މާލޭގެ މަގުމައްޗަށް ދޫކޮށްލާފައިވާ ބުޅާތައް ގެންދަން ހުޅުމާލެ 2 ގައި ހަދާފައިވާ، އޮޅުހިޔާގެ ބައެއް ތަންތަން މަރާމާތު ކޮށްދޭނެ ބަޔަކު ހޯދަން އެނިމަލް، ވެލްފެއާ މިނިސްޓްރީން މިއަދު އިއުލާނު ކޮށްފި އެވެ.
މާލޭ ސަރަހައްދުގެ މަގުތަކުގައި އުޅޭ ބުޅަލުގެ މައްސަލައަށް ދާއިމީ ހައްލެއް ހޯދުމަށް އޮޅުހިޔާ ނަމުގައި ބުޅާ ބަލަހައްޓާނެ ފެސިލިޓީއެއް ހުޅުވީ ނޮވެމްބަރު 2، 2024 ގަ އެވެ.
އެނިމަލް، ވެލްފެއާ މިނިސްޓްރީން މިއަދު ކުރި އިއުލާނެއްގައި ބުނީ، އޮޅުހިޔާގެ އައިސޮލޭޝަން ޔުނިޓާއި ޖެނެރަލް ހޯލްޑިން އޭރިއާ އާއި ފާހާނާ އަދި އޮފީހާއި ފާރަވެރިންގެ ކޮޓަރި މަރާމާތު ކޮށްދޭނެ ބަޔަކު ހޯދަން ބޭނުންވާ ކަމަށެވެ.
އެ މަސައްކަތް ކޮށްދިނުމަށް ޝައުގުވެރިވާ ނަމަ އަންނަ އަންނަ އަންގާރަ ދުވަހު މައުލޫމާތު ސާފު ކުރުމަށް މިނިސްޓްރީން ވަނީ އެދިފަ އެވެ. އަދި އަންނަ ފެބްރުއަރީ މަހުގެ 10 ވަނަ ދުވަހު އަންދާސީ ހިސާބު ހުށަހަޅަން ޖެހެ އެވެ.
މާލޭ ސިޓީ ކައުންސިލްގެ ބަޖެޓުން ހަރަދު ކޮށްގެން ހެދި އޮޅުހިޔާ ހިންގުމުގެ ކަންކަން ކުރިއަށް ގެންދަން ފުރަތަމަ ނިންމީ އެ ކައުންސިލުންނެވެ.
އެކަމަކު އެތަން ހިންގުން ދިރޭތަކެއްޗާ ބެހޭ މިނިސްޓްރީގެ ދަށަށް ބަދަލުކުރަން ކެބިނެޓުން ނިންމައި، އެކަން މާލޭ ސިޓީ ކައުންސިލަށް ޑިސެމްބަރު 2025 ގައި އެންގުމުން، އެތަން މިހާރު ބަލަހައްޓަމުން އަންނަނީ އެ މިނިސްޓްރީންނެވެ.
ޖުމްލަ 30 މިލިއަން ހަރަދު ކޮށްގެން އެޅި އެ ފެސިލިޓީއަކީ 3،000 ބުޅާ ގެންގުޅެވޭ ވަރުގެ ތަނެއް ކަމަށް އޭރު ކައުންސިލުން ބުންޏެވެ. މިނިސްޓްރީން މިހާރު އެ ތަނުގައި ބަލަހައްޓަމުން ގެންދަނީ 258 ބުޅަލެވެ.