"އާއިލީ ބޯހިޔާވަހިކަން" ޕްރޮގްރާމުގައި ހިމެނޭ ހާއްސަ ކެޓަގަރީތަކުން ފްލެޓަށް ކުރިމަތިލުމުގެ ޝަރުތަކީ އެ އިދާރާއެއްގައި މަސައްކަތް ކުރިތާ އަހަރު ދުވަސް ކަމަށް ކުރިން ކަނޑައެޅުމަށް ފަހު، އެ އުސޫލު ބަދަލުކުރަން ހައުސިން މިނިސްޓްރީން ނިންމައިފި އެވެ.
އެ މިނިސްޓްރީން މި މަހުގެ ދެވަނަ ދުވަހު ގެެޒެޓު ކުރި އިއުލާނުގައި ވަނީ ހާއްސަ އިސްކަންދޭ ކެޓަގަރީތަކުގައި ހިމެނޭ ޖުޑިޝަރީ އާއި ފުލުހުންނާއި އެމްއެެންޑީއެފާއި ސިވިލް ސާވިސް އަދި ކަރެކްޝަންސް އާއި ރައީސް އޮފީސް ހިމެނޭ ގޮތަށް އިތުރު 23 އިދާރާއެއްގައި މަސައްކަތްކުރާ މީހުންނަށް ހާއްސަ ކޮށްފައިވާ 1،000 ފްލެޓު ދޫކުރާނެ ޝަރުތުތައް އާންމުކޮށްފަ އެވެ.
އެ އިއުލާނުގައިވާ ގޮތުން އެ މީހުން މަސައްކަތްކުރާ އިދާރާގައި މެދުނުކެނޑި މަސައްކަތްކުރާތާ އެއް އަހަރު ވެފައިވާ ނަމަ ފްލެޓަށް ޝަރުތު ހަމަވެ އެވެ. އެކަމަކު، ބޯހިޔާވަހިކަން ހަވާލުކުރާ ތާރީހުން ފެށިގެން އިދާރާ އިން ކަނޑައަޅާ ގޮތެއްގެ މަތިން ވަޒީފާ އަދާކުރުމަށް އެއްބަސްވާން ޖެހެ ކަމަށް ވެ އެވެ.
ހައުސިން މިނިސްޓްރީން އިއްޔެ ބޭއްވި ޕްރެސް ކޮންފަރެންސްގައި މިނިސްޓަރު ޑރ. އަބްދުﷲ މުއްތަލިބު ވަނީ ފަހުން ގެނައި އިސްލާހާ އެކު، އެއީ ސިޔާސީ މުވައްޒަފުންނަށް ފްލެޓު ދިނުމަށް ގެނެސްފައިވާ ބަދަލެއް ކަމަށް ބުނެ އަޑުތައް ފެތުރެމުންދާތީ، އެންމެ ފުރަތަމަ އޮތް ގޮތަށް އެ މުއްދަތު ފަސް އަހަރަށް ބަދަލުކުރަން ނިންމާފައިވާކަން އިއުލާން ކުރައްވައިފަ އެވެ.
މިނިސްޓަރު ވިދާޅުވީ އެ އުސޫލަށް ކުރިން ގެނައި ބަދަލާ އެކު ވެސް ސިޔާސީ މުވައްޒަފުންނަށް ފްލެޓަށް ކުރިމަތިނުލެވޭނެ ކަމަށެވެ.
"ހަގީގަތުގައި އެ އުސޫލު މިހާރު އޮތްގޮތުން ވެސް ސިޔާސީ މުވައްޒަފުންނަށް ކުރިމަތިލެވޭ ގޮތަކަށް ނޫން އެ އޮތީ. ސަރުކާރުގެ އެއްވެސް ވިސްނުމެއް ނެތް ސިޔާސީ ގޮތުން ވަކި ބަޔަކަށް، އާންމުކޮށް އެ އޮންނަ ކެޓަގަރީގެ ބޭރުން ހާއްސަ ކެޓަގަރީއެއް ހަދައިގެން ކުރިމަތިލެވޭ ގޮތަށް ބޭއްވުމަކީ،" މިނިސްޓަރު މުއްތަލިބު ވިދާޅުވި އެވެ.
މިނިސްޓަރު ވިދާޅުވި ގޮތުގައި އެ އިދާރާއެއްގައި އުޅޭ މުއްދަތު ފަސް އަހަރުން އެއް އަހަރަށް އޭރު ބަދަލު ގެނައީ އިދާރާތަކުގައި އުޅޭ ގާބިލު މުވައްޒަފުން އެ ތަންތަނުގައި ދިގު މުއްދަތަކަށް ބޭތިއްބުމުގެ މަގްސަދުގަ އެވެ.
"މިސާލަކަށް ދަންނަވާ ނަމަ ހުރެދާނެ ސޮފްޓްވެއާ ޑިވެލޮޕާއެއް. އޭނާ އިކޮނޮމިކް މިނިސްޓްރީގައި މަސައްކަތް ކޮށްފައި ހުރެދާނެ 10 ވަރަކަށް އަހަރު. އެކަމަކު މީގެ އެއް އަހަރު ކުރިން އޭނާ ޖުޑިޝަރީ އަށް ބަދަލުވެފައި ހުރެދާނެ. އެހެންވެއްޖެ ކަމަށް ވަންޏާ އޭނާ އަށް ހާއްސަ ކެޓަގަރީއަކަށް އެޕްލައި ކުރުމުގެ ފުރުސަތެއް ނެތް،"
މިނިސްޓަރު ވިދާޅުވީ އިދާރާތަކަށް ހާއްސަ ކެޓަގަރީއެއް ހެދީ އެ ތަންތަނުގައި ތިބި ކިޔަވައިގެން ތިބޭ ގާބިލު މީހުން ވަޒީފާގައި ހަރުލައްވަން ކަމަށެވެ. އެހެންވެ، އެކަން ކުރަން ބަލާއިރު ގިނަ މީހުންނަކީ ވަރަށް އަވަސްއަވަހަށް އެއް ތަނުން އަނެއް ތަނަށް ބަދަލުވާ މީހުން ކަމަށާއި އެހެންވެ، އެ މީހުންނަށް އެ ފުރުސަތު ގެއްލޭ ކަަމަށް ވިދާޅުވި އެވެ.
"އިދާރާތަކަށް ހާއްސަ ކެޓަގަރީއެއް ހެދުމުގެ ބޭނުމަކީ ކިޔަވައިގެން ތިބި ހުނަރުވެރި އިދާރާތައް ސަރުކާރުގެ އިދާރާތަކުގައި ރިޓެއިން ކުރެވޭނެ މަގެއް ހޯދުން. އެހެންވީމާ އެ މަގު ހޯދަން ބަލާއިރުގައި އިންސްޓިޓިއުޝަނެއްގައި އެކަނި މަސައްކަތްކުރަން ފަސް އަހަރު ދީފި ކަމަށްވާ ނަމަ، ވަރަށް ގިނަ ފަރާތްތައް އެއް ތަނުން އަނެއް ތަނަށް ބަދަލުވާއިރުގައި އެ ފުރުސަތު އެބަ ގެއްލިގެންދޭ،" މުއްތަލިބު ވިދާޅުވި އެވެ.
"އެއް އަހަރަށް ކުޑަކުރި ކަމަކީ އޭނާ އަދި އެއް އަހަރަށް މަސައްކަތް ކުރިޔަސް އެއީ އިދާރާއަކަށް މުހިއްމު މީހަކަށް ކަމަށް ވަންޏާމުން އޭނާ އެ އިދާރާއަކަށް ބަދަލުވުމަށް ފަހު އެ ފުރުސަތު އޭނާއަށް ދިނުން."
ހާއްސަ އުސޫލު އޮތީ ސިޔާސީ މީހުންނަށް ފްލެޓަށް ކުރިމަތި ނުލެވޭ ގޮތަށް ކަމަށް މިނިސްޓަރު ވިދާޅުވާ އަނެއް ސަބަބަކީ އެ އުސޫލުގައިވާ ގޮތުން އެ މީހަކު ހިދުމަތް ކުރަންޖެހޭ ކަންކަން ކަނޑައަޅާނީ އެ އިދާރާއަކުން ކަމަށް ބަޔާންކޮށްފައި އޮންނާތީ ކަމަށެވެ. އެކަމަކު ސިޔާސީ މުވައްޒަފުންގެ އައްޔަން ކުރުމާއި އެ މީހުންގެ މަސައްކަތްތައް ކަނޑައަޅަނީ ރައީސުލްޖުމްހޫރިއްޔާ ކަމަށް މުއްތަލިބު ވިދާޅުވި އެވެ.
"ސީދާ ކަނޑައެޅިގެން ސިޔާސީ މީހުންނަށް ކުރިމަތިނުލެވޭނެ އެކޭ ނޯންނާނެ. އެހެން ނަމަވެސް މި ދެންނެވި ގޮތަށް އެ އުސޫލު ހަދާފައި އޮންނާނީ ސިޔާސީ މީހުންނަށް ކުރިމަތިލެވޭ ގޮތަކަށް ނޫން،" މުއްތަލިބު ވިދާޅުވި އެވެ.
އޭނާ ވިދާޅުވީ މި ފުރުސަތަކީ އިދާރާތަކުގައި މަސައްކަތްކުރާ އެންމެ ދުވަސްވީ މީހުންނަށް ފްލެޓު ދިނުމަށް ދޭ ފުރުސަތެއް ކަމަށާއި މިއީ އެ އިދާރާތަކުގައި ތިބި އެންމެ ރަނގަޅު، ގާބިލު މުވައްޒަފުން ބޭތިއްބުމަށް ފުރުސަތު ދިނުމުގެ ގޮތުން ކުރާ ކަމެއް ކަމަށެވެ.
ޕްރޮގްރާމްގެ ދަށުން 7،900 ފްލެޓާއި 1،250 އަކަފޫޓުގެ ޖުމްލަ 15،000 ގޯތި ދޫކުރާނެ އެވެ. އެ ދެ ޕްރޮގްރާމަށް ވެސް ލެވެނީ މާލޭ މީހުންނާއި މާލޭގައި އުޅޭތާ 15 އަހަރުވެފައިވާ މީހުންނަށެވެ. ސަރުކާރުގެ އިދާރާތަކުގައި މަސައްކަތްކުރާ މުއްދަތާ ގުޅޭ ޝަރުތަކީ މާލޭގައި އުޅޭ މުއްދަތުގެ އިތުރުން އިންނަ ޝަރުތެކެވެ.