މި އަހަރުގެ މިހާތަނަށް މުދަލު ޒަކާތުގެ ގޮތުގައި ލިބުނު އަދަދު، މިދިޔަ އަހަރު ލިބުނު ޖުމުލަ އަދަދަށް ވުރެ އިތުރުވެފައިވާ ކަމަށް މޯލްޑިވްސް ޒަކާތު ހައުސްއިން ބުނެފި އެވެ.
ޒަކާތު ހައުސްގެ ހިސާބުތައް ދައްކާ ގޮތުން މި އަހަރުގެ ޖެނުއަރީ އިން ފެށިގެން މިދިޔަ މަހުގެ ނިޔަލަށް މުދަލު ޒަކާތުގެ ގޮތުގައި 109,262,025.69ރ. ލިބިފައިވެ އެވެ. އެއީ މިދިޔަ އަހަރު މުޅިއެކު ލިބުނު 106,456,071.00ރ. އަށް ވުރެ 2,805,954.69ރ. ގެ އިތުރު ވުމެކެވެ.
މިއީ 2.64 ޕަސެންޓުގެ އިތުރުވުމެކެވެ.
ޒަކާތު ހައުސްއިން ބުނީ މިދިޔަ މަހުގެ ނިޔަލަށް ދިވެހި ރުފިޔާއިން ޖުމްލަ 108,739,116.62ރ. ލިބިފައިވާއިރު، 34,021.41 ޑޮލަރު ލިބިފައިވާ ކަމަށެވެ.
މިދިޔަ އަހަރު ލިބުނު ފައިސާގެ ޖުމުލަ އަދަދަށް ވުރެ މިހާތަނަށް ލިބުނު އަދަދު އިތުރުވެފައި ވާތީ، އަހަރުގެ ބާކީ ތިން މަސް ތެރޭ އަދިވެސް މި އަދަދު އިތުރުވާނެ ކަމަށް ޒަކާތު ހައުސްއިން ބުންޏެވެ.