ވެލަޔަށް ފަރުވާދޭ ސެންޓަރެއް ސޮނެވާ ޖާނީގައި ހުޅުވައިފި

ނ. އަތޮޅުގައި އޮންނަ ސޮނެވާ ޖާނީ ރިސޯޓުގައި ވެލަޔަށް ފަރުވާދޭ ސެންޓަރެއް އިއްޔެ ހުޅުވައިފި އެވެ.

ސޮވެނާއިން ނެރުނު ނޫސްބަޔާނެއްގައި ބުނީ "ނޫނު އެޓޯލް ސީ ޓާޓަލް ރިހެބިލިޓޭޝަން ސެންޓަރު" އަކީ ވެލާކަހަނބުގެ ހިމާޔަތުގައި މަސައްކަތްކުރާ އަމިއްލަ ޖަމިއްޔާއެއް ކަމަށްވާ އޮލިވް ރިޑްލީ ޕްރޮޖެކްޓް (އޯއާރުޕީ) އާ ގުޅިގެން އެ ރިސޯޓުގައި ހުޅުވި ތަނެއް ކަމަށެވެ.

އޯއާރުޕީން މިހާރު ވެސް ވެލާކަހަނބު ސަލާމަތްކުރުމަށާއި ފަރުވާދިނުމަށް ރާއްޖޭގައި ދެ ސެންޓަރެއް ހިންގަ އެވެ. ސޮނެވާ ޖާނީގައި ހުޅުވި މި ސެންޓަރަކީ މިހާތަނަށް އެ ޖަމިއްޔާއިން ހުޅުވި އެންމެ ބޮޑު ސެންޓަރެވެ.

މި ސެންޓަރަކީ ހާއްސަ ފަރުވާ ބޭނުން ނުވި ނަމަވެސް، އަލުން ކަނޑަށް ދޫކޮށްލުމަށް ތައްޔާރުވާ ވެލާތަކަށް ހާއްސަކޮށްފައިވާ ތަނެއް ކަމަށް ސޮނެވާއިން ބުންޏެވެ.

ފުރަތަމަ ވެލަޔަށް ފަރުވާ ދެނީ

ސޮނެވާއިން ބުނީ މި ސެންޓަރު ރަސްމީކޮށް ހުޅުވުމުގެ ކުރިން އެތަނުން ފަރުވާދިނުމަށް ފުރަތަމަ ވެލާ ގެންދިޔައީ މިދިޔަ މަހު 14 ގައި ކަމަށެވެ. އެއީ "ނަކަތް" ކިޔާ އަންހެން ވެލައެއް ކަމަށާއި އެއީ ޅ. އަތޮޅުގެ ކަނޑުމަތިން ދަލެއްގައި އޮޅިފައި އޮއްވާ ފެނުނު ވެލައެއް ކަމަށް ވެސް ސޮނެވާއިން ބުންޏެވެ.

ދަލުގައި އޮޅިފައި އޮތުމުގެ ސަބަބުން އޭގެ ކަރާއި ތުނބާއި ވާތު ފިޔަގަނޑަށް ވަނީ އަނިޔާވެފަ އެވެ. އެހެންވެ، އެ ވަލަޔަށް އަމިއްލައަށް ހަރަކާތްތެރިވެ ނޫޅެވެ އެވެ.

"ސަލާމަތްކުރެވުނު ފަހުން، 'ނަކަތަށް' ވަނީ ފުރިހަމަ ބޭސްފަރުވާ ދެވިފައި. އަދި އޭނާގެ ހާލަތު ރަނގަޅުވަމުން އަންނަކަން ފާހަގަކުރެވޭ،" ސޮނެވާއިން ބުންޏެވެ.

ނަމަވެސް، އެ ވެލަޔަށް އަދިވެސް ފެނުގައި އަޑިއަށް ދިއުމަށް ދަތިވެ އެވެ. އެހެންވެ، ސޮނެވާ ޖާނީގައި ހުންނަ ފަރުވާދޭ ސެންޓަރުގައި އަންނަނީ އެއަށް ފީނުމުގެ ހާއްސަ ތަމްރީނުތައް ދެމުންނެވެ. ޓާގެޓެޑް އެކްސްޓާނަލް ވެއިޓް ތެރަޕީ (ޓީއީޑަބްލިއުޓީ) އާއި ފެނުގެ އަޑީގައި ކާންދިނުމުގެ ސެޝަންތައް ވެސް ކުރިއަށް ގެންދެ އެވެ. އެއީ، އަމިއްލައަށް ފީނުމާއި ކެއުމުގެ އާދަތައް އެ ވެލަޔަށް އަލުން ދަސްކޮށްދިނުމަށެވެ.

ދުނިޔޭގެ ކަނޑުގައި ހުރި ޕްލާސްޓިކް ކުނީގެ 10 ޕަސެންޓަކީ މަސްވެރިކަމަށް ބޭނުންކުރާ ދާ ކަމަށް ކުރިން ކޮށްފައިވާ ދިރާސާތަކުން ދައްކަ އެވެ.

އޯއާރުޕީ އުފެއްދުމުގެ ފަހަތުގައި ވެސް އޮތީ މި މައްސަލަ އެވެ. އިނގިރޭސިވިލާތުގެ ޕްރޮފެސަރު ޑރ. މާޓިން ސްޓެލްފޮކްސް މި ޖަމިއްޔާ އުފެއްދެވީ މެރިން ބަޔޮލޮޖިސްޓެއްގެ ގޮތުގައި އޭނާ ރާއްޖޭގައި މަސައްކަތްކުރެއްވި ދުވަސްވަރު، ރާއްޖޭގެ ކަނޑުމަތިން ދަލުގައި އޮޅިފައި އޮންނަ ވެލާތައް ފެންނަ ވަރު ގިނަވުމުންނެެވެ. ވެލާކަހަނބުގެ ހިމާޔަތްކޮށް، އެއަށް ބޭނުންވާ ފަރުވާ ފަހިކޮށްދިނުމަށް އޯއާރުޕީ އުފެއްދީ 2013 ވަނަ އަހަރު އެވެ.

އެ ޖަމިއްޔާއިން ވެލަޔަށް ހާއްސަ ރެސްކިއު ސެންޓަރެއް އެންމެ ފުރަތަމަ ހުޅުވީ 2017 ވަނަ އަހަރު، ބ. އަތޮޅުގައި އޮންނަ ކޮކޯ ޕާމް ދުނިކޮޅު ރިސޯޓުގަ އެވެ. އަދި ވެލަޔަށް ފަރުވާދިނުމަށާއި ރެސްކިއުއަށް ހާއްސަ ސެންޓަރެއް މާލެ އަތޮޅުގައި އޮންނަ ވަން އެންޑް އޮންލީ ރީތި ރަށް ރިސޯޓުގައި މިދިޔަ އަހަރު ވަނީ ހުޅުވައިފަ އެވެ.

އޯއާރުޕީން މިހާތަނަށް ވަނީ 141 ވެލަޔަށް ފަރުވާދީ، އޭގެ ވެއްޓަށް އަލުން ދޫކޮށްލައިފަ އެވެ.

ސެންޓަރުގެ މަސައްކަތްތައް

ސޮނެވާއިން ބުނި ގޮތުގައި، ސޮނެވާ ޖާނީގައި ހުޅުވި ސެންޓަރު މެނޭޖުކުރައްވާނީ ސްޕެއިންގެ ސީ ޓާޓަލް ބަޔޮލޮޖިސްޓް ނެއުސް ސެގްރާއާ އެކު ރާއްޖޭގެ އިންޓާން ނަވްހާ އިބްރާހިމެވެ. އެ ދެ ބޭފުޅުން މި ސެންޓަރު ހިންގަވާނީ އޯއާރްޕީގެ ވެޓެރިނަރީ ޓީމުގެ ސީދާ ބެލެހެއްޓުމުގެ ދަށުންނެވެ. އެ ބޭފުޅުންގެ މަސައްކަތްތަކަކީ؛

• ކަނޑަށް ދޫވެފައިވާ ދާތައް ނެގުން.

• އަނިޔާވެފައިވާ ވެލާތައް ސަލާމަތްކޮށް ފަރުވާދިނުން.

• ވެލާ ބިސްއަޅައި ހަރަކާތްތެރިވާ ގޮތް މޮނިޓާކުރުން.

• ނ. އަތޮޅުގައި އުޅޭ ވެލާތަކުގެ ޑޭޓާބޭސްއެއް އެކުލަވާލުމަށް ފޮޓޯ-އައިޑީތައް އެއްކުރުން.

އެ ރިސޯޓަށް ޒިޔާރަތްކުރާ މެހުމާނުންނަށް މި ސެންޓަރަށް ޒިޔާރަތްކޮށް، އެތަނުގެ މަސައްކަތްތައް ބަލާލުމުގެ ފުރުސަތު ދޭނެ ކަމަށް ވެސް ސޮނެވާއިން ބުންޏެވެ.