ދަރަނީގެ ތެރޭގައި އޮތް ގައުމީ އެއާލައިން ހިންގުމަށް މި ސަރުކާރުން ގެނައި ބޮޑެތި ބަދަލުތަކާ އެކު ކުންފުނީގެ މާލީ ހާލަތު ރަނގަޅުވާން ފަށާފައިވާ ކަމަށް ޓޫރިޒަމް އަދި ސިވިލްއޭވިއޭޝަން މިނިސްޓަރު މުހައްމަދު އަމީން ވިދާޅުވެއްޖެ އެވެ.
މޯލްޑިވިއަންގެ އާ ސީޕްލޭން ޓާމިނަލް ހުޅުވަން ބޭއްވި ރަސްމިއްޔާތުގައި މިނިސްޓަރު ވިދާޅުވީ 2018 އިން ފެށިގެން 2023 އާ ހަމައަށް އައި އިރު އެކުންފުނި އޮތީ ވަރަށް ބޮޑު ދަރަންޏެއްގެ ތެރެއަށް ވެއްޓިފައި ކަމަށެވެ. މާލީ އެ މައްސަލަތަކާ ހެދި މުޅި ސީޕްލޭން އޮޕަރޭޝަންސް ހުއްޓުމަކަށް އައިސް، އޭރު ހިދުމަތް ދެމުން އައި ކޮންޓްރެކްޓްތައް ގެއްލި، ކުންފުނި އޮތީ ވަރަށް ބޮޑަށް ބަލިކަށިވެފައި ކަަމަށް ވެސް އޭނާ ވިދާޅުވި އެވެ.
އެހެންވެ 2023 ގައި މޯލްޑިވިއަންގެ މެނޭޖްމަންޓަށާއި ހިންގުމަށް ބޮޑެތި ބަދަލު ގެންނަން ޖެހުނު ކަމަށާއި އޭގެ ސަބަބުން އެ ކުންފުނި މިހާރު އޮތީ ވަރަށް ބޮޑަށް ބަދަލުވެފައި ކަމަށް ވެސް މިނިސްޓަރު ވިދާޅުވި އެވެ.
"އަަޅުގަނޑު ވަރަށް އުފާވޭ، އެހާ ބޮޑު ދަރަނީގައި ފަސް ވަރަކަށް އަހަރު ހިންގައި ބޮޑު ދަރަންޏެއް އޮއްވައި މިދިޔަ އަހަރުގެ ހިސާބުތައް އަޅުގަނޑު ބަލައިލި އިރު މިދިޔަ އަހަރަކީ އިރާދަކުރެއްވިއްޔާ މި ކުންފުނި ޓާން އެރައުންޑް ކޮށްފައި އޮތް އަހަރެއް،" އަމީން ވިދާޅުވި އެވެ.
މިނިސްޓަރު ވިދާޅުވީ އެއާލައިންތަކަކީ ވަރަށް ކުޑަ ފައިދާއެއްގައި ހިންގާ ވިޔަފާރިތަކަށް ވާތީ އެ ފަދަ ކުންފުނިތައް އަމާޒުން ކައްސާލައިފި ނަމަ ނުކުންނާނެ ހިތި ނަތީޖާ މޯލްޑިވިއަނަށް ފެނިފައިވާ ކަމަށެވެ. އެއީ ކުންފުނި ހިންގަން ތިއްބަވާ ބޭފުޅުން އަބަދުވެސް ހަނދާނުގައި ބަހައްޓަން ޖެހޭ ކަމެއް ކަމަށް ވެސް އޭނާ ވިދާޅުވި އެވެ.
ބޮޑެތި ބަދަލުތަކެއް ގެނެސް އިއްޔެ ހުޅުވިފަދަ ޓާމިނަލަކާ އެކު އުމްރާނީ ގޮތުން ކަންތައް ރަނގަޅުކުރެވިދާނެ ކަމަށާއި އެކަމަކު އެ ކުންފުނި ހިންގަން ތިއްބަވާ ބޭފުޅުން ބައެއް ކަންކަން އަބަދުވެސް ހަނދާނުގައި ބަހައްޓަން ޖެހޭނެ ކަމަށް ވެސް މިނިސްްޓަރު ވިދާޅުވި އެވެ.
އަމީން ވިދާޅުވި ގޮތުގައި މޯލްޑިވިއަން އުފެއްދީއްސުރެ އެ ކުންފުނި ދިޔައީ އަމިއްލަ އާމްދަނީ ހަރަދުތައް ހަމަޖައްސަައިގެން ކުރިއަރަމުންނެވެ.
އޭނާ ވިދާޅުވީ 2018 ވަނަ އަހަރާ ހަމައަށް އައި އިރު ވެސް މޯލްޑިވިއަން އިން ގެންދިޔައީ ސަރުކާރަށް ޑިވިޑެންޑް ދައްކަމުން ކަމަށެވެ. އެއާބަސް މަތިންދާބޯޓެއްގެ ހިދުމަތާއި ސީޕްލޭންގެ ހިދުމަތަށް 10 މަތިންދާބޯޓު ނެރެވުނީ އެހެންވެ ކަމަށް ވެސް އޭނާ ވިދާޅުވި އެވެ.
"އެކަމަކު ވެސް އެއާލައިނަކީ އަޅުގަނޑުމެން ވަރަށް ތިން މާޖިންއެއްގައި ހިންގާ މަސައްތަކަށް ވާއިރުގައި އެއާލައިން މަސައްކަތުގެ ކޯސް އިން ހުންގާނު ނައްޓާލައިފިއްޔާ ވާނެ ނުނީ ވެދާނެ [ފެންނާނެ] ހިތި ނަތީޖާ މިކުންފުނި އޮންނާނީ ދެކެފައި،" އަމީން ވިދާޅުވި އެވެ.
މިނިސްޓަރު ވިދާޅުވި ގޮތުގައި މޯލްޑިވިއަން އަށް ކުރިމަތިވި މާލީ މައްސަލަތަކުން އެ ފެންނީ އެއާލައިން އޮޕަރޭޓްކުރާ ކުންފުންޏަކުން އެ ކުންފުނީގެ ޒިންމާ ރަނގަޅަށް އަދާނުކޮށްފި ނަމަ އެ ކުންފުންޏެއް މާ ގިނަ ދުވަހެއް ނުވެ ބަނގޫޓުވެދާނެކަމެވެ.