އަމީނީމަގު މަރާމާތުކުރުމުގެ ދެ ވަނަ ސެގްމަންޓު ފަށަން އެ ސަރަހައްދުގެ ބައެއް މަގުތަކުން މިރޭ 12:00 ގެ ކުރިން ވެހިކަލް ނަގައި ހުސްކުރަން ފުލުހުން އެދިއްޖެ އެވެ.
ސޯޝަލް މީޑިއާގައި ފުލުހުން ކުރި ޕޯސްޓުގައި ބުނީ މަގު ހެދުމުގެ މަސައްކަތް މާދަމާ ފެށުމަށް އިއްޒުއްދީން މަގުން ފެށިގެން ކޯރުކެނޑި ހިނގުމާ ހަމައަށް ޓްރެފިކް ފްލޯއަށް ބަދަލު ގެނެސް، އާއްމު ދަތުރުފަތުރަށް ބަންދުވާނެ ކަމަށެވެ.
އެހެންވެ، މިރޭ 12 ގެ ކުރިން އެ އުޅަނދުތައް ނެގުމަށް ފުލުހުން ވަނީ އެދިފަ އެވެ.
"މި ބަދަލާ ގުޅިގެން ރައްޔިތުންނަށް ދިމާވެދާނެ ދަތިތަކަށް މާފަށް އެދެމެވެ. އަދި މިފަދަ ކަންކަމުގައި ރައްޔިތުންގެ ފަރާތުން ލިބޭ އެއްބާރުލުން މި ފުރުސަތުގައި ފާހަގަކޮށް ޝުކުރު ދަންނަވަމެވެ،" ފުލުހުންގެ ޕޯސްޓުގައިވެ އެވެ.
އެ މަގުގެ ފުރަތަމަ ސެގްމަންޓު، ސުނާމީ ބިނާ މައިޒާނުން ފެށިގެން ދިވެހިރާއްޖޭގެ އަޑު ހިންގާ އިމާރާތާ ހަމައަށް މިހާރު ވަނީ ތާރު އަޅައި ނިންމައިފަ އެވެ.
ކުރިން ބަންދުކުރި މަގުތައް މާދަމާ ހުޅުވާލާނެ ކަމަށް މިނިސްޓްރީން ބުންޏެވެ.