ފަލަސްތީނުގެ މީހަކު ހިމެނޭ ގޮތަށް މިދިޔަ އަހަރު 11 ބިދޭސީއަކަށް ދިވެހި ރައްޔިތުކަން ދީފައިވާ ކަމަށް ފޮރިން މިނިސްޓްރީން ބުނެފި އެވެ.
ރައްޔިތުންގެ މަޖިލީހުގެ ހާރިޖީ ގުޅުންތަކާ ކޮމިޓީގައި ވާހަކަ ދައްކަވަމުން އެ މިނިސްޓްރީގެ ޑިރެކްޓާ ޖެނަރަލް އިސްމާއިލް މަމްދޫހު ވިދާޅުވީ މިދިޔަ އަހަރު ދިވެހި ރައްޔިތުކަން ހޯދަން 16 މީހަކު ކުރިމަތިލިއިރު، 11 މީހަކަށް ސިޓިޒަންޝިޕް ދީފައިވާ ކަމަށެވެ.
އެއީ އެރިޓްރިއާގެ މީހަކާއި ފަލަސްތީންގެ މީހަކާއި އިންޑިއާގެ ތިން މީހަކާއި ސްރީލަންކާގެ ފަސް މީހަކަށް ކަމަށް އޭނާ ވިދާޅުވި އެވެ.
އެ ބައްދަލުވުމުގައި ފޮރިން މިނިސްޓްރީން ބުނިގޮތުގައި 1969 ވަނަ އަހަރު ރާއްޖޭގެ ސިޓިޒެންޝިޕް ގާނޫނަށް އަމަލުކުރަން ފެށި ފަހުން މިހާތަނަށް ރައްޔިތުކަން ދިނީ 33 މީހަކަށެވެ.
އެ ބައްދަލުވުމުގައި މަމްދޫހު ވިދާޅުވީ ސިޓިޒެންޝިޕްގެ ގާނޫނަކީ ދުވަސްވީ ގާނޫނަކަށްވުމުން އެހާ ގިނަ ތަފްސީލްތަކެއް އެ ގާނޫނުގައި ބަޔާން ކޮށްފައި ނުވާ ކަމަށެވެ. ނަމަވެސް އެ ގާނޫނުގެ ދަށުން ބިދޭސީންނަށް ދިވެހި ރައްޔިތުކަން ދިނުމުގައި އެ މީހަކު ސުންނީ މުސްލިމެއްތޯ އާއި ގާނޫނުއަސާސީ އާއި ގާނޫނުތައް އެނގޭ މިންވަރާއި އަސާސީ ތައުލީމްގެ ފެންވަރާއި ދިވެހި ބަހުން ލިޔެކިޔުމުގެ ފެންވަރު ބަލާފައިވާ ކަމަށް މަމްދޫހް ވިދާޅުވި އެވެ.
މީގެ އިތުރުން ނުކެނޑި ރާއްޖޭގައި 10 އަހަރު އުޅެފައިވާ މީހަކަށް ވާން ޖެހޭ ކަމަށް އޭނާ ވިދާޅުވި އެވެ. ސިޓިޒެންޝިޕްގެ ގާނޫނުގެ ދަށުން ރައްޔިތުކަން ދިނުމުގެ ބާރު އޮންނަނީ ރައީސަށެވެ.
