ނ. މިލަދޫ ފެނަކަ ބްރާންޗުގައި މަސައްކަތްކުރާ ތިން މުވައްޒަފަކު 14 ދުވަހުގެ މުއްދަތަށް ސަސްޕެންޑުކޮށްފި އެވެ.
އެ ފިޔަވަޅު އެޅީ މިދިޔަ ހޮނިހިރު ދުވަހު ބޭއްވި މިލަދޫގެ އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ ބައި އިލެކްޝަނުގައި ވެރިކަންކުރާ ޕީއެންސީގެ މައްޗަށް އިދިކޮޅު އެމްޑީޕީގެ ކެންޑިޑޭޓު އެ ރަށުން ކުރި ހޯދާފައި ވަނިކޮށެވެ.
އެހެންވެ، އެ މައްސަލާގައި އެމްޑީޕީން ރޭ ނެރުނު ބަޔާނެއްގައި ބުނީ، ޕީއެންސީގެ ކެންޑިޑޭޓުގެ މައްޗަށް އެމްޑީޕީގެ ކެންޑިޑޭޓު އާމިނަތު އަޒުމާ ކުރި ހޯދުމާ ގުޅިގެން، މިލަދޫ ފެނަކަ ބްރާންޗުގައި މަސައްކަތްކުރާ އެމްޑީޕީގެ މެމްބަރުންނާ ދެކޮޅަށް ފިޔަވަޅު އެޅުން ކުށްވެރިކުރާ ކަމަށެވެ.
އެމްޑީޕީން ބުނި ގޮތުގައި އެތަނުގައި މަސައްކަތްކުރާ ބައެއް މުވައްޒަފުންނަށް ފެނަކައިން އަންގާފައި ވަނީ ތަހުގީގެއް ފަށާފައިވާތީ 14 ދުވަހަށް ސަސްޕެންޑްކުރާ ކަމަށެވެ. އެ މީހުން ސަސްޕެންޑްކުރީ އެއްވެސް ސަބަބެއް ބަޔާން ކުރުމެއް ނެތި އެއްވެސް އަސާސެއްގެ މައްޗަށް ބިނާކުރުމެއް ނެތި ކަމަށް އެމްޑީޕީން ބުންޏެވެ.
އެ މުވައްޒަފުންނަށް ފެނަކައިން ފޮނުވި ސިޓީގައި ވަނީ، އެ މީހުންނާ ގުޅުން ހުރި މައްސަލައެއް ތަހުގީގު ކުރަމުން ދާތީ، އެ ތަހުގީގައި އިތުރަށް ބަލަން ޖެހޭ ކަންކަން ހުރުމުން މިއަދުން ފެށިގެން 14 ދުވަހަށް ސަސްޕެންޑު ކޮށްފައިވާ ކަމަށެވެ. އެ މީހުން ސަސްޕެންޑުކުރީ މުސާރަ ލިބޭ ގޮތަށެވެ. އަދި ބަލަމުންދާ މައްސަލައާ ގުޅިގެން ކުންފުނިން މައުލޫމާތެއް ހޯދަން އެދިއްޖެ ނަމަ އެއްބާރުލުން ދިނުމަށް ވެސް ފެނަކައިގެ ސިޓީގައި އެދިފައި ވެ އެވެ.
އެކަމަކު، އެއީ ކޮން މައްސަލަތަކެއް ކަމެއް އަދި ހާމައެއް ނުކުރެ އެވެ.
އެކަމާ ކަންބޮޑުވުން ފާޅުކޮށް، އެމްޑީޕީން ނެރުނު ބަޔާނުގައި ބުނީ ސަރުކާރަށް ތާއީދު ނުކުރުމަކީ އެ މީހަކު އަދާކުރަމުންދާ ވަޒީފާއިން އެކަހެރިކޮށް، ސަސްޕެންޑު ކުރަން އޮތް ހުއްޖަތެއް ނޫން ކަމަށެވެ. ގާނޫނުއަސާސީގައި އިންތިހާބުތަކުގައި ވާދަކުރުމާއި ވޯޓުލުމުގެ ހައްގު އޮންނައިރު، އެ ހައްގުގެ ބޭނުންކުރާ މީހުންނަށް އެ މީހުންގެ ސިޔާސީ ފިކުރަށް ބަލައި ފިޔަަވަޅު އެޅުމަކީ ފިނޑި އަމަލެއްގެ ގޮތުގައި އެމްޑީޕީން ސިފަ ކުރި އެވެ.
އެމްޑީޕީން މިލަދޫ ދާއިރާގެ ބައި އިލެކްޝަން ކާމިޔާބުކުރީ ސަރުކާރުން އެ އިންތިހާބަށް ނުފޫޒު ފޯރުވަމުން ދަނިކޮށް ވަރަށް ބޮޑު އަޣުލަބިއްޔަތަކުން ކަމަށް ބުންޏެވެ.
އެމްޑީޕީން ވަނީ ވަޒީފާގެ ބިރު ދެއްކުމާއި އިދިކޮޅު ހިޔާލުތަކުގެ އަޑު ކަނޑުވާލުމަށް ދައުލަތުގެ އިދާރާތަކާއި ކުންފުނިތަކުން މަސައްކަތް ކުރާ ކަމަށް ތުހުމަތުކޮށް، އެކަން ހުއްޓާލުމަށް ވެސް ގޮވާލައިފަ އެވެ.