ޝަރުތުތަކާ އެކު ހަނީފް ދޫކޮށްލައިފި

ހައި ކޯޓުގެ ފަނޑިޔާރު ޝުޖާއު އުސްމާނު އަވަހާރަކޮށްލަން އުޅުމުގެ ތުހުމަތުގައި ބަންދުކޮށްފައިވާ އިބްރާހިމް ހަނީފް ދޫކޮށްލަން ހައި ކޯޓުން މިއަދު އަމުރުކޮށްފި އެވެ.

އެޑިއުކޭޝަން މިނިސްޓްރީގެ ކުރީގެ ސީނިއާ ޕޮލިސީ އެގްޒެކެޓިވް ހަނީފް ދޫކޮށްލުމަށް ހައި ކޯޓުން އަމުރުކުރީ، އޭނާ ހައްޔަރުކުރި މައްސަލަ އިސްތިއުނާފު ކުރުމުން މިއަދު އިއްވި ހުކުމުގަ އެވެ.

މިދިޔަ މަހުގެ ހަތަރު ވަނަ ދުވަހު ހައްޔަރުކުރި ހަނީފް ވަނީ މި މަހުގެ 16 ވަނަ ދުވަހު ގޭބަންދަށް ބަދަލުކޮށްފަ އެވެ. އޭނާގެ ބަންދުގެ މުއްދަތު ކްރިމިނަލް ކޯޓުން ފަސް ފަހަރެއްގެ މަތިން އިތުރުކުރި އެވެ.

ހައި ކޯޓުން މިއަދު އިއްވި ހުކުމްގައި ބުނެފައިވަނީ ހަނީފް ބަންދުގައި ބެހެއްޓުމަށް މެއި 11 ގައި ކްރިމިނަލް ކޯޓުން ނެރުނު ކޯޓު އަމުރުގެ އިތުރު ބަޔާނުގައި އަންގާފައިވާ އެންގުމާ އެއްގޮތަށް އަމަލު ކޮށްފައި ނުވާ ކަމަށެވެ. އެ އަމުރުގެ އިތުރު ބަޔާނުގައި ބުނެފައި ވަނީ "މި މުއްދަތުގައި ތަހުގީގުގައި ފުރިހަމަ ކުރަންޖެހޭ ހުރިހާ ކަމެއް ފުރިހަމަ ކޮށް، ދައުވާ ކުރުމާ މެދު ގޮތެއް ނިންމުމަށް އަންގައި، މި މުއްދަތުގައި މިކަންކަން ފުރިހަމަ ނުކޮށްފި ނަމަ ދޫކޮށްލެވޭނެ ކަން އަންގަމެވެ." މިފަދައިންނެވެ.

އެ ގޮތަށް ކޯޓު އަމުރުގައި އޮތް ނަމަވެސް، އިސްތިއުނާފު ކުރި ކޯޓު އަމުރަށް އެދި ފުލުހުން ކްރިމިނަލް ކޯޓަށް ހުށަހެޅި އިރު، އޭގެ ކުރިން ނެރުނު އަމުރުގައި އަންގާފައިވާ ގޮތަށް އެ މައްސަލައިގައި ދައުވާ ކުރުމާ މެދު ގޮތެއް ނިންމާފައި ނުވާ ކަމަށް ހައި ކޯޓުން މިއަދު ކުރި ހުކުމްގައި ފާހަގަ ކޮށްފައިވެ އެވެ. އަދި މި މައްސަލައިގައި ޕްރޮސެކިއުޓާ ޖެނެރަލްގެ އޮފީހާ އެކު ދެ ފަހަރެއްގެ މަތިން ފުލުހުން މަޝްވަރާ ކޮށްފައި ވިޔަސް، ހަނީފްގެ މައްޗަށް ދައުވާ ކުރުމާ މެދު ގޮތެއް ނިންމާފައި ނުވާ ކަމަށް ދައުލަތުގެ ފަރާތުން ހައި ކޯޓުގައި ބުނެފައިވެ އެވެ.

އަދި އޭގެ ކުރިން ނެރުނު އަމުރުގެ އިތުރު ބަޔާނުގައި އަންގާފައިވާ އެންގުމާ މެދު ހިތްހަމަނުޖެހިގެން ދައުލަތުގެ ފަރާތުން އެ އަމުރު އިސްތިއުނާފު ކޮށްފައި ނުވުމުގެ އިތުރުން އެ ނިންމުން މުރާޖައާ ކުރުމަށް ވެސް ދައުލަތުގެ ފަރާތުން އެދިފައެއް ނުވެ އެވެ.

އޭގެ އިތުރުން ހައި ކޯޓުން މިއަދު ކުރި ހުކުމްގައި ބުނެފައިވަނީ ހަނީފްގެ މައްސަލައަކީ ތަހުގީގު ކުރަމުންދާ މައްސަލައެއް ކަމަށްވެފައި މި މައްސަލައިގެ ތަހުގީގު ކުރިއަށް ގޮސްފައިވާ މިންވަރަށާއި މައްސަލައިގައި އަމަލު ކުރަމުންދާ ގޮތުގެ މައްޗަށް ރިއާޔަތްކޮށް، އަދި މި ގަޒިއްޔާގައި ކޮށްފައިވާ ޝަރުތުތަކާ އެއްގޮތަށް އަމަލު ކުރުމަށް ހަނީފް އެއްބަސްވެފައިވާތީ އެ ޝަރުތުތަކުގައިވާ ގޮތުގެ މަތިން އަމަލު ކުރުމަށް ހަނީފް އެއްބަސްވެފައިވާތީ، އެ ޝަރުތުތަކާ އެއްގޮތަށް އަމަލު ކުރުމަށް އަންގައި ހަނީފް ދޫކޮށްލުމަށް ނިންމީ ކަމުގައި ހައި ކޯޓުގެ ހުކުމްގައިވެ އެވެ.

ނަމަވެސް މި ގަޒިއްޔާގައި ހަނީފްގެ މައްޗަށް ކަނޑައެޅި ޝަރުތުތަކަކީ ކޮބައިކަން ހައި ކޯޓުގެ ހުކުމްގައި ބުނެފައެއް ނެތެވެ.