ނ. ވެލިދޫގައި ސީއެމްބިއުލާންސްގެ ހިދުމަތް މިއަދު ފަށައިފި އެވެ.
ސީއެމްބިއުލާންސްގެ ހިދުމަތް އެ ރަށުގައި ގާއިމް ކުރުމަކީ މިިދިޔަ އަަހަރުގެ ޖުލައި މަހު ރައީސް ޑރ. މުހައްމަދު މުއިއްޒު، އެ ރަށަށް ކުރެއްވި ދަތުރުފުޅުގައި ވެވަޑައިގަތް ވައުދެކެވެ.
އެ ރަށުގައި ވާހަކަފުޅު ދައްކަވަމުން ރައީސް ވިދާޅުވެފައި ވަނީ މި މަހުގެ ތެރޭގައި އެ ހިދުމަތް އެ ރަށުގައި ފައްޓަވާނެ ކަމަށެވެ.
ސީއެމްބިއުލާންސްގެ ހިދުމަތް ވެލިދޫގައި ފައްޓަވައިދެއްވީ މިއަދު ބޭއްވި ރަސްމިއްޔާތެއްގައި ޑިފެންސް މިނިސްޓްރީގެ ޑެޕިއުޓީ މިނިސްޓަރު ފާތިމަތު މިޒްނާ އަލީ އެވެ.
އެ ރަސްމިއްޔާތުގައި މިޒްނާ ވިދާޅުވީ އެކަމަކީ ސަރުކާރުގެ މޯލްޑިވްސް ފަސްޓް ސިޔާސަތުގެ ދަށުން ދިވެހި ރައްޔިތުންގެ ސިއްހަތާއި ދުޅަހެޔޮކަން އިތުރުކުރުމަށް ކުރަމުން އަންނަ މަސައްކަތަށް އިތުރުވި ބޮޅެއް ކަމަށެވެ.
އެ ހިދުމަތް މި މަހުގެ ތެރޭގައި ތައާރަފުވެގެން ދިއުމަކީ ރައީސް މުއިއްޒަކީ ނަތީޖާ ނެރެދެއްވާ ރައީސެއްކަން ދޭހަވާ ކަމެއް ކަމަށް ވެސް މިޒްނާ ވިދާޅުވި އެވެ.
"މިއަދު މި ފެންނަނީ ރައީސް ޑރ. މުއިއްޒަކީ ވިދާޅުވާ ބަސްފުޅު، އެގޮތަށް ކޮށްދެއްވާ ނަތީޖާ ދައްކަވައި އަދި ވެވަޑައިގަންނަވާ ވައުދުފުޅުތައް އަކުރުން އަކުރަށް ފުއްދަވާކަމުގެ އުފާވެރި ހެކިތައް،" އޭނާ ވިދާޅުވި އެވެ.
މިޒްނާ ވިދާޅުވި ގޮތުގައި މި ސަރުކާރުގެ އެންމެ ބޮޑު އަމާޒަކީ "މޯލްޑިވްސް ފަސްޓް" ޕޮލިސީގެ ދަށުން ދިވެހި ރައްޔިތުންގެ ފުރާނަ އާއި ސަލާމަތާ ގުޅިފައިވާ ކަންކަމުގައި ދިވެހިންގެ އަމިއްލަ ބާރުވެރިކަން އިސްކުރުމެވެ.
ވެލިދުއަކީ އެ އަތޮޅުގައި ސަފާރީ ބަނުމާއި ވިޔަފާރި އާއި ލޯކަލް ޓޫރިޒަމްގެ އެންމެ ބޮޑު އެއް ރަށަށް ކަމަށާއި އެހެންވެ ސީއެމްބިއުލާންސްގެ ހިދުމަތް ގައިމުކުރުމަކީ ހަމައެކަނި ސިއްހީ ދާއިރާއަށް ލިބޭ ކުރިއެރުމެއް ނޫން ކަމަށް އޭނާ ވިދާޅުވި އެވެ.
މިޒްނާ ވިދާޅުވީ މިކަމަކީ ރަށުގެ އިގްތިސާދު ކުރިއެރުވުމުގެ މަސައްކަތަށް ލިބުނު ވަރުގަދަ އައްޑަނައެއް ކަމަށެވެ. އަދި އިންވެސްޓަރުންގެ އިތުބާރާއި ޔަގީންކަން ވެސް ލިބޭ ކަމެއް ކަމަށް ވިދާޅުވި އެވެ.
މީގެ ކުރިން ނ. އަތޮޅުގައި ސީއެމްބިއުލާންސް ގާއިމުވެފައި އޮތީ މަނަދޫގައި އެކަންޏެވެ.
މިޒްނާ ވިދާޅުވީ މަނަދޫގައި އޮންނަ ސީއެމްބިއުލާންސްގައި ބައެއް ފަހަރު މާލެއަށް ވެސް ބަލި މީހުން އުފުލަންޖެހޭ ކަމަށާއި އެގޮތަށް ބަލި މީހުން މާލެއަށް ގެންދާ ދަނޑިވަޅުތަކުގައި އަތޮޅު ތެރޭގައި ބަލި މީހުން އުފުލުމުގެ ދަތިތައް އޮތް ކަމަށެވެ. އެކަމަކު ވެލިދޫގައި އެ ހިދުމަތް ގާއިމުކުރެވުމާ އެކު އެކަމަށް ވެސް ލުއިތަކެއް ލިބިގެންދާނެ ކަމަށް އޭނާ ވިދާޅުވި އެވެ.
މިޒްނާ ވިދާޅުވި ގޮތުގައި މި އަހަރުގެ ތެރޭގައި ސަރުކާރުން އިތުރު 9 އެމްބިއުލާންސް ހޯދާނެ އެވެ. އަދި އޭގެ ތެރެއިން ސީއެމްބިއުލާންސް ބޭނުންކުރާނީ މިހާރު އެ ހިދުމަތް މެދުކެނޑިފައިވާ ތިން ރަށުގައި ކަމަށާއި ސީ އެމްބިއުލާންސް ފްލީޓް އަޕްގްރޭޑް ކުރުމުގެ މަސައްކަތް ވެސް ކުރަމުން އަންނަ ކަމަށް މިޒްނާ ވިދާޅުވި އެވެ.