ރ. މަޑުއްވަރީގައި ބިދޭސީ އަންހެނަކާ މާރާމާރީ ހިނގައި، ފޭރެން އުޅުނު މައްސަލައަކާ ގުޅިގެން ނޭޕާލުގެ ފިރިހެނަކު ހައްޔަރުކޮށްފި އެވެ.
ސޯޝަލް މީޑިއާގައި އާންމުވެފައިވާ ވީޑިއޯއަކުން ފެންނަ ގޮތުގައި ބިދޭސީ ފިރިހެނަކު ވަނީ ބިދޭސީ އަންހެނަކު މަގުމައްޗަށް ވައްޓާލައި، އޭނާގެ އަނގަ ބަންދުކޮށް ބިރު ދައްކައިފަ އެވެ. އޭނާ ހުއްޓުވީ އެ ސަރަހައްދަށް ދިޔަ ދިވެއްސެކެވެ.
ރެސްޓޯރެންޓެއްގައި މަސައްކަތް ކުރާ އަންހެން މީހާގެ އަތުގައި ހުރި ފައިސާތައް ވެސް މަގުމައްޗަށް ވެއްޓިފައި އޮއްވާ ވީޑިއޯގައި ފެނެ އެވެ.
އެ މައްސަލައާ ގުޅިގެން ފުލުހުން ބުނީ މިދިޔަ ހޮނިހިރު ދުވަހު ވަނީ ކޯޓު އަމުރެއްގެ ދަށުން 24 އަހަރުގެ ނޭޕާލުގެ ފިރިހެނަކު ހައްޔަރުކޮށްފައި ކަމަށެވެ.
އޭނާގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން ފަސް ދުވަހަށް ބަންދުކުރަން އަމުރުކޮށްފައިވާ ކަމަށް ވެސް ފުލުހުން ބުންޏެވެ.
ފުލުހުން ބުނީ އެ މައްސަލަ އިތުރަށް ތަހުގީގުކުރަމުން އަންނަ ކަމަށެވެ.