ހުރިހާ ކަމެއް ކެމެރާތަކުގެ ކުރިމަތީގައި، ގާތިލުން ހޯދޭނެބާ؟

މިދިޔަ ބުރާސްފަތި ދުވަހުގެ އޮފީސް ނިންމާފައި ގެއަށް އައި ގޮތަށް ހުކުރު ދުވަހާއި ހޮނިހިރު ދުވަހު ވެސް ޔާމީން ރަޝީދު އުޅުނީ ގޭގަ އެވެ. ހޮނިހިރު ދުވަހުގެ ރޭ 7:00 ހާއިރު މަރިޔަމް ޝަފީގާ ގެއިން ބޭރަށް ދިޔަ އިރު، އޭނާގެ ދެ ވަނަ ދޮށީ ދަރިފުޅު ޔާމީން ސިޓިން ރޫމްގެ ސޯފާގައި އޮށޯވެލައިގެން އޮތެވެ.

ޝަފީގާ ނުކުމެގެން ދިޔަ އިރު، އެއީ އޭނާގެ ދަރިފުޅު ދިރިހުއްޓައި ފެންނާނެ އެންމެ ފަހު ފަހަރު ކަމެއް ނޭނގެ އެވެ. އަދި އޭނާ އެރޭ އޮފީހަށް ދިޔަކަން އެނގުނު ނަމަ، އާދައިގެ މަތިން ޝަފީގާ ފޯނުކޮށްފައި، ދަންވަރު އެކަނި ހިނގާފައި ނާންނަން ބުނާނެ އެވެ.

ޝަފީގާ އެނބުރި ގެއަށް އައި އިރު، ޔާމީން ވީ އޮފީހަށް ގޮހެވެ. އެކަމަކު ޝަފީގާ ހީކުރީ ޔާމީން ވީ ކޮޓަރީގައި ކަމަށެވެ. ޝަފީގާ ވެސް ކޮޓަރި އަށް ވަދެ ނިދީ އެވެ.

އެރޭ ނުވައެއް ޖަހާކަށް ހާއިރު ޔާމީން އޮފީހަށް ދާން ގެ އިން ނުކުތުމާ އެކު، ފިނޑި އަނިޔާވެރިންތަކެއް ފަރުދާވެ ތިބެ ރޭވި ނުބައި ޖަރީމާ އޭގެ އެންމެ ނުބައި ނަތީޖާއާ ބައްދަލުކުރުމުގެ ވަގުތު ގުނަން ފެށި އެވެ. ޔާމީން ގެ އިން ނުކުތް ވަގުތުން ފެށިގެން އޭނާ ދިޔައީ އޮފީހަށް ކަމާއި އޮފީހުގެ ތެރޭގައި އުޅުނީ ކިހާ އިރެއް ވަންދެން ކަން، އެ ނުބައި އަނިޔާވެރިންގެ ލޯތަކުން ފާރަލައި ބަލަމުން ދިޔަ ކަމަށް ބެލެވެ އެވެ.

ޔާމީން ގެއަށް ދިޔުމަށްޓަކައި އޮފީހުން ނުކުތީ ދަންވަރު 2:30 ހާއިރެވެ. އޭރު އޭނާ އަށް ފާރަލަމުން ދިޔަ މީހުންގެ އެއް ބަޔަކު އޭނާގެ ގޭ ދޮށުގައި ވެސް ހަރަކާތްތެރިވަމުން ދާނެ ކަމަށް ވެ އެވެ. އެ މީހުން އެ އިމާރާތުގެ ތެރެއަށް ވަދެ، ސިޑި އާއި ލިފްޓު ހުރި ސަރަހައްދަށް އަލިވާ ގޮތަށް ހުރި ބޮކި ނިއްވައިލި އެވެ.

އެއީ ޔާމީން ބޭރުން އައިސް ގެ އަށް ވަންނަ އިރު، އެތެރޭގައި މީހަކު ފިލައި ހުއްޓަސް ނޭނގޭނެ ގޮތް ހެދުމަށްޓަކަ އެވެ. އަދި އެތެރޭގައި މީހަކު ހުއްޓަސް އެއީ ކާކު ކަން ވެސް އެނގުނަ ނުދިނުމަށްޓަކަ އެވެ.

އޭރު ވެސް އެ ސަރަހައްދުގައި ކޮންމެވެސް ވަރަކަށް މީހުން ހޭލައި އުޅެ އެވެ. އަދި މަގުމަތީގައި ދުއްވާ އެއްޗެހި ވެސް ހަރަކާތްތެރިވެ އެވެ. ނަމަވެސް އެ ސަރަހައްދުގައި އާދަޔާ ޚިލާފު ކަމެއް އުޅޭ ކަމުގެ އެއްވެސް ހިލަމެއް ނުވެ އެވެ.

ބެލެވޭ ގޮތުގައި ޔާމީން އޮފީހުން ނުކުތުމާ އެކު، އޭނާ ހިނގާފައި ގެއަށް ދިޔަ މަގުތަކުން އޭނާގެ ފަސްފަހަތް ބަލަމުން އެ ބަޔަކު އޭނާގެ ގެއާ ހަމައަށް އަ އެވެ. އެ މީހުން ޔާމީންގެ ބޯކޮޅު ބަލަމުން އައި ކަމަށް ވަނީ ސައިކަލުތަކެއްގަ އެވެ. އެއީ އެ މީހުން އެ ސަރަހައްދުން އެނބުރި ދިޔައީ ސައިކަލްތަކެއްގައި ކަމަށް ވާތީ އެވެ.

އެރޭގެ ކަންތައް ހިނގައިދިޔަ ގޮތަށް ބަލާއިރު، ޔާމީނަށް ހަމަލާ ދޭން ރާވާފައި އޮތީ ދޭއް ނުވަތަ ތިން ގުރޫޕަކަށް ބަހާލައިގެން ކަމަށް ބެލެވިދާނެ އެވެ. އެއް ގުރޫޕެއްގެ މަސައްކަތަކީ ޔާމީން ގެ އަށް ވަނުމާ އެކު، އޭނާ އަށް ހަމަލާ ދީ މަރައިލުމެވެ. އަނެއް ގުރޫޕުގެ މަސައްކަތަކީ އެ އަނިޔާވެރި ޖަރީމާ ހިންގާ ވަގުތު އެ ސަރަހައްދަށް އެއްވެސް މީހަކު އާދޭތޯ ބެލުމާއި މީހަކު ކައިރިވާ ނަމަ، އެ ކަމަށް ހުރަސް އެޅުމެވެ. އަނެއް ގުރޫޕެއްގެ މަސައްކަތެއް ކަމަށް ބެލެވެނީ، ޔާމީންގެ ބޯކޮޅު ބަލައި ފާރަލުމެވެ.

ޔާމީން އައިސް، އިސްކަންދަރު މަގުގައި ހުންނަ އޭނާ ދިރިއުޅޭ ގެއާ އަރައި ހަމަވި އިރު، އެ ސަރަހައްދުގެ މަގުމަތި، މުޖުރިމުންގެ ބާރުގެ ދަށަށް ގެނަ އެވެ. އެކަކު މަޑުކުރީ ބުރުޒު މަގާއި ރިއާސީ ހިނގުން ގުޅޭ ސަރަހައްދުގަ އެވެ. އެއީ އެ ގޯޅި ތެރެއިން ލާފައި އެއްވެސް މީހަކު ނުވަތަ އުޅަނދެއް އެ ސަރަހައްދާ ކައިރިވިޔަ ނުދިނުމަށެވެ.

އިތުރު މީހަކު މަޑުކޮށްގެން ހުރީ ސްޕެޓިއުލާގެ އިރުމަތިން އިސްކަންދަރު މަގާއި ރިއާސީ ހިނގުން ގުޅޭ ކަންމަތީގަ އެވެ. އެއީ އިސްކަންދަރު މަގުގެ އިރުމަތީ ކޮޅުން ލާފައި އެ ގެއާ ހަމައަށް މީހަކު ނުވަތަ އުޅަނދެއް އާދޭތޯ ބެލުމަށާއި އަންނަ ނަމަ އެކަމަށް ހުރަސް އެޅުމެވެ.

އަދި ތިން ވަނަ މީހަކު މަޑުކޮށްގެން ހުންނާނެ ކަމަށް ބެލެވެނީ އިސްކަންދަރު މަގާއި ޖަވާހިރު ހިނގުން ގުޅޭ ކަންމައްޗާ ހިސާބުގައި ނުވަތަ އެއަށް ވުރެ ތަންކޮޅެއް ހުޅަނގުން ބިސްބުރާ ހަމައިގަ އެވެ. އެއީ ބިސްބުރު ސަރަހައްދުން ލާފައި އެއްވެސް މީހެއް ނުވަތަ އުޅަނދެއް އާދޭތޯ ބެލުމަށެވެ.

އެރޭގެ މެންދަމު 2:40 އާއި 2:55 އާ ދެމެދު ވެސް އެ ހިސާބުގެ ބައެއް ގޭގޭގައި ކޮންމެވެސް ވަރަކަށް މީހުން ހޭލައި އުޅުނެވެ. އެއްޗެހި ވެސް ދުއްވައި އުޅެ އެވެ.

ނަމަވެސް 2:45 ހިނގި ފަހުން އެ ސަރަހައްދުން ދުއްވާ އެއްޗެއްގެ އަޑެއް ނުއިވި ވަގުތުކޮޅެއް ހޭދަވި ކަމަށްވެ އެވެ. މުޅި ސަރަހައްދުގައި އޮތީ ހަމަހިމޭން ކަމެވެ. ކުއްލިއަކަށް އިވުނީ މީހެއްގެ ހަޅޭކުގެ އަޑެވެ. ނަމަވެސް ގޮވީ ކީކޭ ކަމެއް އަޑު އަންނަނީ ކޮން ދިމާލަކުން ކަމެއް ސާފެއް ނުވި އެވެ.

އެހެން ރޭރޭ ވެސް، އެ ގަޑީގައި މަގުމަތީ އުޅޭ ޒުވާނުން ސައިކަލްތަކުގައި ދާއިރު އަޑު ގަދަކޮށް ހަޅޭއްލެވުމަކީ އާންމު ކަމަކަށް ވާތީ، އެ ހިސާބުގައި ހޭލައި އުޅުނު މަދު މީހުންކޮޅު ވެސް އެ އަޑަށް މާ ބޮޑު ސަމާލުކަމެއް ނުދެ އެވެ. ހީކުރީ ޒުވާނުން ސަކަރާތް ޖަހަނީ ކަމަށެވެ.

ޔާމީން ރަޝީދު ގޭގެ ދޮރު ހުޅުވާލައި އެތެރެ އަށް ވަން އިރު މުޅި ތަން އޮތީ އަނދިރި ކޮށެވެ. ލިފްޓަށް އެރުމަށްޓަކައި ލިފްޓުގެ ސްވިޗަށް ފިތައިލި އެވެ. އެކަން އެނގެނީ، އެ ވަގުތު ލިފްޓުގެ ދޮރު ހުޅުވުމުން އެ ސަރަހައްދަށް އަލިވެގެން ދިޔަ މަންޒަރު ސީސީޓީވީ ފުޓޭޖަށް އަރާފައި ހުރުމުން ކަމަށް އޭނާގެ އާއިލާ އިން ބުނެ އެވެ.

ނަމަވެސް އޭރު އިތުރު ބަޔަކު އެ ތަނުގެ ތެރޭގައި ތިބި ކަމެއް ޔާމިނަކަށް ނޭނގޭނެ އެވެ. އެނގުނު ނަމަ ޔާމީން އެހާ އަނދިރި ތަނެއްގެ ތެރެއަށް ވަންނާނެ ކަމަކަށް ނުބެލެވެ އެވެ.

ޔާމީން ލިފްޓުގެ ސްވިޗަށް އޮބައިލި ވަގުތަކީ އޭނާ އަށް ހަމަލާ ދިން ވަގުތު ކަމަށް ބެލެވެ އެވެ. އެއް ގޮތަކީ ހަމަލާ ދިން ބަޔަކު އެ އަނދިރިގަނޑުގެ ތެރޭގައި ފިލައި ތިބެ ހަމަލާ ދިނުމެވެ. އަނެއް ގޮތަކީ ޔާމީންގެ ފަހަތުން އައިސް ގޭތެރެ އަށް ވަދެ ހަމަލާ ދިނުމެވެ. އަދި ތިން ވަނަ ގޮތަކީ ޔާމީން ލިފްޓުގެ ސްވިޗަށް ފިތައިލުމުން ލިފްޓު ހުޅުވުމާ އެކު ލިފްޓުގެ ތެރެއިން ނުކުމެ ޔާމީނަށް ހަމަލާ ދިނުމެވެ. އަދި ހަތަރު ވަނަ ގޮތަކީ ޔާމީން ސިޑިން އަރައިފާނެ ކަމަށް ބަލައި ސިޑި މަތީގައި ތިބެފައި، ޔާމީން ލިފްޓު ކައިރި އަށް ހުއްޓުމުން ކުއްލިއަކަށް ހަމަލާ ދިނުމެވެ.

ޔާމީންގެ ހަށިގަނޑުގައި ހުރި ޒަހަމްތައް ހުރީ އޮކްޓޯބަރު 2012 ގައި އަނިޔާވެރި ގޮތަކަށް ކަތިލި ދީނީ އިލްމުވެރިޔާ ޑރ. އަފްރާޝީމް އަލީގެ ހަށިގަނޑުން ފެނުނު ޒަހަމްތަކާ ދާދި އެއް ގޮތަށެވެ. ނަމަވެސް އަފްރާޝީމްގެ ހަށިގަނޑަށް ދީފައި ހުރި ޒަހަމްތަކަށް ވުރެ މާ ގިނަ ޒަހަމްތައް ޔާމީންގެ ހަށިގަނޑުން ފެންނަން ހުއްޓެވެ.

ޔާމީނަށް ހަމަލާ ދިނީ އެކަކަށް ވުރެ ގިނަ މީހުން ކަމަށް ބެލެވެ އެވެ. އެކަކު ނުވަތަ އެއް ބަޔަކު ޔާމީންގެ ބޮލަށާއި ކަރަށް ހަމަލާ ދީފައިވާ އިރު، ދެން ހުރި މީހަކު ނުވަތަ ބަޔަކު ހަމަލާ ދީފައިވަނީ ޔާމީންގެ މެޔަށާއި ބަނޑާއި އެހެން ތަންތަނަށެވެ.

ޑރ. އަފްރާޝީމްގެ ފުރާނަ އެއްފަހަރުން ދުއްވައިލުމަށްޓަކައި އޭނާގެ ބޮލަށާއި ކަރަށް ހަމަލާ ދީފައިވަނީ ކަތިވަޅިއަކުންނެވެ. ޔާމީނަށް ވެސް ހަމަލާ ދީފައިވަނީ އެފަދަ ތޫނު އަދި ބަރު އެއްޗަކުންނެވެ. އެކަން އެނގެނީ ޔާމީންގެ ބޮލުގައި ހުރި ބޮޑެތި ޒަޚަމްތަކުންނާއި ޒަޚަމްތައް ހުރި ގޮތުންނެވެ. އަދި ބޮލުގެ ފުއްކިބައިން ތަންތަންގަނޑު ނެއްޓިފައި ހުރި ގޮތުންނެވެ.

އޭގެ އިތުރުން ޔާމީންގެ މެޔާއި ބަނޑުގެ އެތައް ތަނަކަށް ތޫނު ވަޅިއެއް ފަދަ އެއްޗެއް ހަރާފައި ހުއްޓެވެ. އެހެންކަމުން ބޮޑަށް ބެލެވެނީ ޔާމީންގެ ބޮލަށް ދިން ޒަޚަމްތަކުން އޭނާގެ ފުރާނަ ހަށިގަނޑާ ވަކިވެދާނެ ކަމަށް ޝައްކު ކުރެވުމުން، ނުވަތަ ފުރާނަ ދުއްވައިލެވުނު ކަން ކަށަވަރު ކުރުމަށްޓަކައި އޭނާގެ ހިތަށާއި ފުއްޕާމެޔަށް ވަޅި ހެރީ ކަމަށެވެ.

ބޮލުގެ ފުއްކިބައިން ބޮޑެތި ތަންތަންގަނޑު ނެއްޓިފައި ހުރުމުން އެ ތަންތަނުން ރަނގަޅަށް ލޭ މަނާ ނުވާތީ، ޔާމީން ހިނަވަން ގެންދިޔަ އިރު ބޯ އޮތީ ވަރަށް ބޮޑަށް ނިވައި ކޮށްފަ އެވެ. ބޮލުގައި ހުރި ޒަޚަމްތައް ނުލައި ވެސް ހަށިގަނޑުގެ އެކި ތަންތަނުގައި 32 އަށް ވުރެ ގިނަ ޒަޚަމް ހުއްޓެވެ.

ޔާމީން މަރުވެފައި އޮއްވާ އެންމެ ފުރަތަމަ ފެނުނީ އެ ގޭގައި ދިރިއުޅޭ އެހެން މީހަކަށެވެ. އެއީ އޭނާ ގޭގައި އުޅެފައި 2:30 ހާއިރު ބޭރަށް ގޮސްފައި ތިނެއް ޖަހަނިކޮށް އެނބުރި ގެއަށް އައި ވަގުތެވެ. އޭނާ ބޭރުން އައި އިރު ވެސް މަގުމަތީގައި އިތުރު ބަޔަކު ތިބި ކަމަކަށް ނުވެ އެވެ.

އޭނާ ގެއަށް ވަތް އިރު، އަނދިރިކޮށް އޮތުމުން ފޯނުން އަލިކޮށްލައި، ލިފްޓާ ދިމާލަށް ހިނގައިގަތެވެ. ނަމަވެސް ކުއްލި ސިހުމަކާ އެކު ހުއްޓުން އެރީ، ލިފްޓު ކައިރީގައި ކަތިލާފައި އޮތް މީހަކު ފެނުމުންނެވެ. ވަގުތުން ފޯނުން ގުޅި އެވެ. ނަމަވެސް ހިތް ނުތަނަވަސްވެ ޝޮކެއްގައި ހުރުމުން ދެ ފަހަރު ވެސް ގުޅުނީ ޓެކްސީ ސެންޓަރަކަށެވެ.

ތިން ވަނަ ފަހަރުން ފުލުހުންނަށް ގުޅުމާ އެކު، ފަސް ވަރަކަށް މިނެޓްގެ ތެރޭގައި ފުލުހުން އައެވެ. އަދި އިރުކޮޅެއްގެ ތެރޭ އެމްބިއުލާންސެއް އައެވެ. ޔާމީންގެ ހަށިގަނޑު އެމްބިއުލާންސަށް އަރުވައިގެން ހޮސްޕިޓަލަށް ގެންދިޔައީ އެރޭގެ 3:15 ހާއިރެވެ. އޭރު އޭނާގެ ފުރާނަ ވަނީ މި ދުނިޔެއާ ވަކިވެފަ އެވެ.

ޔާމީނަށް ހަމަލާ ދިން ބަޔަކު އެކަން ކުރީ ފޮރުވިގެން ތިބެ ކަމަށް ވިޔަސް ސިއްރަކުން ނޫނެވެ. ފާޅުގަ އެވެ. މަގުމަތީގައި ފާރަ އަށް ތިއްބައި ބައެއް މީހުންނަށް ފެނިފައި އެބަ ހުއްޓެވެ. އެއީ ކޮން ބައެއްކަން ކަނޑައެޅިގެން ނޭނގުނަސް އެ މީހުންގެ ސިފަ އާއި ބައްޓަމާއި އިސްކޮޅާއި އިސްތަށިގަނޑު ހުރި ގޮތް ފަދަ ކިތަންމެ މައުލޫމާތެއް އެނގޭނެ މީހުން ތިބޭނެ އެވެ.

އޭގެ އިތުރުން އެ ގެ އިން ފެށިގެން 70 މީޓަރުގެ ރޭޑިއަސްގެ ސަރަހައްދެއްގައި 32 ސީސީޓީވީ ކެމެރާ އެބަ ހުއްޓެވެ. އޭގެ ތެރޭގައި ފުލުހުންގެ ފަސް ކެމެރާ ހިމެނެ އެވެ. އަދި ޔާމީން ދިރިއުޅުނު ސުޕެޓިއުލާގެ ދޮރުމައްޗާއި އެ ސަރަހައްދު ފެންނަ ހިސާބުގައި އަށް ކެމެރާ އެބަ ހުއްޓެވެ.

ޔާމީން ދިރިއުޅުނު ސުޕެޓިއުލާ ހުންނަނީ މާފަންނު ބިސްބުރާއި ކޯރުކެނޑި މަގާ ދެމެދުން އިސްކަންދަރު މަގުގަ އެވެ. މިދެންނެވި އަދަދަށް އެ ސަރަހައްދުގައި ކެމެރާ ހުރުމާ އެކު، އަދި އެ ކެމެރާތައް ހުރި ތަންތަނުގެ ގޮތުން، ބިސްބުރާއި ކޯރުކެނޑި މަގާ ދެމެދުގެ ސަރަހައްދުގައި ހިނގާ ހުރިހާ ކަމެއް އެ ކެމެރާތަކަށް ނެގިފައި ހުންނަންވާނެ އެވެ.

އެ ވަގުތުގައި އެ ހިސާބުން ދަތުރުކުރި އުޅަނދުތަކާއި މީހުން ހަރަކާތްތެރިވެފައި ހުރި ގޮތުގެ ފުރިހަމަ މަންޒަރެއް، އެ ކެމެރާތަކުން ފެންނާނެ ކަމަށް ބެލެވެ އެވެ.

މިފަދަ ހިތާމަވެރި ކޮންމެ ހާދިސާއަކާ ގުޅިގެން ވެސް ކުރެވެނީ ހަމަ މި ސުވާލެވެ. މާލޭގައި ހަރަކާތްތެރިވާ ގޭންގުތަކާއި ގުރޫޕްތަކަކީ ސިޔާސީ ފަރާތްތަކާ ގުޅިފައި ތިބޭ ބައެއް ކަމަށް އަބަދު ވެސް ވާހަކަ ދެކެވެ އެވެ. ވަކި ގޭންގަކަށް ނިސްބަތްވާ މީހަކު ކިތަންމެ ބޮޑު ތުހުމަތެއްގައި ހައްޔަރު ކުރިޔަސް އިސާހިތަކު މިނިވަންވާ ކަމުގެ ވާހަކަ ދެކެވެ އެވެ.

އެހެންކަމުން، މިއީ ވެސް ދުރާލައި ރާވައިގެން ކޮށްފައިވާ ގަތުލަކަށްވާ އިރު، މި ގަތުލުގެ ސިއްރު ހޯދޭނެ ބާވައޭ މިހާރު ވެސް ސުވާލު އުފައްދާ މީހުން މަދެއް ނޫނެވެ. ޑރ. އަފްރާޝީމްގެ މަރުގެ ހަގީގަތް ހޯދިފައި ނުވާ އިރު، ނޫސްވެރިޔާ ރިލުވާނު "ވަގަށް ނެގިތާ" ވެސް އެތައް އަހަރެއް ވެއްޖެ އެވެ. ކަމުގެ ހަގީގަތެއް، ޒިންމާވާން ޖެހޭ މީހަކު ނޭނގެ އެވެ.

ޔާމީންގެ މަރުގެ ހަގީގަތް ވެސް އޭނާގެ ކަށްވަޅުގެ ވެލިތަކާ އެކު ބިމުގެ ފަސްގަނޑުގެ ތެރެއަށް އޮބިގެން ނުގޮސްފިއްޔާ ކިތަންމެހާ ވެސް ރަނގަޅެވެ.