"ބޯހިޔާވަހިކަން އެންމެންނަށް" ގެ ނަމުގައި ސަރުކާރުން މިހާރު އިއުލާނު ކޮށްފައިވާ ގޯއްޗާއި ފްލެޓަށް އެދި ކުރިމަތިލާއިރު، އެ ކައުންސިލް އިދާރާއަކުން ރަސްމީކޮށް ރެކޯޑު ނުބަލަހައްޓާ ނަމަ މާލޭގައި 15 އަހަރު މެދުނުކެނޑި އުޅުނު ބައެއް ކަމަށް ކަނޑައަޅައި، ކައުންސިލުތަކުން ލިޔުން ދޫނުކުރުމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން އެދިއްޖެ އެވެ.
އެ އިދާރާ އިން ކައުންސިލްތަކަށް ފޮނުވި ސިޓީއެއްގައި ބުނީ، ބިމާއި ފްލެޓަށް ކުރިމަތިލުމަށްޓަކައި، އެ މީހަކީ މާލޭގައި ދިރިއުޅޭ މީހެއްކަން އަންގައިދޭ ލިޔުން ހޯދުމަށް އެކި ފަރާތްތަކުން ކައުންސިލުތަކަށް ހުށަހަޅަމުންދާތީ އެފަދަ ލިޔުމެއް ކައުންސިލުން ދޫކުރުމާ މެދު ކައުންސިލުތަކުން އެލްޖީއޭގެ ލަފަޔަކަށް އެދެމުން އަންނަ ކަމަށެވެ.
އެލްޖީއޭ އިން މި މަހުގެ 22 ގައި ކައުންސިލްތަކަށް ފޮނުވި އެ ސިޓީގައި ބުނީ މާލޭގައި ދިރިއުޅުނު މުއްދަތު ސާބިތުކުރުމަށް ހުށަހެޅިދާނެ ލިޔެކިޔުންތަކުގެ ތެރޭގައި ދައުލަތުގެ އިދާރާއަކުން ރަސްމީކޮށް ބަލަހައްޓާ ލިޔުންތަކާއި މައުލޫމާތުތަކުން މާލޭގައި ދިރިއުޅުނުކަން ސާބިތުވާ ނަމަ އެ އިދާރާއަކުން ދީފައިވާ ލިޔުން ހުށަހެޅިދާނެ ކަމަށެވެ.
އެލްޖީއޭ އިން ބުނި ގޮތުގައި އިދާރާއަކުން ދޫކުރާ ލިޔުން ބަލައިގަނެވޭނީ އެ އިދާރާ އިން ރަސްމީކޮށް ބަލަހައްޓާ މައުލޫމާތުން މާލޭގައި އުޅެފައިވާ މުއްދަތު ސާބިތުވާ ނަމަ އެވެ. ރަށު ކައުންސިލަކުން ނުވަތަ ސިޓީ ކައުންސިލަކުން މާލޭގައި ދިރިއުޅެފައިވާ މުއްދަތު ބަޔާންކޮށް ދޫކުރާ ލިޔުމަކީ އެ ކައުންސިލެއްގައި ބަލަހައްޓާފައި ނުވާ މައުލުމާތެއް ނަމަ އެ ލިޔުން ދޫނުކުރެވޭނެ ކަމަށް ހައުސިން މިނިސްޓްރީން އާންމުކޮށްފައިވާ މައުލޫމާތުން އެނގޭ ކަމަށް އެ ސިޓީގައިވެ އެވެ.
"ކައުންސިލެއްގައި ބަލަހައްޓާ ރަސްމީ މައުލޫމާތުގެ މައްޗަށް ބިނާކޮށް އެ ފަރާތަކުން މާލޭގައި ދިރިއުޅުނު މުއްދަތު ސާބިތުކޮށް ނުދެވޭ ނަމަ، ކައުންސިލަކުން މިފަދަ ލިޔުމެއް އެއްވެސް ފަރާތަކަށް ދޫނުކުރުމަށް ދަންނަވަމެވެ،" ކައުންސިލްތަކުގެ ބެލެނިވެރިފަރާތުގެ ސިޓީގައިވެ އެވެ.
އެލްޖީއޭ އިން ބުނީ މީގެ ކުރިން ކައުންސިލުތަކުން ސާބިތުނުކުރެވޭ ނުވަތަ ދޮގު މައުލޫމާތު ހިމަނަގައިގެން އެފަދަ ލިޔުންތައް ދޫކޮށްފައިވާތީ، އެ ލިޔުން ދޫކުރުމުގައި ޒިންމާވާ ފަރާތްތަކުގެ މައްސަލަ ބަަލައި ފިޔަވަޅު އެޅުމުގެ މަސައްކަތް ކަމާގުޅޭ އިދާރާތަކުން ކޮށްފައިވާ ކަމަށެވެ.
އެލްޖީއޭ އިން ފޮނުވި އެ ސިޓީއާ ގުޅިގެން ބައެއް ކައުންސިލުތަކުން ވަނީ މާލޭގައި އުޅުނު މީހުންގެ މައުލޫމާތު ބަލަހައްޓާފައި ނުވާތީ އެ ކައުންސިލު މެދުވެރިކޮށް ލިޔުން ދޫކުރަން ނިންމައި އެކަން އިއުލާނުކޮށްފަ އެވެ.
އެލްޖީއޭ އިން އެގޮތަށް ކައުންސިލުތަކަށް އެންގިއިރު މި ފަހުން ދައުލަތުގެ މީޑިއާއަށް ދެއްވި އިންޓަވިއުއެއްގައި ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވީ ކައުންސިލު ރައީސަށް މާލޭގައި މީހަކު 15 އަހަރު އުޅުނު ކަމަށް ބަޔާންކޮށް ލިޔުން ނުދެވޭނެ ކަމަށެވެ.
"ކައުންސިލު ރައީސަށް ހިތުގައި އޮންނަ އެނގޭ އެނގުމަކަށް ބޭސްކޮށްފައި ލިޔުމެއް ނުދެވޭނެ. އެއީ އިންސްޓިޓިއުޝަނެއްގައި ރެކޯޑުކޮށްފައި ރައްކާކޮށްފައި ބަހައްޓާ މައުލޫމާތަކަށް ބޭސްކޮށްފައޭ ޑޮކިއުމަންޓެއް ދެވޭނީ،" މިނިސްޓަރު ވިދާޅުވެފައިވެ އެވެ.
މުއްތަލިބު ވިދާޅުވި ގޮތުގައި މާލޭގައި 15 އަހަރު އުޅުނު ކަމަށް ބުނާ ލިޔުން ހުށަހެޅުމުގައި މި ސަރުކާރުން ލުއިތަކެއް ދީފައި ހުންނާނެ އެވެ. ވަަޒީފާއެއްގައި އުޅުނު ކަމުގެ ލިޔުން ނުވަތަ އާއިލާއެއް ބިނާކުރި ކަމުގެ ރަސްމީ ލިޔެކިޔުމެއް ނެތް ނަމަ އެ އުޅުނު ގެއެއްގެ ވެރިފަރާތެއްގެ ލިޔުން ހުށަހެޅިދާނެ ކަމަށް މުއްތަލިބު ވިދާޅުވި އެވެ.
އެކަމަކު އެ ލިޔުމަކީ ގާނޫނީ ލިޔުމަކަށް ވާންޖެހޭނެ ކަމަށާއި އެއީ ނޮޓަރައިޒްޑް ކޮށްފައިވާ ލިޔުމަކަށް ވާން ޖެހޭ ކަމަށް މިނިސްޓަރު ވިދާޅުވި އެވެ.
"އެ ލޯޔަރަކު ޒިންމާވާ ގޮތަށް އަދި ލިޔުންދޭ ފަރާތް ވެސް ގާނޫނީ ގޮތުން ޒިންމާކުރެވޭ ގޮތަށް މިއޮތީ. އެއީ ހަގީގަތުގައި ދޮގު މައުލޫމާތު ދީގެން ބައެއްގެ ހައްގުތައް ގެއްލުވާލުމަކީ ވެސް ރަނގަޅު ކަމެއް ނޫން،" މިނިސްޓަރު ވިދާޅުވި އެވެ.
ރަށު ކައުންސިލުތަކުންދޭ ލިޔުންތައް ބަލައިނުގަންނަން މި ސަރުކާރުން ނިންމާފައި ވަނީ ގެދޮރުވެރިޔާ ސްކީމުން ދޫކުރި ފްލެޓްތަކަށް ޝަރުތު ހަމަކުރަން މާލޭގައި 15 އަހަރު އުޅުނު ކަމަށް ދޮގު ލިޔުންތައް ކުރީގެ ކައުންސިލުތަކުން ދިން ކަމަށް ތުހުމަތުކޮށެވެ. އެ މައްސަލަ އޭރު އޭސީސީން ވެސް ބެލި އެވެ.