ދިރާގު ދިވެހި ޕްރިމިއާ ލީގުގައި އިއްޔެ ހަވީރު ވެލެންސިއާއާ އެއްވަރުވެ ޔުނައިޓެޑް ވިކްޓަރީ (ޔޫވީ) ރެލިގޭޓް ވެއްޖެ އެވެ.
ގައުމީ ފުޓްބޯޅަ ދަނޑުގައި ކުޅުނު މެޗު އެއްވަރުވީ ލަނޑެއް ނުޖެހި އެވެ. މެޗު އެއްވަރުވުމުން ވެލެންސިއާ ވެސް ވަނީ ނޭވާ ހޮޅިއަށް އެޅިފަ އެވެ. ފުރަތަމަ ޑިވިޝަނުގައި ދެމިއޮވޮތުމުގެ ފުރުސަތު ގާތްގަނޑަކަށް އެ ޓީމަށް ވަނީ ގެއްލިފަ އެވެ. އަމިއްލަ ބާރެއް ނެތެވެ.
މިހާރު 10 ޓީމު ވާދަކުރާ ލީގުގެ ފުލަށް ދާ ދެ ޓީމު ސީދާ ރެލިގޭޓް ވާނީ ދެވަނަ ޑިވިޝަނަށެވެ. ހަތްވަނަ ޓީމާއި އަށްވަނަ ޓީމަށް ޖެހޭނީ ޕްލޭއޮފް ކުޅޭށެވެ. ދިހަ ވަނައިގައި ޔުނައިޓެޑް ވިކްޓަރީ އެވެ. އަދި ނުވަވަނައިގައި ވެލެންސިއާ އެވެ. ހަތްވަނައިގައި ޓީސީ އެވެ. އަށްވަނައިގައި ގްރީން ސްޓްރީޓްސް އެވެ.
ކޮންމެ ޓީމަކަށް ވެސް ބާކީ އޮތީ އެއް މެޗެވެ. އަންނަ ބުދަ ދުވަހު އީގަލްސްއާ ދެކޮޅަށް ކުޅޭ މެޗުން ވެލެންސިއާއިން ތަފާތު ބޮޑު ނަތީޖާއަކުން މޮޅުވެ، ލީގުގެ އަށްވަނައިގައި އޮތް ގްރީން ސްޓްރީޓްސް އަށް ލަނޑެއް ނުޖެހި ނިއު ރޭޑިއަންޓް އަތުން ވެސް ތަފާތު ބޮޑުކޮށް އަބަލިވެގެން ނުނީ ވެލެންސިއާ އަށް އޮޓަމެޓިކް ރެލިގޭޝަނުން ސަލާމަތެއް ނުވެ ވޭނެ އެވެ.
ވެލެންސިއާ އަށް ގެއްލުން 30 ގޯލް އެބައޮތެވެ. ގްރީން އަށް އޮތީ ގެއްލުން 24 ގޯލެވެ.
ވިކްޓަރީގެ ބީ ޓީމުގެ ގޮތުގައި އެ ކްލަބްގެ ފައުންޑަރުން އުފެއްދި ޔޫވީ އަކީ، ވިކްޓަރީ ނެގުމަށް ފަހު ރާއްޖޭގައި އެކްޓިވްކޮށް އޮތް ކްލަބްތަކުގެ ތެރެއިން ވިކްޓަރީ އަށް ފަހު އެންމެ ދުވަސްވީ ކްލަބެވެ. ވިކްޓަރީ އަށް ކުޅުންތެރިން ރެކްރޫޓްކުރާ ކްލަބެއްގެ ގޮތުގައި ޔޫވީ އުފެއްދީ 1972 ގަ އެވެ.
ވިކްޓަރީއާ އެއްވެސް ގުޅުމެއް ނެތި ޔޫވީ ވަކިން ހިންގާތާ ވެސް މިހާރު އަހަރުތަކެއް ވެއްޖެ އެވެ. ބައިގަރުނަށް ވުރެ ގިނަ ދުވަސްވީ ނަމަވެސް، ރާއްޖޭގެ އެއްވަނަ ޑިވިޝަނުގައި ޔޫވީ އަށް އޮވެވުނީ 10 އަހަރު އެވެ.
އެ ޓީމުގެ މިހާރުގެ ކޯޗު މުހައްމަދު ނަޒީހްގެ ކޯޗުކަމުންގެ ދަށުން 2015 ގެ ދެވަނަ ޑިވިޝަނުގެ ޗެމްޕިއަންކަން ހޯދައި، 2016 ގައި އެއްވަނަ ޑިވިޝަނުގައި ވާދަކުރަން ފެށި އެވެ.