ޓެކްސީ ސެންޓަރު ރަޖިސްޓަރީ ކުރަން ލުއިތަކެއް ދޭން ނިންމައި، ޓެކްސީ ގަވާއިދަށް ސަރުކާރުން އިތުރު އިސްލާހުތަކެއް މިއަދު ގެނެސްފި އެވެ.
އެ ގަވާއިދަށް ގެނައި އިސްލާހުތަކާ ގުޅިގެން، ޓްރާންސްޕޯޓް މިނިސްޓްރީން ނެރުނު ބަޔާނެއްގައި ބުނީ އެ ބަދަލުތައް ގެނައީ އެއްގަމު ދަތުރުފަތުރުގެ ނިޒާމު ހަރުދަނާކޮށް، ހިދުމަތް ދޭ ފަރާތްތަކަށާއި ޑްރައިވަރުންނަށް ލުއިފަސޭހަ ގޮތްތަކެއް ހޯދައިދިނުމަށް ކަމަށެވެ.
އެ ގަވާއިދަށް ގެނައި މައިގަނޑު ބަދަލުތަކަކީ؛
- ޓެކްސީ ސެންޓަރެއް ރަޖިސްޓްރީ ކުރުމަށްޓަކާ ބޭނުންވާ އުޅަނދާއި ޑްރައިވަރުންގެ އެންމެ މަދު އަދަދު 100 އިން 50 އަށް މަދުކުރުން. މިނިސްޓްރީން ބުނީ އޭގެ ސަބަބުން އާ ސެންޓަރުތައް އުފެދުމަށް ހުރި ހުރަސްތައް ކުޑަކުރެވި މާކެޓުގައި ވާދަވެރިކަން އުފެދ،ި އާންމުންނަށް ލިބޭ ހިދުމަތުގެ ފެންވަރު ރަނގަޅުވާނެ ކަމަށް.
- ލައިސަންސް އޮންނަ ޓެކްސީ ޑްރައިވަރުންނަށް އެއް ވަގުތެއްގައި ދެ ޓެކްސީ ސެންޓަރެއްގައި ރަޖިސްޓަރީވެގެން މަސައްކަތް ކުރުމުގެ ފުރުސަތު އޮންނާނެ. މިނިސްޓްރީން ބުނީ އެ ބަދަލުގެ ސަބަބުން ޑްރައިވަރުންނަށް ލިބޭ އާމްދަނީ އިތުރުކުރުމަށް މަގުފަހިވާނެ ކަަމަށް.
- ދަތުރުވެރިންގެ ރައްކާތެރިކަން ކަށަވަރުކުރުމަށް މޯބައިލް އެޕްލިކޭޝަން ނުވަތަ އޮންލައިން ޕޯޓަލްތައް މެދުވެރިކޮށް ޓެކްސީ ހިދުމަތް ދޭން ބޭނުންވާ ފަރާތްތަކުން މިނިސްޓްރީގެ ހާއްސަ ހުއްދައެއް ހޯދަން ޖެހޭނެ. އެގޮތަށް ހުއްދަ ހޯދައިގެން ޑިޖިޓަލް ހިދުމަތް ދިނުމަކީ ހިދުމަތް ދޭ ފަރާތްތައް ޖަވާބުދާރީކުރުވުމަށް ލިބޭ ބާރެއް ކަމަށް މިނިސްޓްރީން ބުނި.
މިނިސްޓްރީން ބުނީ ކުންފުންޏަކުން ދަތުރުފަތުރުގެ ހިދުމަތް ދޭ ނަމަ، އެކަމަކީ އެ ކުންފުންޏެއްގެ މެންޑޭޓުގައި ހިމެނޭ ކަމެއްކަން ދެން ކަށަވަރު ކުރަން ޖެހޭނެ ކަމަށެވެ. އަދި ގަވާއިދާ އެއްގޮތަށް ރަޖިސްޓަރީކޮށް ހުއްދަ ހޯދުން، ޓެކްސީގެ ހިދުމަތް ދޭ ކުންފުނިތަކަށް ދެން ލާޒިމްވާނެ ކަމަށް މިނިސްޓްރީން ބުންޏެވެ.
"މި ހުރިހާ ބަދަލުތަކެއްގެ މައިގަނޑު އަމާޒަކީ ފަސިންޖަރުންނާއި ހިދުމަތް ދޭ ފަރާތްތަކަ ށްވެސް މަންފާ ކުރާނެ، އިތުބާރު ހުރި އަދި ޒަމާނީ ޓެކްސީގެ ނިޒާމެއް ރާއްޖޭގައި ގާއިމުކުރުމެވެ،" މިނިސްޓްރީން ބުންޏެވެ.
ސަރުކާރުގެ ޓެކްސީ ލައިންގެ ހިދުމަތަށް ފަށަން ތައްޔާރުވަމުން އަންނައިރު، މިހާރު ވަނީ އެ ހިދުމަތަށް ބޭނުންވާ ޑްރައިވަރުން ހޯދުމުގެ މަސައްކަތް ފަށައިފަ އެވެ. ސަރުކާރުން ޓެކްސީގެ ވިޔަފާރި ފަށަން ނިންމީ ޓެކްސީގެ ހިދުމަތަށް 1،500 އެއްހާ ކާރު ރަޖިސްޓްރީކޮށްފައި އޮންނައިރު ވެސް، އެ ހިދުމަތް ހޯދުމުގައި އާންމުންނަށް ދަތިތަކާ ކުރިމަތިލާން ޖެހޭތީ، އެ މައްސަލައަށް ހައްލެއް ގެނައުމަށެވެ.
ޓްރާންސްޕޯޓް މިނިސްޓަރު މުހައްމަދު އަމީން ކުރިން ވިދާޅުވެފައިވާ ގޮތުގައި، އެންމެ ފުރަތަމަ ހިދުމަތަށް ނެރޭނީ 100 ކާރެވެ. އޭގެ ސަބަބުން ހެޔޮ ބަދަލެއް އަންނާނެ ކަމަށާއި އެ ޓެކްސީތަކުގެ ތެރޭގައި ހަނި ގޯޅިތަކަށް ވަދެވޭ ފަދަ ކުދި ޓެކްސީ ވެސް ހުންނާނެ ކަމަށް މިނިސްޓަރު ވިދާޅުވެފައިވެ އެވެ.
ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތުގައި، ސަރުކާރުގެ ޓެކްސީ ލައިންގެ ހިދުމަތް މި އަހަރު ކުރީކޮޅު ފަށާނެ އެވެ.