ނޭޝަނަލް ހެލްތު ލެބޯޓްރީގެ އާ އިމާރާތް އަޅަން މި އަހަރު ހަވާލުކުރާނެ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް މިއަދު ވިދާޅުވެއްޖެ އެވެ.
އެ މިނިސްޓްރީން ބޭއްވި ޕްރެސް ކޮންފަރެންސްގައި މިނިސްޓަރު ވިދާޅުވީ އެމްއެފްޑީއޭ އަށް ކުރިއަށް އޮތް ދެ އަހަރު ގެންނާނެ އެންމެ ބޮޑު ބަދަލަކީ ނޭޝަނަލް ލެބޯޓްރީ ގާއިމްކުރުން ކަމަށެވެ.
އެ ލެބޯޓްރީ މިހާރު ހިންގަނީ ހެލްތު މިނިސްޓްރީގެ ތެރޭގަ އެވެ. ނަމަވެސް، އެއީ އެފަދަ ތަނެއް ހިންގަން އެކަށީގެންވާ ތަނެއް ނޫން ކަމަށް މިނިސްޓަރު ވިދާޅުވި އެވެ.
އޭނާ ވިދާޅުވީ، އާ ލެބޯޓްރީ ހަދަން ޔޫރަޕިއަން އިންވެސްޓްމަންޓުން ބޭންކުން 25 މިލިއަން ޑޮލަރުގެ ލޯނު ހަމަޖައްސާފައިވާ ކަމަށެވެ. އެ ލޯނުގެ އެގްރިމެންޓުގައި ސޮއިކުރީ ޖޫން 22، 2022 ގަ އެވެ.
އޭގެ ފަހުން، ލެބޯޓްރީގެ އާ އިމާރާތް ޑިޒައިންކޮށް، ފީސިބިލިޓީ ސްޓަޑީ ހެދުމާއި ކޮންސަލްޓަންސީގެ ހިދުމަތް ހޯދަން ޖަރުމަނުގެ ޖައިޓެކް ނަމަކަށް ކިޔާ ކުންފުންޏަކާއެކު ނޮވެމްބަރު 9، 2025 ގައި 1.2 މިލިއަން ޑޮލަރަށް ސޮއިކުރި އެވެ.
އެ ކުންފުނީގެ އޮފިޝަލުން މިދިޔަ އަހަރުގެ ޑިސެމްބަރު މަހާއި މިދިޔަ ޖެނުއަރީ މަހު ރާއްޖެ އައިސް މައުލޫމާތު އެއްކޮށްފައި ވެ އެވެ. މިހާރު ކުރަމުން އަންނަނީ ޑިޒައިންގެ މަސައްކަތެވެ. އަދި އިމާރާތްކޮށްދޭނެ ބަޔަކު ހޯދަން ބައިނަލްއުވާމީ ޓެންޑަރަށް އަންނަ ޖުލައި މަހު ހުޅުވާލާނެ ކަމަށް ވެސް ހެލްތު މިނިސްޓްރީން ބުންޏެވެ.
ނާޒިމް ވިދާޅުވީ ނޭޝަނަލް ލެބޯޓަރީއަށް 26،000 އަކަފޫޓުގެ ބިމެއް ހަމަޖައްސާފައިވާ ކަމަށެވެ. އެ ތަން ހަދަން ނިންމާފައިވަނީ ދެ އިމާރާތަކަށެވެ. އެއީ ނުވަ ބުރި އަދި ތިން ބުރީގެ އިމާރާތެކެވެ.
އޭގެ އެއްބައި ހާއްސަކުރަނީ އިދާރީ މަސައްކަތަށެވެ. އަނެއްބަޔަކީ ލެބޯޓްރީ ހިންގާ ތަނެވެ.
މިނިސްޓަރު ވިދާޅުވި ގޮތުގައި ލެބޯޓްރީ ހެދުމުން މައިކްރޮލޮޖީ ލެވެލް 2، 3 ގެ ވައިރަސްތައް އަދި ބެކްޓީރިއާގެ ޓެސްޓު ހަދާނެ އެވެ. އޭގެ އިތުރުން، ޒަމާނީ ވަސީލަތާއި ޓެކްނޮލޮޖީގެ އެހީގައި ބޭހާއި ކާނާގެ އިތުރު ޓެސްޓުތައް ހަދާނެ ކަމަށް ވެސް އޭނާ ވިދާޅުވި އެވެ.
"މި ލެބޯޓްރީއަކީ ހަމަ ސްޓޭޓް އޮފް ދި އާޓު ފެންވަރަށް ތަރައްގީ ކުރެވޭ ލެބޯޓްރީއެއް،" ނާޒިމް ވިދާޅުވި އެވެ.
ލެބޯޓްރީގެ އާ އިމާރާތުގައި މުވައްޒަފުންނަށް ކަސްރަތު ކުރެވޭނެ ގޮތާއި ރިކްރެއޭޝަނާއި ޗައިލްޑް ކެއާ އަދި ވަކި ވަރަކަށް އެކަމޮޑޭޝަނާއި ކެފެޓީރިއާ ވެސް ހުންނާނެ އެވެ.
ބައިނަލްއުވާމީ ޓެންޑަރިންނަށް އަންނަ ޖުލައި މަހު ހުޅުވާލާނެ ކަމަށް ވެސް ހެލްތު މިނިސްޓްރީން ބުންޏެވެ.