ހުޅުމާލޭގައި މިދިޔަ އަހަރު ހުޅުވި ކޭއެފްސީ އާއި ޕިއްޒާ ހަޓް ބަންދުކޮށްފި އެވެ.
އެނގިފައިވާ ގޮތުގައި އެ ދެތަން ބަންދުކުރީ ވިޔަފާރި ވަރަށް ބޮޑަށް ދަށްވުމާ ގުޅިގެންނެވެ. ނަމަވެސް އެކަމާ ގުޅޭ ގޮތުން ކޭއެފްސީ އާއި ޕިއްޒާ ހަޓް ރެސްޓޯރެންޓަށް ގުޅުމުން ވަކި ސަބަބެއް ނުބުންޏެވެ.
ހުޅުމާލޭ ފެރީ ޓާމިނަލް ކައިރީ ހުންނަ ރަށު މާރުކޭޓްގެ މަތީގައި ކޭއެފްސީ އާއި ޕިއްޒާ ހަޓް އައުޓްލެޓް ހުޅުވީ މިދިޔަ އަހަރުގެ އޭޕްރީލް މަހު އެވެ.
ފަލަސްތީނުގެ ޣައްޒާގައި އިޒްރޭލުން ދެމުން ގެންދާ ހަމަލާތަކާ ދެކޮޅުހަދައި، އިޒްރޭލާ ގުޅުން އޮންނަ ވިޔަފާރިތައް ބޮއިކޮޓްކުރުމަށް މުޅި ދުނިޔޭގައި ފެށި ކެމްޕެއިނުގައި ކޭއެފްސީ އާއި ޕިއްޒާ ހަޓް ވެސް ބޮއިކޮޓްކުރަން ފެށި އެވެ. އެކަމަކު ކޭއެފްސީން ވަނީ އެ ކުންފުނިން އިޒްރޭލަށް ތާއީދު ނުކުރާ ކަމަށާއި އެއީ ސިޔާސީ ކަމަކާ ގުޅުމެއް ނެތް ވިޔަފާރިއެއް ކަމަށް ބުނެފަ އެވެ.
ރާއްޖޭގައި ވެސް މި ކެމްޕެއިން ކުރިއަށް ގެންގޮސް އެ ތަންތަނުގެ ކުރިމަތީގައި މުޒާހަރާ ވެސް ކުރި އެވެ. އަދި މާލޭގައި ހުންނަ މި ތަންތަނުގެ އައުޓްލެޓްގެ ބިއްލޫރިގަނޑު ތަޅާލައި ގެއްލުން ވެސް ދީފައިވެ އެވެ. އެކަމަކު މާލޭގެ ދެ އައުޓްލެޓް މިހާރު ވެސް ހިންގަ އެވެ.
މުސްލިމުންގެ އާބާދީ ބޮޑު އިންޑޮނީޝިއާ އާއި މެލޭޝިއާގައި ވެސް މި ބޮއިކޮޓް ކެމްޕެއިނާ އެކު ކޭއެފްސީގެ ވިޔަފާރިތަކަށް ވަރަށް ބޮޑަށް ގެއްލުންވި އެވެ. މީޑިއާ ރިޕޯޓްތައް ބުނާ ގޮތުގައި މި އަހަރުގެ ފުރަތަމަ ކުއާޓާގައި ކޭއެފްސީ އަށް އިންޑޮނީޝިއާގައި ވަނީ 35 މިލިއަން ޑޮލަރުގެ ގެއްލުން ވެފަ އެވެ. އެ ގައުމުގައި މިދިޔަ އަހަރުން ފެށިގެން މިހާތަނަށް ކޭއެފްސީގެ 47 އައުޓްލެޓެއް ބަންދުކޮށްފައިވާ ކަމަށްވެ އެވެ.
މެލޭޝިއާގައި ވެސް މި އަހަރު ވަނީ ކޭއެފްސީގެ ވިޔަފާރި ދަށްވެ އައުޓްލެޓްތައް ވަގުތީ ގޮތުން ބަންދު ވެސް ކޮށްފަ އެވެ.
ދުނިޔޭގެ މަޝްހޫރު ފްރެންޗައިސް ރެސްޓޯރެންޓް، ކޭއެފްސީ އާއި ޕިއްޒާ ހަޓް ރާއްޖޭގައި އެންމެ ފުރަތަމަ ހުޅުވީ 2018 ވަނަ އަހަރު އެވެ. މާލޭގައި ކޭއެފްސީ ހިންގާނީ ޕިއްޒާ ހަޓް ވެސް ހިންގާ ރާއްޖޭގެ އައިލެންޑް ފުޑާއި އިންޑިއާގެ ގަމާ ޕިއްޒާ ކްރާފްޓް އޯވާސީސް ގުޅިގެން އުފައްދާފައިވާ ޖޮއިންޓް ވެންޗާ ކުންފުނި ގެމަ އައިލެންޑް ފުޑް އިންނެވެ.