ސީރިއާގައި ހިނގަމުން ދިޔަ ހަނގުރާމަ އަށް ދިއުމަށް ފަހު، ތުރުކީގައި ތާށިވެފައި ތިބި ދިވެހި އަންހެނަކާއި އޭނާގެ 14 އަހަރުގެ ދަރިފުޅު ރާއްޖެ ގެނެސް ރިހެބިލިޓޭޓް ކުރުމުގެ މަސައްކަތް ފަށާފައިވާ ކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެ އެވެ.
ރައީސް އޮފީހުގައި މިއަދު އޮތް ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ ހަނގުރާމަތަކުގައި ބައިވެރިވާން ރާއްޖެއިން ދިޔަ ބައެއް މީހުންނާއި އެފަދަ މީހުން ގެންދިޔަ އާއިލާގެ މީހުން ރާއްޖެ ނާދެވި ހާލުގައި ޖެހިފައި އެބަ ތިބި ކަމަށެވެ.
އެކަން ނިމުމަކަށް ގެނެސް، އެ މީހުން ރާއްޖެ ގެންނަން ރައީސް ޑރ. މުހައްމަދު މުއިއްޒު އަންގާފައިވާ އެންގެވުމުގެ މަތިން އެ މަސައްކަތް ސަރުކާރުން ކުރަމުން އަންނަ ކަމަށް މިނިސްޓަރު ވިދާޅުވި އެވެ.
ަހަނގުރާމައިގައި ބައިވެރިވާން ދިޔަ 23 މީހަކު މީގެ ކުރިން ވެސް ރިހެބިލިޓޭޓްކޮށްފައިވެ އެވެ.
މިނިސްޓަރު ވިދާޅުވި ގޮތުގައި ސީރިއާގެ ދެ ސަރަހައްދެއްގައި ތިބި 60 ވަރަކަށް މީހުން ގެނައުމުގެ މަސައްކަތާއި އެހެން ބައެއް ގައުމުތަކުގައި ތާށިވެފައި ތިބި މީހުން ގެނައުމުގެ މަސައްކަތް ވެސް ކުރިއަށް އެބަދެ އެވެ. ރާއްޖޭގެ ތިން ރައްޔިތަކު ތުރުކީއަށް ހިޖުރަކޮށް އެ ތަނުގައި ތާށިވެފައި ތިބި ކަމުގެ މައުލޫމާތު ލިބުނީ އެ މަސައްކަތުގެ ތެރެއިން ކަަމަށް ވިދާޅުވި އެވެ.
އެ މީހުން ތުރުކީ ސަރުކާރުން ހިފަހައްޓައި، ދިވެހި ސަރުކާރަށް އެންގުމުން އެ ތިން މީހުން ރާއްޖެ ގެނައުމުގެ މަސައްކަތް ކުރިއަށް ގެންދިޔަ ކަން މިނިސްޓަރު ފާހަގަކުރެއްވި އެވެ. އެގޮތުން 14 އަހަރުގެ އަންހެން ކުއްޖަކާއި އެ ކުއްޖާގެ މަންމަ ރާއްޖެ ގެނެސް ހިންމަފުށީގައި ހުންނަ ނޭޝަނަލް ރީއިންޓެގްރޭޝަން ސެންޓަރު (އެންއާރުސީ)ގައި އެމީހުންނަށް ފޯރުކޮށްދޭން ޖެހޭ ކަންކަން ފޯރުކޮށްދެމުން އަންނަ ކަމަށް މިނިސްޓަރު ވިދާޅުވި އެވެ.
އެންއާރުސީ އަކީ ރާއްޖޭގައި ޓެރަރިޒަމް މަނާކުރާ ގާނޫނުގައި ބަޔާންކުރާ ކަހަލަ ހަނގުރާމަވެރި ސަރަހައްދުތަކުން ނުވަތަ އެ ކަހަލަ ހަނގުރާމައެއްގައި ބައިވެރިވުމަށް ފަހު، އަނބުރާ ރާއްޖެ އަންނަ ނުވަތަ ގެނެވޭ މީހުން މުޖުތަމައު އަށް ދިއުމުގެ ކުރިން ރިހެބިލިޓޭޝަން އަދި ރިއިންޓެގްރޭޝަން ޕްރޮގްރާމް ހިންގުމަށް ކަނޑައަޅާފައިވާ މަރުކަޒެވެ.
އެ މަރުކަޒުގައި ފަރުވާ ދޭނީ "ވިކްޓިމް"އެއްގެ ގޮތުގައި ކަނޑައެޅޭ މީހުންނަށެވެ.
އެތަނަށް ގެންނަ މީހުންނަށް ރިހެބިލިޓޭޝަންގެ ފަރުވާ ދިނުމަށް ކައުންސެލިން ރޫމްތަކާއި ކުލާސްރޫމްތައް ހުރެ އެވެ. އަދި ކުޑަކުދިންނަށް ހާއްސަ ކުޅިވަރު ކުޅޭނެ ރޫމްތަކާއި ލައިބްރަރީ އާއި އެކި ކަހަލަ ހުނަރު ދަސްކޮށް ޕްރޮގްރާމްތައް ހިންގުމަށް ވެސް ރޫމްތައް ހަދާފައިވެ އެވެ. އަދި އަމިއްލަ އަށް ކައްކައިގެން ކެވޭނެ އިންޒާމު ވެސް ވަނީ ހަމަޖައްސައި ދީފަ އެވެ.