ޗައިނާ ސަރުކާރުން ރާއްޖެއަށް ސީ އެމްބިއުލާންސެއް މިއަދު ހަދިޔާކޮށްފި އެވެ.

ކޯސްޓް ގާޑް ބިލްޑިންގައި ބޭއްވި ރަސްމިއްޔާތުގައި، ސީ އެމްބިއުލާންސް ހަވާލުކުރުމުގެ އެއްބަސްވުމުގައި ޑިފެންސް މިނިސްޓްރީގެ ސްޓޭޓް މިނިސްޓަރު މުހައްމަދު ޒުހެއިރާއި ޗައިނާގެ ކޯސްޓް ގާޑްގެ ލެފްޓިނެންޓް ކާނަލް ޗެން ޒިއޯ ވަނީ ސޮއިކުރައްވައިފަ އެވެ.

މިއީ ޗައިނާގެ ރައީސް ސީ ޖިންޕިން 2014 ވަނަ އަހަރު ރާއްޖެއަށް ކުރެއްވި ދަތުރުފުޅުގައި ރާއްޖެއާ އެކު ކުރެއްވި މަޝްވަރާތަކުގައި، ރާއްޖެއަށް އެހީއެއްގެ ގޮތުގައި ދިނުމަށް ނިންމެވި އުޅަނދެކެވެ. މި އެހީގެ އެއްބަސްވުމުގައި 2015 ވަނަ އަހަރު ވަނީ ސޮއިކޮށްފަ އެވެ.

މިއީ ރާއްޖޭގައި މިހާރު ބޭނުންކުރަމުން އަންނަ އެމްބިއުލާންސްތަކާ އަޅާބަލާއިރު ސައިޒުގެ ގޮތުން ބޮޑު އަދި ފުރިހަމަ އުޅަނދެކެވެ. ފަރުވާ ދިނުމަށް ބޭނުންކުރާނެ އެކި ވަސީލަތްތައް މީގައި ހުންނާނެ އެވެ.

ޗައިނާ އިން ރާއްޖެ އަށް ސީ އެމްބިއުލާންސް ހަދިޔާކުރުމުގެ އެއްބަސްވުމުގައި، ޑިފެންސް މިނިސްޓްރީގެ ސްޓޭޓް މިނިސްޓަރު ޒުހެއިރު (ވ) އަދި ޗައިނާ ކޯސްޓް ގާޑްގެ ލެފްޓިނެންޓް ކާނަލް ޗެން ޒިއޯ ސޮއިކުރެއްވުމަށްފަހު ލިޔުން ބަދަލުކުރައްވަނީ .-- ފޮޓޯ: ނިޝާން އަލީ/ މިހާރު
ޗައިނާ އިން ރާއްޖެ އަށް ސީ އެމްބިއުލާންސް ހަދިޔާކުރުމުގެ އެއްބަސްވުމުގައި، ޑިފެންސް މިނިސްޓްރީގެ ސްޓޭޓް މިނިސްޓަރު ޒުހެއިރު (ވ) އަދި ޗައިނާ ކޯސްޓް ގާޑްގެ ލެފްޓިނެންޓް ކާނަލް ޗެން ޒިއޯ ސޮއިކުރެއްވުމަށްފަހު ލިޔުން ބަދަލުކުރައްވަނީ .-- ފޮޓޯ: ނިޝާން އަލީ/ މިހާރު

އެ ރަސްމިއްޔާތުގައި ވާހަކަދައްކަވަމުން، ޗައިނާއިން ރާއްޖެ ކަނޑައަޅާފައި ހުންނަވާ ސަފީރު ޒަންގް ލިޒޯންގް ވިދާޅުވީ ސީއެމްބިއުލާންސަކީ ދެ ގައުމުގެ ގުޅުމާއި ރަހުމަތްތެރިކަން ދައްކުވައިދޭ ރަމްޒެއް ކަމަށެވެ. އޭނާ ވިދާޅުވީ ހުރިހާ ވަސީލަތެއް ފުރިހަމަ އެ އެމްބިއުލާންސްގެ ސަބަބުން ރާއްޖޭގެ ސިއްހީ ދާއިރާއަށް އެހީތަކެއް ލިބިގެންދާނެ ކަމަށެވެ. އަދި އެ ގައުމުގެ ފަރާތުން ސީ އެމްބިއުލާންސަށް ބޭނުންވާ ޓެކްނިކަލް އެހީތެރިކަން ފޯރުކޮށްދޭނެ ކަމަށް އޭނާ ވިދާޅުވި އެވެ.

ޗައިނާ އިން އަންނަނީ ރާއްޖެއަށް ތަފާތު އެކި ދާއިރާތަކުން އެހީތެރިކަން ފޯރުކޮށްދެމުން ކަން ވެސް ސަފީރު ފާހަގަކުރެއްވި އެވެ.

ޗައިނާ އިން ރާއްޖެ އަށް ސީ އެމްބިއުލާންސް ހަދިޔާކުރި ކަމުގެ އެއްބަސްވުމުގައި ސޮއިކުރުމަށް މިއަދު ބޭއްވި ރަސްމިއްޔާތުގައި ބައިވެރިވެވަޑައިގެންނެވި އިސް ބޭފުޅުން.-- ފޮޓޯ: ނިޝާން އަލީ/ މިހާރު
ޗައިނާ އިން ރާއްޖެ އަށް ސީ އެމްބިއުލާންސް ހަދިޔާކުރި ކަމުގެ އެއްބަސްވުމުގައި ސޮއިކުރުމަށް މިއަދު ބޭއްވި ރަސްމިއްޔާތުގައި ބައިވެރިވެވަޑައިގެންނެވި އިސް ބޭފުޅުން.-- ފޮޓޯ: ނިޝާން އަލީ/ މިހާރު

ޑިފެންސް މިނިސްޓްރީގެ ސްޓޭޓް މިނިސްޓަރު މުހައްމަދު ޒުހެއިރު މި ރަސްމިއްޔާތުގައި ވިދާޅުވީ ޗައިނާ ސަރުކާރުން ހަދިޔާކުރި އެމްބިއުލާންސަކީ ވަރަށް ބޮޑު އެހީއެއް ކަމަށެވެ.

އޭނާ ވިދާޅުވި ގޮތުގައި ރާއްޖޭގެ ހުރިހާ ހިސާބެއްގައި ދަތުރުކުރުމަށް 25 ސީ އެމްބިއުލާންސް އަންނަނީ ބޭނުންކުރަމުންނެވެ. އެ އެމްބިއުލާންސްގައި، އެއް ގަޑިއިރުގެ ތެރޭގައި ބަލި މީހާ ހޮސްޕިޓަލަކަށް ފަރުވާ ހޯދައިދިނުމަށް ގެންގޮސް ދެމުން އަންނައިރު ބައެއް ދަތިތަކާ ދިމާވާ ކަމަށް ޒުހެއިރު ވިދާޅުވި އެވެ. އެހެންވެ އެ ކަންކަމަށް ހައްލު ހޯދައިދިނުމަށް ވަސީލަތްތައް ހަމަ އެމްބިއުލާންސްގެ މުހިއްމުކަން ވަރަށް ބޮޑުކަން ވެސް ފާހަގަކުރެއްވި އެވެ.

ސީ އެމްބިއުލާންސް ބޭނުންކުރަން ފެށި ފަހުން އެ އުޅަނދުގައި 10،000 މީހުން، ފަރުވާ ދިނުމަށް އުފުލާފައިވާ ކަމަށް ވިދާޅުވި އެވެ.