އަދާލަތު ޕާޓީގެ ރައީސަކަށް ޝެއިހް މުހައްމަދު ޝިފާން މިއަދު އިންތިހާބުކޮށްފި އެވެ.
އަދާލަތު ޕާޓީން މިރޭ ނެރުނު ބަޔާނެއްގައި ބުނީ އެ ޕާޓީގެ ހަތަރު ވަނަ ދައުރުގެ ރައީސަކު ހޮވަން މިއަދު ބޭއްވި އިންތިހާބުގެ ނަތީޖާ ދައްކާ ގޮތުން 99 ޕަސެންޓް ވޯޓާ އެކު ޝިފާން އެ އިންތިހާބު ކާމިޔާބު ކުރައްވާފައިވާ ކަމަށެވެ. ޕަސެންޓޭޖު އާއްމުކުރި ނަމަވެސް އެއީ ކިތައް ވޯޓު ކަމެއް އަދި ވޯޓުލީ މީހުންގެ ސީދާ އަދަދެއް އެ ޕާޓީން ހާމައެއް ނުކުރެ އެވެ.
އަދާލަތު ޕާޓީގެ ނައިބު ރައީސްގެ މަގާމުގައި މިހާރު ވެސް ހުންނެވި ޝިފާންގެ ރަނިންމޭޓަކީ ޝެއިހް އަބްދުﷲ ރަޝީދެވެ.
ވަގުތީ ނަތީޖާ
ކެނޑިޑޭޓު ނަންބަރު 1: ޝެއިހް މުހައްމަދު ޝިފާން: 99 ޕަސެންޓް
ކެނޑިޑޭޓު ނަންބަރު 2: އިކްރާމް އަބްދުއްސައްތާރު: އެއް ޕަސެންޓް
އަދާލަތު ޕާޓީން ބުނީ އެ އިންތިހާބުގައި ވޯޓު ލާފައި ވަނީ ވޯޓުލެވޭ މީހުންގެ 22 ޕަސެންޓު ކަމަށެވެ.
އިލެކްޝަންސް ކޮމިޝަންގެ ވެބްސައިޓުގައިވާ ގޮތުގައި، އަދާލަތު ޕާޓީގައި މިވަގުތު ތިބި މެމްބަރުންގެ އަދަދަކީ 8،267 އެވެ. އެހެންކަމުން، ދަފްތަރުގައި ތިބި ހުރިހާ މެމްބަރުންނަށް ވޯޓު ލެވޭ ނަމަ، ޕާޓީން އާއްމުކުރި ހިސާބުތަކާއި އީސީގެ ވެބްސައިޓުގައިވާ ގޮތުން ވޯޓުގައި ބައިވެރިވީ 1،800 އެއްހާ މެމްބަރުންނެވެ.
އެ އިންތިހާބުގެ ވޯޓުލުން ކުރިއަށް ގެންދިޔައީ ފަހި ވޯޓު އޮންލައިން އެޕްލިކޭޝަން މެދުވެރިކޮށް މިއަދު ހެނދުނު 9:00 އިން މިރޭ 8:00 އަށެވެ.
އަދާލަތު ޕާޓީގެ ރައީސް ކަމަށް ހުޅުވާލުމުން ކުރިމަތިލާފައި ވަނީ ޝިފާން އާއި އިކްރާމެވެ. ނަމަވެސް އޮންލައިންކޮށް ވޯޓުލުމަށް ނިންމުމުން އިކްރާމް ވަނީ އިންތިހާބު ބޮއިކޮޓްކުރަން ނިންމައިފަ އެވެ.
އެ އިންތިހާބުގައި ވޯޓު ލާނެ ގޮތަކާ މެދު ޕާޓީގެ ތެރޭގައި އޮތީ ހިޔާލު ތަފާތުވުން އުފެދިފަ އެވެ. އިކްރާމް ވަނީ އޮންލައިންކޮށް ނުލައި ވޯޓު ފޮށި ބަހައްޓައިގެން ވޯޓުލުމަށް އެ ޕާޓީ އާއި އިލެކްޝަންސް ކޮމިޝަންގައި ވެސް އެދިފަ އެވެ. ނަމަވެސް އެ ޕާޓީން ބުނެފައި ވަނީ ވޯޓު ފޮށި ބަހައްޓަން ޕާޓީގެ އިންތިހާބުތަކުގެ ގަވާއިދުން ޖާގަ ނުދޭ ކަމަށެވެ.
އަދާލަތު ޕާޓީގެ އާ ދައުރުގެ ރައީސަކަށް އިންތިހާބުވި ޝިފާނަކީ މަދީނާ ޔުނިވާސިޓީން ޝަރުއީ ދާއިރާއިން ޑިގްރީ ހާސިލް ކުރައްވާފައިވާ ބޭފުޅެކެވެ. އަދި ރާއްޖޭގެ ބިޒްނަސް ސްކޫލުން ބިޒްނަސް އެޑްމިނިސްޓްރޭޝަނުން މާސްޓާސް ހާސިލް ކުރައްވާފައިވެ އެވެ.
އޭނާ އެ މަގާމަށް އިންތިހާބުކުރީ އެ ޕާޓީގެ ކުރީގެ ރައީސް އަދި ކުރީގެ ހޯމް މިނިސްޓަރު އިމްރާން އަބްދުﷲގެ ދައުރު ހަމަވުމުންނެވެ.