ހާއްސަ ކެޓަގަރީގެ ފްލެޓުގެ ޝަރުތު އިސްލާހުކޮށް އާންމުކޮށްފި

"އާއިލީ ބޯހިޔާވަހިކަން" ޕްރޮގްރާމުގައި ހިމެނޭ ހާއްސަ ކެޓަގަރީތަކަށް ފްލެޓަށް ކުރިމަތިލެވޭ ޝަރުތުތައް އިސްލާހުކުރުމާ އެކު ކޮންމެ ކެޓަގަރިއަށް ދޫކުރުމަށް ކަނޑައަޅާފައިވާ ފްލެޓުގެ އަދަދު އާންމުކޮށްފި އެވެ. 

ފްލެޓު ދިނުމުގެ އުސޫލަށް ފަހުން ގެނައި އިސްލާހުތަކާ އެކު ހާއްސަ ކެޓަގަރީގައި 1،000 ފްލެޓު ހިމެނެ އެވެ.

ހައުސިން މިނިސްޓްރީން މިއަދު ވަނީ މާލޭގައި ދިރިއުޅޭ މީހުންނަށް ފްލެޓު ދޫކުރުމުގެ އުސޫލުގެ 15 ވަނަ މާއްދާގެ ދަށުން ބޯހިޔާވަހިކަން ފޯރުކޮށްދިނުމުގައި ހާއްސަ އިސްކަންދެވޭ ކެޓަގަރީތަކުގެ ލިސްޓުގައި ހިމެނޭ އިދާރާތަކާއި މުއައްސަސާތަކުގެ ކެޓަގަރީތަކަށް އެދި ހުށަހަޅާ ފަރާތްތަކުން، އުސޫލުގައިވާ ޝަރުތުތަކުގެ އިތުރުން ފުރިހަމަވާންޖެހޭ އިތުރު ޝަރުތުތައް އިސްލާހުކޮށް، އާންމުކޮށްފަ އެވެ. 

އެ އިއުލާނުގައި ވަނީ ކޮންމެ ކެޓަގަރީއަކަށް ދޫކުރާ ފްލެޓުތަކުގެ އަދަދުތައް ވެސް ހިމަނައިފަ އެވެ. 

މިނިސްޓްރީން ބުނި ގޮތުގައި މާލޭގައި އާއިލާ ބިނާވެފައިވުމާ އެކު މަތީގައިވާ ފަސް އިދާރާގައި މެދުނުކެނޑި ފުލްޓައިމްކޮށް މަސައްކަތްކުރާތާ 1 އަހަރުވެފައިވާ ނަމަ ފްލެޓަށް ޝަރުތު ހަމަވެ އެވެ. އެކަމަކު ބޯހިޔާވަހިކަން ހަވާލުކުރާ ތާރީހުން ފެށިގެން އިދާރާ އިން ކަނޑައަޅާ ގޮތެއްގެ މަތިން ވަޒީފާ އަދާކުރުމަށް އެއްބަސްވާން ޖެހެ އެވެ. 

އެތަންތަނުގެ އިތުރުން އިތުރު 24 އިދާރާއެއްގައި މަސައްކަތްކުރާ މީހުންނަށް 400 ފްލެޓު ކަނޑައަޅާފައިވެ އެވެ. އެ ކެޓަގަރީގެ ތަކުގެ ވެސް އަސާސީ ޝަރުތަކީ މާލޭގައި އާއިލާ ބިނާވެފައިވުމާއި އެ އިދާރާއެއްގައި އެއް އަހަރު މަސައްކަތްކޮށްފައިވުމާއި ބޯހިޔާވަހިކަން ހަވާލުކުރުމާ އެކު އިދާރާއިން ކަނޑައަޅާ ގޮތަށް މަސައްކަތްކުރަން އެއްބަސްވުމެވެ.

މިނިސްޓްރީން ބުނީ ކޮންމެ އިދާރާއަކުން ކަނޑައަޅާ ފްލެޓުތައް ލިބޭ މީހުން ކަނޑައަޅާނީ ޝަރުތު ހަމަވާ މީހުންގެ ތެރެއިން އެ އިދާރާއަކުން ކަނޑައަޅާ އުސޫލެއްގެ ދަށުން ކަމަށެވެ. 

ޕްރޮގްރާމްގެ ދަށުން 7،900 ފްލެޓާއި 1،250 އަކަފޫޓުގެ ޖުމްލަ 15،000 ގޯތި ދޫކުރާނެ އެވެ. އެ ދެ ޕްރޮގްރާމަށް ވެސް ލެވެނީ މާލޭ މީހުންނާއި މާލޭގައި އުޅޭތާ 15 އަހަރުވެފައިވާ މީހުންނަށެވެ.  

ގޯއްޗާއި ފްލެޓަށް އެދުމަށް ފޯމު ހުށަހަޅަން ދިން މުއްދަތު ހަމަވާނީ އަންނަ އޭޕްރިލް މަހުގެ 30 އަށެވެ.