ދެކުނު އިންޑިއާގެ ކުޅަދާނަ ޑައިރެކްޓަރު އެސްއެސް ރަޖަމޯލީގެ އާ ފިލްމު "ވަރަނާސީ" ރިލީޒްކުރާ ތާރީހު ފަސްކޮށްފި އެވެ.
ރިޕޯޓްތައް ބުނި ގޮތުގައި، އަންނަ އަހަރުގެ ޖެނުއަރީ މަހު ގެނެސްދޭން ނިންމާފައިވާ ފިލްމު އަންނަ އަހަރުގެ އެޕްރީލް މަހުގެ 27 ވަނަ ދުވަހަށް މިހާރު ވަނީ ފަސްކޮށްފަ އެވެ.
"ވަރަނާސީ" ރިލީޒްކުރާ ތާރީހު ފަސްކުރީ އަންނަ އަހަރު މާޗު ހަތެއްގައި "އެނިމަލް"ގެ ޑައިރެކްޓަރު ސަންދީޕް ރެއްޑީ ވެންގާ އާ ފިލްމު "ސްޕިރިޓް" ވެސް ރިލީޒްކުރާތީ، އެ ފިލްމާ ކުރިމަތިލާން ޖެހިދާނެތީ ކަމަށް ރިޕޯޓްތައް ބުންޏެވެ.
"ބަހޫބަލީ" އަދި އޮސްކާ އެވޯޑް ހޯދާފައިވާ "އާރްއާރްއާރް"ގެ ޑައިރެކްޓަރު ރަޖަމޯލީ ގެނެސްދޭ މި އާ ފިލްމުގައި މުހިންމު ރޯލުތައް ކުޅެނީ ގްލޯބަލް ތަރި ޕްރިޔަންކާ ޗޯޕްރާ އާއި ދެކުނު އިންޑިއާގެ މަޝްހޫރު އެކްޓަރުން ކަމަށްވާ މަހޭޝް ބާބޫ އާއި ޕްރިތުވިރާޖު ސުކުމަރަން އެވެ.
މިދިޔަ އަހަރުގެ ނޮވެމްބަރު މަހު އާންމުކުރި އެ ފިލްމުގެ ފުރަތަމަ ޓީޒާގައި ފީޗާކޮށްފައި ވަނީ މަހޭޝް ބާބޫ އެކަންޏެވެ. އަދި "ވަރްނާސީ"ގެ ދުނިޔޭގެ ކުޑަ ތައާރަފެއް ދިނެވެ.
"ވަރަނާސީ"ގެ އެންމެ މުހިންމު ތިން ތަރިން ކަމަށްވާ ޕްރިޔަންކާ އާއި މަހޭޝް ބާބޫ އަދި ޕްރިތުވިރާޖުގެ ވަކިވަކި ޕޯސްޓަރުތައް ވެސް ވަނީ ސޯޝަލް މީޑިއާގައި އާންމުކޮށްފަ އެވެ.
ޕްރިޔަންކާ އިންޑިއާގެ ފިލްމެއް މި ކުޅެނީ ވަރަށް ގިނަ އަހަރު ފަހުންނެވެ. އެންމެފަހުން އޭނާ ކުޅުނު އިންޑިއާގެ ފިލްމަކީ 2019 ގައި ގެނެސްދިން "ދަ ސްކައި އިޒް ޕިންކް" އެވެ.