުރުން ޝަމްއާންގެ ގެއިން ފެނުނު ދެ ލައްކަ ރުފިޔާ އާއި 10،000 ޑޮލަރު (154،000ރ.) ތެރެއިން 125،000ރ. އަށްވާ ދިވެހި ފައިސާ ދައުލަތަށް ނެގުމަށް ހުކުމުގައިވެ ވެސް އަންގާފައިވެ އެވެ.