ލޭ ހޯދުމުގައި ދިމާވާ ދަތިތަކަށް ޒަމާނީ ހައްލެއް ނުގެނެވިގެން އުޅޭ ސަބަބު ސާފުކުރަން، ގަލޮޅު އުތުރު ދާއިރާގެ މެމްބަރު މުހައްމަދު އިބްރާހިމް (ކުޑޫ) މިއަދު ސުވާލު ފޮނުއްވައިފި އެވެ.
ހެލްތު މިނިސްޓަރު އަބްދުﷲ ނާޒިމް އިބްރާހިމަށް، ލިޔުމުން ޖަވާބު ދޭ ގޮތަށް ފޮނުއްވި ސުވާލު ނޯޓިސްގައި ކުޑޫ ވަނީ ސިއްހީ ހިދުމަތް ދިނުމުގެ ގާނޫނާއި ތެލެސީމިއާ ކޮންޓްރޯލްކުރުމުގެ ގާނޫނުގައި ކަނޑައަޅާފައިވާ ގޮތަށް، ސިއްހީ ހިދުމަތްދޭ މަރުކަޒުތަކުން ފޯރުކޮށްދެމުން އަންނަ ލޭގެ ފަރުވާތަކާ ބެހޭ ގައުމީ ނިޒާމު ގާއިމްކޮށް، ތެލެސީމިއާ ކުދިންނަށް ލޭ ހަދިޔާކުރާނެ މީހުންގެ ގޮތުގައި އެ ސެންޓަރަށް ތައާރަފްކޮށްދޭ މީހުން އަދި އެ މީހުންގެ ލޭގެ ތަފްސީލުތައް ހިމެނޭ ދަފްތަރެއް ގާއިމްނުކޮށް ގިނަ ދުވަސްވަނީ ކީއްވެގެންތޯ ސުވާލުކުރައްވައިފަ އެވެ.
އޭގެ އިތުރުން ލޭ ހޯދުމާއި ދިނުމުގައި މިހާރު ދިމާވާ ދަތިތަކަށް ޒަމާނީ ހައްލެއް ނުގެނެވިގެން އުޅެނީ ކީއްވެގެންތޯ ވެސް ސުވާލުގައި ވެ އެވެ.
ލޭ ހޯދުމުގެ މައްސަލަތަކާ ގުޅޭގޮތުން ހެލްތު މިނިސްޓަރާ ސުވާލުކުރެއްވިއިރު، ބްލަޑް ސާވިސް އިން ވަނީ ލޭ ލިބުން ދަތިވުމުން އާއްމުންގެ އެހީއަށް އެދިފަ އެވެ.
އެ އިދާރާއިން މިދިޔަ ބުރާސްފަތި ދުވަހު ސޯޝަލް މީޑިއާގައި ކުރި ޕޯސްޓުގައި ބުނީ ހުރިހާ ގްރޫޕެއްގެ ލޭ ވެސް ބޭނުންވާ ކަމަށެވެ.
ރަސްމީ ދުވަސްތަކުގައި ހެނދުނު 8:00 އިން ރޭގަނޑު 8:00 އާ ހަމައަށް ލޭ ހަދިޔާ ކުރެވޭނެ އެވެ.