ހައްޔަރުކުރި ފަލަސްތީނު މީހެއްގެ އާއިލާއަށް، އިޒްރޭލު ސިފައިންގެ މީހަކު ފޮޓޯ ފޮނުވައި އެ މީހާ ހުރީ ރަހީނުކޮށްފައި ކަމަށާއި ފައިސާ ދިނުމުން ދޫކޮށްލާނެ ކަމަށް ބުނެ ބިރު ދެއްކި މައްސަލައެއް ފަޅާއަރައިފި އެވެ.
ފަލަސްތީނު މީހާގެ އާއިލާއަށް އިޒްރޭލުގެ އަސްކަރީ ފުލުހުންގެ މީހަކު ފޮޓޯ ފޮނުވައި، އެ މީހާ ހުރީ ރަހީނުކޮށްފައި ކަމަށް ބުނީ ވަގުތީ ގޮތުން މީހުން ބަންދުުކުރާ ފެސިލިޓީއެއްގައި ބަހައްޓާފައި ހުއްޓާ ކަމަށް ޓައިމްސް އޮފް އިޒްރޭލުން ރިޕޯޓްކޮށްފައިވެ އެވެ.
އިޒްރޭލުގެ އާމީ ރޭޑިއޯ އިން ބުނީ ފަލަސްތީނު މީހާ ދޫކޮށްލާނީ ފައިސާ ޓްރާންސްފާކުރުމުން ކަމަށް ބުނެ އިޒްރޭލު ސިފައިންގެ މީހާ ވަނީ އާއިލާގެ މީހުންނަށް ފޮޓޯ ފޮނުވައިފަ އެވެ.
އިޒްރޭލު މީޑިއާގައި ކޮށްފައިވާ މި ރިޕޯޓް އިޒްރޭލުގެ އަސްކަރިއްޔާއިން އޭއެފްޕީއަށް ކަށަވަރުކޮށްދިން ނަމަވެސް އިތުރު ތަފްސީލެއް ދޭން ވަނީ އިންކާރުކޮށްފަ އެވެ.
"މި ހާދިސާއާ ގުޅިގެން ވަނީ އެތެރޭގެ ތަހުގީގެއް ފަށާފައި،" އަސްކަރިއްޔާގެ ބަޔާނެއްގައި ބުންޏެވެ.
"އެކަމަކު ތަހުގީގެއް ކުރިއަށް ދަނިކޮށް އެކަމާ ބެހޭ ތަފްސީލެއް ހާމައެއް ނުކުރާނަން."
ހައްޔަރުކުރި ފަލަސްތީނު މީހާ އަކީ ހުޅަނގު އައްސޭރިން، އިޒްރޭލު ސަރަހައްދަށް ސިއްރުން ވަންނަން އުޅުނު މީހެއް ކަމަށްވެ އެވެ. އިޒްރޭލުން ފަލަސްތީނު މީހުންނަށް ކުރިމަތިކޮށްފައިވާ އިގްތިސާދީ ދަތިކަމުގެ ސަބަބުން މަޖުބޫރުވެގެން މިގޮތަށް ނުކުންނަން އެތައް ބަޔަކު މަސައްކަތްކުރެ އެވެ.
އިޒްރޭލުގެ ބޯޑަރުތައް ހުރަސްކޮށް މިހެން ދާން އުޅުމުގެ ތެރޭގައި ފަލަސްތީނުގެ އެތައް ބަޔަކު މަރުވެ އަދި ބޮޑެތި އަނިޔާތައް ވަމުން ދާއިރު އެތައް ބަޔަކު އިޒްރޭލު ސިފައިންގެ ބަންދަށް ވެސް ގެންދެ އެވެ.
އިޒްރޭލުގެ ޕާލަމެންޓްރީ ކޮމިޓީން މިދިޔަ އަހަރުގެ އޮކްޓޫބަރު މަހު ބުނެފައިވާ ގޮތުގައި ފަލަސްތީނުގެ 6،000 މީހުން މި ގޮތަށް 'އިޒްރޭލަށް' އެތެރެވާން މަސައްކަތް ކުރި އެވެ. އަދި އޭގެ ތެރެއިން 5،300 މީހުން ހައްޔަރުކޮށްފައިވާ ކަމަށް ބުނެފައިވެ އެވެ.
އިޒްރޭލުން މި ހުރަސްތައް ގާއިމުކޮށް، ފަލަސްތީނު މީހުންނަށް ނުވަދެވޭ ގޮތް ހަދަން ފެށީ 2002 ވަނަ އަހަރު ފަލަސްތީނުގެ ދެވަނަ އިންތިފާޟާގެ ދުވަސްވަރު، ގުދުސް އާއި އެހެން ސިޓީތަކުގައި ދިން ބޮމުގެ ހަމަލާތަކާ ގުޅިގެން ސަލާމަތީ ސަބަބުތަކަށްޓަކައި ކަމަށް ބުނެ އެވެ.
ފަލަސްތީނުގެ ރައްޔިތުން ބުނާ ގޮތުގައި މި ހުރަހުގެ ސަބަބުން، 1967 ވަނަ އަހަރުން ފެށިގެން އިޒްރޭލުން ހިސޯރުކޮށްފައިާ ހުޅަނގު އައްސޭރީގެ އިގުތިސާދީ ހާލަތު އިތުރަށް ވަނީ ގޯސްވެފަ އެވެ. -- އޭއެފްޕީ