އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު: އެއްވެސް މީހެއްގެ ޒާތީ މައުލޫމާތެއް ހާމަނުކުރެވުނު ނަމަ މާފަށް އެދިވަޑައިގަންނަވާ ކަމަށް ވިދާޅުވި.-- ފޮޓޯ: އިސްލާމިކް މިނިސްޓްރީ
25 ނޮވެމްބަރ 2025 - 14:18
މީހެއްގެ ބޭންކް އެކައުންޓުގެ ތަފުސީލް އާންމުކުރެއްވި މައްސަލާގައި އަސްލު ނިޔަތަކީ އެކަމާ ގުޅޭ ހަގީގަތް ހާމަކުރެއްވުން ކަމަށާއި އެކަން ކުރުމުގައި މީހާގެ ޒާތީ މައުލޫމާތެއް ހާމަކުރެއްވުނު ކަމަށްވާ ނަމަ އެކަމަށް މާފަށް އެދިވަޑައިގަންނަވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.
ޝަހީމް އެކްސްގައި ކުރެއްވި ޕޯސްޓެއްގައި ވިދާޅުވީ އެއްވެސް މީހެއްގެ ޒާތީ މައުލޫމާތު ހާމަކުރުމަކީ އޭނާގެ މަގުސަދެއް ނޫން ކަމަށާއި މަގުސަދަކަށް ވީ ޒަކާތުގެ ކަމަކާ ގުޅިގެން އެ މީހާ ހާމަކުރި މައުލޫމާތަކީ ހަގީގަތް އޮޅޭ ގޮތަށް ހާމަކުރި މައުލޫމާތަކަށް ވާތީވެ، އެކަމުގެ ހަގީގަތް ބަޔާންކޮށްދެއްވުން ކަމަށެވެ.
އޭގެ މަގުސަދަކީ ރާއްޖޭގެ އެތައް ހާސް ރައްޔިތުން ޒަކާތު ފަންޑާ ހަވާލުކުރާ އެތައް މިލިއަން ރުފިޔާގެ އަމާނާތް އެތަނުން އަދާކުރަމުން އަންނަނީ އަދުލުވެރިކަމާއި އިންސާފުންވެރިކަމާއި އިސްލާމީ ޝަރީއަތުގައިވާ ގޮތުގެ މަތިންކަން ކަށަވަރުކޮށްދިނުން ކަމަށް ވެސް ޝަހީމް ވިދާޅުވި އެވެ.
ޝަހީމް ވިދާޅުވި ގޮތުގައި، އޭނާގެ މަގުސަދަކަށް ވީ ފަގީރުންގެ ދަފުތަރުގައި ހިމަނަނީ އެކަމަށް ޝަރުއީ ގޮތުން ޝަރުތު ފުރިހަމަވާ ހައްގު މީހުންކަން ބަޔާންކޮށްދިނުމާއި ރާއްޖޭގައި ޒަކާތުގެ ނިޒާމު ހިންގަން ތިބި މުވައްޒަފުން ކަންކަން ކުރަނީ ތެދުވެރިކަމާ އެކު ކަން ހާމަކުރެއްވުމެވެ. އަދި މީހަކު ހުށަހަޅާ ލިޔެކިޔުންތަކަށް ބަލައި، ކަނޑައަޅާފައިވާ އުސޫލުތަކުން ފަގީރުންގެ ދަފްތަރުގެ މިންގަނޑަށް ނުފެތޭ ނަމަ ނުހިމަނާ ސަބަބު ސާފުކޮށްދެއްވުމެވެ.
"އަޅުގަނޑު އެބޭފުޅާގެ އިންސާނީ ޝުއޫރަށް ނުހަނު މަތީ ދަރަޖައަށް އިހުތިރާމްކުރަން،" ޝަހީމް ވިދާޅުވި އެވެ.
"އަޅުގަނޑު އެކަމާ ގުޅިގެން ދެންނެވި ވާހަކައިން މި ނޫން މާނައެއް ނެގުނު ނަމަ، ނުވަތަ އެ ފަރާތުގެ ޒާތީ މައުލޫމާތު ހާމަކުރެވުނު ކަމަށް ވާ ނަމަ، އެކަމަށް ނިހާޔަތަށް މާފަށް އެދެން. ދިވެހިރާއްޖޭގެ ޒަކާތު ފަންޑުން އެއްވެސް ދިވެހި ރައްޔިތަކަށް ދެރަކޮށް ކަންކަން ނުކުރާނެ."
ބަލި ކުއްޖަކު ހިމެނޭހެން ފަސް ކުދިން ބަލަމުން އަންނަ އެކަނިވެރި މަޔަކަށް ޒަކާތުން ހައްގު ނުވާ ކަމަށް ނިންމީ އެކައުންޓުގައި ފައިސާ ދައުރުވާތީ ކަމަށް އިސްލާމިކް މިނިސްޓްރީން ބުނި ކަމަށް ތުހުމަތުކޮށް އަންހެނަކު ދެއްކި ވާހަކައަކަށް ޝަހީމް ރައްދު ދެެއްވައި، އެ މީހާގެ ބޭންކް އެކައުންޓްގައި ހުރި ފައިސާގެ އަދަދު ސޯޝަލް މީޑިއާގައި އިއްޔެ އާންމުކުރެއްވި އެވެ.
ޒަކާތު ފަންޑުން އެހީނުވި ކަމުގެ ޝަކުވާ އައިޝާ ނަމަކަށް ކިޔާ އަންހެނަކު އުފުލީ ވިލިމާލޭ ރައްޔިތުންނާ އެކު ރައީސް ޑރ. މުހައްމަދު މުއިއްޒު މިދިޔަ އާދިއްތަ ދުވަހުގެ ރޭ ބޭއްވެވި ބައްދަލުވުމުގަ އެވެ. އެ ބައްދަލުވުމުގައި ޝަހީމް ވެސް ބައިވެރިވެޑައިގެންނެވި އެވެ.
އެ ބައްދަލުވުމުގައި ހިޔާލުފާޅުކުރަން ދިން ފުރުސަތުގައި އައިޝާ ބުނީ ވަރަށް ހާލުގައި ފަސް ދަރިން ބަލަމުން އަންނައިރު، އޭނާއަށް ވަޒީފާއެއް ލިބުނުތާ އަދި ވީ ހަ މަސްދުވަސް ކަމަށެވެ. އެ އާއިލާގެ ނިކަމެތި ހާލަތު ހުރިގޮތް ކަމަށް ބުނާ ގިނަ ތަފްސީލުތަކެއް އޭނާ ހާމަކުރި އެވެ.
އޭނާގެ ވާހަކަތައް ހިމެނޭ ވީޑިއޯއަކާ އެކު ފޭސްބުކްގައި އިއްޔެ ކުރެއްވި ޕޯސްޓެއްގައި ޝަހީމް ވިދާޅުވީ އެހީއަކަށް އެދުމުން އޭނާއަށް ޒަކާތު ހައުސް އިން މިދިޔަ ސެޕްޓެމްބަރު މަހު 15،500ރ. ދިން ކަމަށެވެ. އޭނާ ފަގީރުންގެ ލިސްޓަށް ނާރަނީ އެކަނިވެރި މައިންގެ އިނާޔަތް ލިބޭ މީހަަކަށް ވެފައި، ވަޒީފާއިން ލިބޭ މުސާރައާ އެކު މަހަކު 22،000.ރ ގެ އާމްދަނީ އެއް ލިބޭތީ ކަމަށް ޝަހީމް ވިދާޅުވި އެވެ.
"އަދި އޭނާގެ އަތުގައި 75،000 ރުފިޔާ އެބަހުރި ކަމަށް، މި މީހާގެ ވާހަކައާ ގުޅިގެން ބެލި ބެލުމުން، މޯލްޑިވްސް ޒަކާތު ހައުސް އިން ދެއްވި މައުލޫމާތުގެ ކުޑަ މިންވަރެއް މި ދެންނެވީ،" އެ ޕޯސްޓްގައި ޝަހީމް ލިއުއްވާފައިވެ އެވެ.
ނަމަވެސް، އެ މީހާގެ އަމިއްލަ ބޭންކް އެކައުންޓުގައި ހުރި ފައިސާގެ އަދަދު ހޯއްދެވި ގޮތެއް ޝަހީމް ވިދާޅެއް ނުވެ އެވެ.
Copyright © 2025 Mihaaru · Terms and Conditions · Privacy Policy · Code of Ethics · Editorial Policy
ކޮމެންޓްތައް
އަޅެ
27 November 2025
ބޭންކިންގ ގާނޫނާ ވެސް ހިލާފު އަމަލެއް މީ. ގާނޫނީ އަދަބު ދޭންޖެހޭ އަމަލެއް މީ. ކޮބާތަ ޔެމް ޔެމް ޔޭ.
މިއޮތީ
26 November 2025
މިއީ މިސަރުކާރުގެ އިސްލާމިކް މިނިސްޓަރުގެ ފެންވަރު....ދެން މުޅި ސަރުކާރުގެ ހާލަކީ ކޮބާ؟؟ މި ނިންމުނީ ރަނގަޅު ނިންމުމެއްތޯ މިހާރު ވިސްނާލަންޖެހޭހެން ހީވޭ!!
raajje
26 November 2025
ކަންވީގޮތްސާފުބަހުންބުނެ މައާފަށްއެދުނުނަމަ މާފުލިބުނީސް، ކޮންމެމީހަކަށްވެސް މިސްޓޭކުސްހެދޭނެ! ޝަހީމުގެރާގުތިހުރީ "ތިމަންނަމިސްޓޭކެއް ނަހަދަމޭބުނާމާނަދޭހަވާގޮތައް" ފުރަތަމަވެސް އޯވަރރިއެކުޓުނުކޮށް އާންމުމީހާ ދެއްކިވާހަކައަކީ ހަގީގަތެއްނޫންކަމާ އަމާނާތްތެރިކަމާއެކު ފަންޑްބަލަހައްޓާނަމަ އެކަންއެގޮތަށްކުރާކަންހާމަކުރީމަވީނުން؟ އަދިވެސް މިކިޔަނީ "ޒާތީމައުލޫމާތެއްހާމަކުރެވުނުނަމަ" ހަގީގީޢިލްމުވެރިން ދަށްކާވާހަކައިގާތެދުވެރިވާނެ ނަމަނަމަ އެކޭނުކިޔާނެ
ފަހުދު.
26 November 2025
މީހެއްގެ ބޭންކް އެކައުންޓުގަ ހުރިފައިސާގެ މައުލޫމާތު ހޯދިގޮތެއް ބޭންކުން ނުވަރަ މިނިސްޓަރު ހާމަކޮށްދީބަލަ. މިހާރު އެއްވެސް ގޮތަކުން ރައްކާތެރިއެއް ނޫން
ނަތީޖާ ހަމަ ރަނގަޅު ދޯ؟؟
26 November 2025
މިއީ މިނިސްޓަރަކަށް ބަހައްޓާވަރުގެ މީހެއްް ނޫން. މިކަމުގައި ޖާސޫސް ކުރުމަކީ ކަނޑައެޅިގެން ބޮޑު ކުށެއް. މިނިސްޓަރަކަށް ލިބިފައިވާ ބާރުގެ ބޭނުން މިއޮތީ ނުހަމަ ގޮތުގައި ބޭނުންކޮށްފައި. އަދި އެންމެންގެ ކުރިމަތީގައި އެމީހާ މިއޮތީ ގަސްތުގައި ބޭޒާރުކޮށްލާފައި
ކަލޭގެސަން
26 November 2025
އަދިވެސް އެ ވާހަކަ ދައްކަނީ އޮޅިގެން ނޭނގި ކަމެއް ވެގެން އުޅޭހެން. މީހެއްގެ މައުލޫމާތު ހޯދިޔަސް އެންމެންނަށް ދައްކަން އެޔެއް ޓުވީޓެއް ނުކުރެވޭނެ.
ކޮސް
26 November 2025
ކޮމެންޓުތައް ކިޔާލުމުން ހަމަ ކޮސް ވެއްޖެ. މި ޤައުމުގައި އަސްލު ކުށްކުރާމީހާ ހީރޯއަކަށް ވާ ގޮތުގެ މިއީ ކުޑަކުޑަ މިސާލެއް. މައްސަލަ ބަލާ މީހުން ވަނީ ކުށްވެރި. މާފަށްވެސް އެދެންވީ އެމީހުން. ޑިމޮކުރެސީ އެހެން ނޫންތޯ?
raajje
26 November 2025
ކޮސް: މައްސަލަބަލާމީހުން ނުވަތަ ތަންތަނުގެ ވެރިންނަށްލާފަތިބޭ ރައްޔިތުންނަށް ހިދުމަތްކުރަންތިބޭމީހުން ކަންކަން ކުރުމުގާ ފޮލޯކުރަންޖެހޭ އުސޫލުތަކަކާ ގަވައިދުތަކެއްހުރެޔޭ! މީހަކު ކުށެއްކުރިޔަސް ދޮގުވާހަކަދެއްކިޔަސް މައްސަލަބަލާށޭ ހަގީގަތްހާމަކުރާށޭކިޔާފަ ބޭނުންހާގޮތަކަށް ކަންކަމެއްނުކުރެވޭނެ، ޒާތީމައުލޫމާތުވެސް ހާމައެއްނުކުރެވޭނެ، މިކަމާކިތަންމެވަރަކަށް ކޮސްވިޔަސް ކުރާނަކަމެއްނެތް ހެހެ
2
25 November 2025
ކިހިނެއްހޭ ޝަހީމު މީހެއްގެ ބޭންކުއެކައުންޓް ބެލެންސްބެލީ. މީ ފުލުހުން ތަހުގީގުކުރަންޖެހޭ މައްސަލައެއް.
ސައިނީސް
26 November 2025
ދަގަނޑު ކެޑޭނީ ދަގަނޑުން
އަލީ ސ
26 November 2025
ފުލުހުން ތަހުގީގު ކުރަން ޖެހޭ 30،000 ޑޮލަރު ގެއްލުން، ސިނގިރޭޓް ކާޓޫން ގެއްލުން. މިހެން ކިޔާނެ ކަމެއް ނެތް. އިތުބާރު އެބައޮތްތަ؟
މިއޮތީ
26 November 2025
ދަގަނޑުން ދަގަނޑު ކަނޑާފަ އެކަން އެންމެންނަށް އެނގޭނެހެން އިއުލާނުކުރަން ޖެހޭނެ ކަމަކަށް ނުދެކެން
ސޯރޫ
25 November 2025
އެމީހާ އޯކޭދޯ މުޅި ދައުލަތާ ޒަކާތު އޮފީހުގައި އުޅޭ އެންމެން ފަލީހަތްވާގޮތަށް ވާހަކަދެއްކިއަސް ކޮބާ އެމީހުންގެ ހައްގު. ސާފު މައުލޫމާތު ހާމަކުރުމަކީ މިނިސްޓަރިގެ ޒިންމާ.
ޢަރުތަ
25 November 2025
ސާފު މައުލާމާތޭ ކިއާފަ، މީހެއްގެ ބޭންކް އެކައުންޓްގެ ތަފްސީލް ހާމަ ކުރުމަކީ ކުށެއް.
ކައްޒާބުދޮންތުއްތު
25 November 2025
ޝަހީމު ކިހިނެއްހޭ މީހެއްގެ އެކައުންޓުގާ ހުރިވަރު ހޯދީ؟ އެތާއުޅޭ ރައްޓެއްސަކަށް ގުޅައިގެންތަ؟
މިނިސްޓްރީއަށް ހުށަހަޅާފައި ހުރި މަޢުލޫމާތުތަކުން......
25 November 2025
ފަޤީރުންގެ ދަފްތަރުގައި ރަޖިސްޓްރީ ވުމަށް އެދޭއިރު ޢާމްދަނީއަށް ލިބޭ ވަރާއި، ބޭންކް އެކައުންޓު ގެ ސްޓޭޓްމަންޓް ވެސް ހުށަހަޅަން ޖެހޭނެއެވެ. ބެލެވޭ ގޮތުގައި، އެ މަޢުލޫމާތުތައް ޝަހީމް ހާމަ ކުރައްވާފައި އެވަނީ އެ އަންހެންމީހާ މިނިސްޓްރީއަށް ހުށަހަޅާފައި ހުރި ޒާތީ މަޢުލޫމާތު ތަކުން ހޯދައިގެންނެވެ. ޝަހީމް އެކުރެއްވީ ވަރަށް ދަށުދަރަޖައިގެ ޢަމަލެކެވެ.