ރާއްޖޭގައި އިންޓަނޭޝަނަލް އެއާޕޯޓެއް ހަދައި އޮޕަރޭޓް ކުރުމުގެ ހުއްދަ ދީ، އެކަމަށް ރަސްމީކޮށް ހުށަހެޅުމުގެ ދައުވަތު، އިންޑިއާގެ ހަތިޔާރު ވިއްކާ، އަދި މައްސަލަ ބޮޑު ކުންފުންޏަކަށް ސަރުކާރުން ދީފި އެވެ.
ޓޫރިޒަމް މިނިސްޓަރު މޫސާ ޒަމީރު މި 4 ގައި ސޮއިކުރައްވައި އިންޑިއާގެ އޯލާލާ ކުންފުނީގެ ޗެއާޕާސަން އަންކާ ވަރުމާއަށް ފޮނުއްވި ސިޓީގައި ބުނެފައި ވަނީ ރާއްޖޭގައި އިންޓަނޭޝަނަލް އެއާޕޯޓެއް ހަދައި ހިންގަން ހުށަހަޅާފައިވާ ގޮތަށް އެކަން ކުރިއަށް ގެންދެވިދާނެ ކަމަށެވެ.
އެ އެއާޕޯޓް ހިންގަން ދެނީ 50 އަހަރަށެވެ. އެކަމަކު އެއީ މިހާރު ރާއްޖޭގައި އޮޕަރޭޓްކުރާ އެއާޕޯޓެއް ކަމެއް ނުވަތަ މުޅިން އަލަށް ހަދާ ތަނެއް ކަމެއް ނޭނގެ އެވެ.
އަންކާ އަކީ ރޫމޭނިއާގެ ކުރީގެ ރީތީގެ ރާނީ އެވެ. އޭނާ ކައިވެނިކޮށްގެން އުޅެނީ ހަތިޔާރުގެ ވިޔަފާރިކުރާ އިންޑިއާ މީހެއް ކަމަށްވާ އަބީޝެކް ވަރުމާއާ އެވެ. އޭނާއަކީ ސީރިއަސް މައްސަލަތަކެއްގެ ތުހުމަތުކުރެވޭ މީހެކެވެ. އެ ތުހުމަތުތަކުގެ ތެރޭގައި އިންޑިއާގައި ބްލެކް ލިސްޓްކޮށްފައިވާ ޖަރުމަނުގެ ހަތިޔާރު ވިއްކާ ކުންފުންޏެއް އެ ލިސްޓުން އުނިކުރަން ރިޝްވަތު ދިނުން ހިމެނެ އެވެ.
އިންޑިއާގެ ސެންޓްރަލް ބިއުރޯ އޮފް އިންވެސްޓިގޭޝަން އިން އަންނަނީ އޭނާގެ އެ މައްސަލަ ބަލަމުންނެވެ.
ވަރްމާ އުޅެނީ އޭނާގެ މައްޗަށް ކޮށްފައިވާ ތުހުމަތުތަކުގެ ތަހުގީގަށް އެއްބާރުލުން ނުދީ ފިލައިގެންނެވެ. އޭނާގެ މައްޗަށް މަނީލޯންޑްރިން މައްސަލަތަކެއްގެ ތުހުމަތު ވެސް ކުރެވެ އެވެ.
އިންޓަނޭޝަނަލް އެއާޕޯޓެއް ތަަރައްގީކޮށް ހިންގަން އޯލާލާއަށް ދިނުމާ ބެހޭ އެއްވެސް ތަފްސީލެއް ސަރުކާރަކުން ހާމައެއް ނުކުރެ އެވެ. އަދި އެހާ ސީރިއަސް ތުހުމަތުތަކެއް ކުރެވޭ ވިޔަފާރީގެ ބަޔަކަށް ދައުވަތު ދިނީ ކީއްވެގެންކަމެއް ވެސް ސަރުކާރަކުން ނުބުނެ އެވެ.
