ބޭސްފަރުވާއަށް ސިންގަޕޫރުގައި ހުންނެވި ޖުމްހޫރީ ޕާޓީގެ ލީޑަރު ގާސިމް އިބްރާހީމަށް އިތުރު މުއްދަތެއް ދެވެން ނެތް ކަމަށް މޯލްޑިވްސް ކަރެކްޝަނަލް ސާވިސް އިން އަންގާފައިވާ ކަމަށް އޭނާގެ ވަކީލުން މިއަދު ބުނެފި އެވެ.
ގާސިމްގެ ވަކީލުންގެ ޓީމުން ބުނީ އޭނާ ރާއްޖެ ވަޑައިގަންނަވަން މިއަދު ވެސް ސިންގަޕޫރު އެއާލައިންސްގެ ބޯޓަށް ނޭރުވިކަން ކަރެކްޝަނަށް އަންގާފައިވާނެ ކަމަށެވެ.
އެކަމަކު ވަކީލުންގެ ފަރާތުން ނެރުނު ބަޔާނެއްގައި ބުނި ގޮތުގައި ސިންގަޕޫރުގައި ގާސިމް ތިން މަސް މަޑުކުރައްވަން ޖެހޭނެ ކަމަށް ޑޮކްޓަރުން ދީފައިވާ ލަފަޔާ އެއްގޮތަށް މުއްދަތު އިތުރުކޮށްދެވެން ނެތްކަން ކަރެކްޝަނުން މިއަދު ހަވީރު ވަނީ އަންގައިފަ އެވެ.
ގާސިމްގެ ބޭސްފަރުވާއަށް އެންމެ ފަހުން ދިން ހަތް ދުވަހުގެ މުއްދަތު މިއަދު ވަނީ ހަމަވެފަ އެވެ. އޭގެ ކުރިން ދެ ބުރަކަށް ޖުމްލަ 20 ދުވަހުގެ މުއްދަތެއް ދިނެވެ.
ވަކީލުންގެ ބަޔާނުގައި ބުނެފައިވާ ގޮތުގައި ގާސިމްގެ އާއިލާއަށް ކަރެކްޝަނުން އަންގާފައިވަނީ މިއަދުގެ ކުރިން އޭނާ މާލެ ގެނެސް އެތަނާ ހަވާލުކުރާށެވެ. ނަމަވެސް މަތިންދާބޯޓުގައި ދަތުރުކުރައްވަން ގާސިމްގެ ހާލުކޮޅު ތަންނުދޭތީ މިއަދު ވެސް ބޯޓަށް ނޭރުއްވޭނެ ކަމަށް ސިންގަޕޫރު އެއާލައިންސުން އެންގި ކަމަށް ބަޔާނުގައިވެ އެވެ.
"އެހެންކަމުން ސިންގަޕޫރުން މާލެއަށް އޮންރަބަލް ގާސިމް އިބްރާހީމަށް ދަތުރުކުރުމުގެ ހުއްދަ އެއާލައިނުން ދީފައިނުވާކަން ވާނީ މޯލްޑިވްސް ކަރެކްޝަނަލް ސާވިސްއަށް މިއަދު ވެސް އަންގައިފަ އެވެ،" އެ ބަޔާނުގައިވެ އެވެ.
ގާސިމްގެ ވަކީލުން ބުނީ އޭނާގެ ހިތުގެ އީޕީ ސްޓަޑީ މި މަހު 19 ގައި ސިންގަޕޫރުގެ މައުންޓް އެލިޒަބަތު ނޮވީނާ ހޮސްޕިޓަލުގައި ހަދަން ޝެޑިއުލް ކޮށްފައިވާ ކަމަށެވެ. އީޕީ ސްޓަޑީ އަށް ފަހު ވެސް އިތުރު ފަރުވާއަށް ސިންގަޕޫރުގައި ހުންނަވަން ޖެހޭނެ ކަމަށް ޑޮކްޓަރު ލަފާދެއްވާފައިވާކަން ކަރެކްޝަނަށް އަންގާފައިވާނެ ކަމަށް ވެސް ވަކީލުން ބުނެ އެވެ.
އެ ބަޔާނުގައި ބުނީ ގާސިމްގެ ފުރާނަފުޅަށް ނުރައްކަލެއް ކުރިމަތިވެދާނެ ގޮތަށް، ޑޮކްޓަރުންގެ ލަފަޔާއި އިރުޝާދާ ހިލާފަށް ކަރެކްޝަނުން ތަކުރާރުކޮށް އަމަލުކުރާތީ އެކަމާ ނުހަނު ކަންބޮޑުވާ ކަމަށެވެ.