ށ. ފޭދޫ ރައްޔިތުންގެ ތެރެއިން ރަށުން ބޭރުގައި ދިރިއުޅޭ މީހުންގެ ދަފްތަރެއް އެކުލަވާލުމުގެ މަސައްކަތް އެ ރަށު ކައުންސިލުން ފަށައިފި އެވެ.
މި އިއުލާނުކޮށްފައިވަނީ، ސަރުކާރުން އިއުލާނުކޮށްފައިވާ ބޯހިޔާވަހި ކަމުގެ މަޝްރޫއަށް ކުރިމަތިލާއިރު، މާލޭގައި 15 އަހަރު އުޅުނުކަން ސާބިތުކޮށްދިނުމަށް ކައުންސިލްތަކުގެ ލިޔުން ހުށަހެޅިޔަސް، އެ ރެކޯޑް ބަލަހައްޓާ ކައުންސިލެއްގެ ލިޔުން ނޫނީ ބަލައިނުގަންނާނެ ކަމަށް ހައުސިން މިނިސްޓްރީން ބުނެފައި ވަނިކޮށެވެ.
ފޭދޫ ކައުންސިލުން ކުރި އިއުލާނެއްގައި ބުނީ ރަށުން ބޭރުގައި ދިރިއުޅޭ މީހެއްކަން ކަނޑައެޅުމަށާއި ދިރިއުޅުނު މުއްދަތު ކަނޑައަޅާނީ އެ އިދާރާއަށް ހުށަހަޅާ ލިޔުންތަކަށް ބެލުމަށް ފަހު ކަަމަށެވެ.
ރަށުގައި ދިރިނޫޅޭކަން އަންގައިދިނުމަށް ހުށަހެޅިދާނެ ލިޔުންތަކެއް ވެސް އިއުލާނުގައި ބުނެފައިވެ އެވެ.
އޭގެ ތެރޭގައި، ވަޒީފާދޭ ފަރާތަކުން ޕެންޝަން ސްކީމަށް ދޫކޮށްފައިވާ ލިޔުން ހުށަހަޅަން ޖެހެ އެވެ. އެ ލިޔުމުގައި، ވަޒީފާ އަދާކުރަން ފެށި ތާރީހާއި ލިޔުން ދޫކުރި ފަރާތުގެ ނަމާއި ސޮޔާއި ސިއްކަ ޖަހާފައި އޮންނަން ޖެހެ އެވެ.
އިއުލާނުގައި ބުނީ ރާއްޖޭގެ ޕެންޝަނާ ބެހޭ ގާނޫނު ތަސްދީގުކުރުމުގެ ކުރިން ވަޒީފާ އަދާކޮށްފައިވާ ފަރާތެއް ނަމަ، ވަޒީފާދޭ އަމިއްލަ ފަރާތަކުން ދޫކޮށްފައިވާ ވަޒީފާގެ ރަސްމީ ލިޔުން ނުވަތަ ސަރުކާރުގެ އިދާރާތަކުން ދޫކޮށްފައިވާ، ވަޒީފާ އަދާކުރި ކަމުގެ ލިޔުން ހުށަހެޅިދާނެ ކަމަށެވެ.
ހުށަހަޅަންޖެހޭ އިތުރު ލިޔުންތަކުގެ ތެރޭގައި ހިމެނެނީ ދިރިއުޅޭ ރަށުގެ ތައުލީމީ މަރުކަޒަކުން ތައުލީމު ހާސިލުކޮށްފައިވާކަން އެނގޭނެ ލިޔުމާއި ދައުލަތުގެ އިދާރާއަކުން އެ އިދާރާއިން ރަސްމީކޮށް ބަލަހައްޓާ ލިޔެކިޔުންތަކުގެ މައުލޫމާތުން، އެ ރަށެއްގައި ދިރިއުޅެފައިވާ މުއްދަތު ސާބިތުވާކަމުގެ ލިޔުމެވެ.
ފޭދޫ ކައުންސިލުން ބުނީ މިހާރު ދިރިއުޅެމުންދާ ރަށުގައި އުޅޭކަން ސާބިތުކޮށްދިނުމުގެ ގޮތުން ޕަބްލިކް ނޯޓަރީއެއްގެ ކުރިމަތީގައި ހުވައެއްކޮށް، އެމީހަކު އެ ރަށެއްގައި ދިރިއުޅެފައިވާ ގޭގެ ވެރިފަރާތުން ދީފައިވާ ނޮޓޮރައިޒްކޮށް ހުށަހަޅާ އެފިޑެވިޓެއް ހުށަހަޅަން ޖެހޭ ކަމަށެވެ.
އެ އިއުލާނާ އެކު އެ ލިޔުމުގެ ނަމޫނާއެއް ވެސް ހިމަނާފައިވެ އެެވެ.
ފޭދޫ ކައުންސިލުގެ ރައީސް އަހުމަދު ރައިސަމް، "މިހާރު" އަށް ވިދާޅުވީ މިއީ ރަށުން ބޭރުގައި އުޅޭ މީހުންނާއި ރަށުގައި އުޅޭ އެހެން ރަށްރަށުގެ މީހުންގެ ދަފްތަރެއް އެކުލަވާލުމަށް ކުރާ މަސައްކަތުގެ ބައެއް ކަމަށެވެ.
ކައުންސިލުން އިއްޔެ ވަނީ ރަށުން ބޭރުގައި އުޅޭ މީހުން ކަނޑައަޅާނެ ގޮތާ ގުޅޭ އުސޫލެއް ވެސް ކަނޑައަޅާފައި ކަމަށް އޭނާ ވިދާޅުވި އެވެ.
ރައިސަމް ވިދާޅުވި ގޮތުގައި މިފަހުން ފްލެޓަށް ކުރިމަތިލާން ވެސް ގިނަ ބަޔަކު އަންނަނީ ލިޔުން ހޯދަން ކައުންސިލްގައި އެދެމުންނެވެ. އެކަމަކު ރަސްމީކޮށް އެ މައުލޫމާތު ބަލަހައްޓާފައި ނުވާތީ ފްލެޓަށް ލިޔުން ހޯދުމަށް އޮތް ދަތިތަކަށް ވެސް ކުރިއަށް އޮތްތަނުގައި ދަފްތަރު އެކުލަވާލުމުން ލުއިވާނެ ކަމަށް އޭނާ ވިދާޅުވި އެވެ.
އާބާދީ 1،370 އަށް ވުރެ ބޮޑު ފޭދޫގެ 300 އެއްހާ މީހުން އެކި ބޭނުންތަކުގައި ރަށުން ބޭރުގައި ދިރިއުޅޭ ކަމަށް ކައުންސިލުން ބުންޏެވެ.
މާލޭ ސަރަހައްދުގައި ހިންގާ ބޯހިޔާވަހިކަމަށް ކުރިމަތިލުމަށް މާލޭގައި 15 އަހަރު ދިރިއުޅުނުކަން ސާބިތުކުރުމަށް ބައެއް މީހުން އަންނަނީ ރަށު ކައުންސިލުތަކުން ލިޔުން ހޯދަމުންނެވެ. އެކަމަކު ކައުންސިލް އިދާރާއަކުން ރަސްމީކޮށް އެ ރެކޯޑު ނުބަލަހައްޓާ ނަމަ މާލޭގައި 15 އަހަރު މެދުނުކެނޑި އުޅުނު ބައެއް ކަމަށް ކަނޑައަޅައި، ކައުންސިލުތަކުން ލިޔުން ދޫނުކުރުމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން ވަނީ ކައުންސިލުތަކަށް އަންގައިފަ އެވެ.