ގަވާއިދުން ކުލި ނުދައްކާ 564 ފްލެޓް އެބަހުރި ކަމަށް ފަހި ދިރިއުޅުން ކޯޕަރޭޝަން (އެފްޑީސީ) އިން ބުނެފި އެވެ.
މިދިޔަ މަހު 21ގެ ނިޔަލަށް ފްލެޓްތަކަށް ކޮށްފައިވާ ޖޫރިމަނާ އާއި އިންޒާރުތަކުގެ މައުލޫމާތު ހިމަނައި އެ ކުންފުނިން އެކްސްގައި ކުރި ޕޯސްޓެއްގައި ބުނީ ގަވައިދުން ކުލި ދައްކާ 3،362 ޔުނިޓް އެބަހުރި ކަމަށާއި ގަވައިދުން ކުލި ނުދައްކާ ޖުމްލަ 564 ޔުނިޓު ހުރި ކަމަށެވެ.
އޭގެ އިތުރުން 49 މައްސަލައެއް އެފްޑީސީއަށް ހުށަހަޅާފައިވެ އެވެ.
އެގޮތުން ހުއްދަނެތި ކުއްޔަށް ދިނުމުގެ 16 މައްސަލަ ހުށަހަޅާފައި ވާއިރު އޭގެ ތެރެއިން ފަސް މައްސަލާގައި ޖޫރިމަނާކޮށް ދެ މައްސަލާގައި ނޯޓިސް ފޮނުވާފައި ވާއިރު ބާކީ ނުވަ މައްސަލަ ދަނީ ބަލަމުން ކަމަށް ވެސް އެފްޑީސީން ބުންޏެވެ.
ހުއްދަނެތި ޔުނިޓުތަކަށް ބަދަލު ގެނައުމުގެ 28 މައްސަލަ އެ ކުންފުންޏަށް ހުށަހަޅާފައި ވާއިރު އޭގެ ތެރެއިން ފަސް މައްސަލާގައި ޖޫރިމަނާކޮށް ބާކީ 23 މައްސަލައެއް ދަނީ ބަލަމުންނެވެ.
އެންގުންތަކަށް އަމަލު ނުކުރުމުގެ ދެ މައްސަލައެއް ހުށަހަޅާފައިވާއިރު ދެ މައްސަލަ ވެސް ދަނީ ބަލަމުންނެވެ.
ކުނި އެޅުމުގެ ތިން މައްސަލަ ހުށަހަޅާފައި ވާއިރު ދެ މައްސަލާގައި ވަނީ ޖޫރިމަނާ ކޮށްފަ އެވެ. އަދި ދެން އިން މައްސަލަ އެ ކުންފުނިން ދަނީ ބަލަމުންނެވެ.
އޭގެ އިތުރުން ހުށަހަޅާފައި ވަނީ އެންގުންތަކަށް އަމަލު ނުކުރުމުގެ ދެ މައްސަލަ އެވެ. އެ ދެ މައްސަލަ ވެސް ދަނީ ބަލަމުންނެވެ.