ކުރިން ވަކި ފިކުރެއްގައި ވާހަކަ ދެއްކެވިޔަސް، އިލެކްޝަންސް ކޮމިޝަންގެ މެމްބަރެއްގެ ގޮތުން މަސައްކަތް ކުރައްވާނީ ވަކި ފަރާތަކަށް ނުޖެހި ކަމުގެ ޔަގީންކަން، އެ ކޮމިޝަނުގެ އާ ރައީސް އަހުމަދު ޝަރީފް، މިއަދު ދެއްވައިފި އެވެ.
އެ ކޮމިޝަނުން ބޭއްވި ނޫސްވެރިންގެ ބައްދަލުވުމުގައި ޝަރީފް ވިދާޅުވީ، މިނިވަން މުއައްސަސާއެއްގައި ތިއްބަވާ މެމްބަރުންނަކީ މިނިވަންކަމާއި އަމިއްލަވަންތަ ބައެއް ކަމަށް ބެލެވެނީ އެ މުއައްސަސާއެއްގެ ގާނޫނާއި ގަވައިދުގެ ތެރޭގައި ހިފެހެއްޓޭ ކަމުގައިވާ ނަމަ ކަމަށެވެ.
ރާއްޖޭގައި ހަދާފައިވާ ގާނޫނުތަކާއި ގަވާއިދުތަކުގެ ތެރެއިން މަސައްކަތް ކުރައްވަމުން ގެންދަވާ ނަމަ ރައްޔިތުން ވެސް ބަލައިގަންނަން ޖެހޭނީ ވަކި ފަރާތަކަށް ނުޖެހޭ ބޭފުޅެއްގެ ގޮތުގައި ކަމަށް ވެސް ޝަރީފް ވިދާޅުވި އެވެ.
އިލެކްޝަންސް ކޮމިޝަނަށް އައްޔަން ކުރެއްވުމާ ހަމަ އަށް ޝަރީފް ހުންނެވީ ފެނަކައިގެ މެނޭޖިން ޑިރެކްޓަރުގެ މަގާމުގަ އެވެ.
"އަޅުގަނޑު ޔަގީންކޮށް އަރުވަން ރައްޔިތުންނަށް، އިލެކްޝަންސް ކޮމިޝަންގެ ރައީސެއްގެ ހައިސިއްޔަތުން މަސައްކަތް ކުރާއިރު، މީގެކުރިން އަޅުގަނޑު މަސައްކަތްކޮށްފައިވާ ދާއިރާއެއް، ނުވަތަ މަސައްކަތްކޮށްފައިވާ ވަކި ސިޔާސީ ފިކުރެއް އަޅުގަނޑުގެ މަސައްކަތުގައި ނުފޫޒެއް ނުފޯރުވޭނެ،" ޝަރީފް ވިދާޅުވި އެވެ.
ޝަރީފް ވިދާޅުވި ގޮތުގައި ރާއްޖޭގެ އޮފީހަކާއި އިލެކްޝަންސް ކޮމިޝަނާ ތަފާތެވެ. ސަބަބެއްގެ ގޮތުގައި އޭނާ ވިދާޅުވީ ކޮމިޝަން ހިންގުމުގެ ބާރު އެންމެ މެމްބަރަކަށް ނެތީމަ އެވެ. ކޮމިޝަންގެ ނިންމުންތަކަކީ އެ ކޮމިޝަންގެ ހުރިހާ މެމްބަރުން ބައިވެރިވެގެން ނިންމާ ނިންމުންތަކެއް ކަމަށް އޭނާ ވިދާޅުވި އެވެ.
"ކޮމިޝަންގެ ނިންމުންތައް ނިންމާނީ މެޖޯރިޓީއާ އެކުގައި. އަޅުގަނޑު ޔަގީންކޮށް އަރުވަނީ އަޅުގަނޑު އަބަދު ވެސް ވަކާލާތު ކުރާނީ އިލެކްޝަންސް ކޮމިޝަން މެމްބަރުންގެ ނަޒާހާތްތެރިކަމާއި މެމްބަރުން މަސައްކަތް ކުރުމަށް ކަނޑައެޅިފައިވާ އުސޫލުތަކާއި ގަވައިދުތަކާ އެއްގޮތަށް،" ޝަރީފް ވިދާޅުވި އެވެ.
ޝަރީފް ވިދާޅުވީ ކޮމިޝަންގެ ގާނޫނާއި ގަވައިދުތަކާ ހިލާފުވާ ފަދަ ކަމެއް ކުރޭތޯ ބެލުމަށް ސަރުކާރުގެ ކަމާ ބެހޭ ފަރާތްތައް ފާރަ އަށް އެބަތިބި ކަމަށެވެ. އަދި އެ ކަންކަން އެ ފަރާތްތަކުން ބަލަމުން ދާއިރު، މީޑިއާތަކުން އެކަން ބެލުމުގެ ފުރުސަތު އެބައޮތް ކަމަށް ވެސް ޝަރީފް ވިދާޅުވި އެވެ.
ރައީސް އަބްދުﷲ ޔާމީނާ ގާތް ގުޅުމެއް އޮންނަ ޝަރީފް ވިދާޅުވީ ކުރިން އޭނާ ވާހަކަ ދައްކަވަމުން ދިޔަ ގޮތަށް ނުވަތަ އެ ފިކުރެއްގައި މަސައްކަތް ކުރުން ލާޒިމް ނޫން ކަމަށެވެ. އެއީ ޝަރީފް ވިދާޅުވި ގޮތުގައި ގާނޫނާއި ގަވައިދުތަކެއްގެ "ފްރޭމްގަނޑެއްގެ ތެރެއިން" މަސައްކަތް ކުރަން މިހާރު ޖެހިފައިވުމުންނެވެ.
"އެ ފްރޭމްގަނޑުން ބޭރުނުވާހާ ހިނދު، އެ އޮންނަ ގާނޫނުތަކާއި ގަވައިދުތަކާ އެއްގޮތަށް މަސައްކަތް ކުރާ ކަމަށް ވާނަމަ، އަޅުގަނޑަކީ ވަކި ފަރާތަކަށް ނުޖެހޭ މީހެއްގެ ގޮތުގައި ބަލައިގަންނަން ޖެހޭނީ،" ނޫސްވެރިއަކު ކުރި ސުވާލެއްގެ ޖަވާބުގައި ޝަރީފް ވިދާޅުވި އެވެ.
އިލެކްޝަންސް ކޮމިޝަންގެ މެމްބަރު އަހުމަދު އަކްރަމް ވިދާޅުވީ މިނިވަން މުއައްސަސާތަކުގައި މަސައްކަތް ކުރައްވަނީ، ސިޔާސީ ބޭފުޅުންގެ ގޮތުގައި ކުރިން މަސައްކަތް ކުރެއްވި ބޭފުޅުން ކަމަށެވެ. އެކަމަކު، މިނިވަން މުއައްސަސާއެއްގެ މަގާމަކާ ހަވާލުވުމަށް ފަހު، މަސައްކަތް ކުރައްވަނީ ޕްރޮފެޝަނަލްކޮށް ކަމަށް ވިދާޅުވި އެވެ.
އަކްރަމް މިސާލެއްގެ ގޮތުގައި ނެންގެވީ އެމްޑީޕީގެ އިލެކްޝަންސް ކޮމިޓީގެ ޗެއާކަން ކުރެއްވުމަށް ފަހު، އެ ކޮމިޝަނާ ފުއާދު ތައުފީގް ހަވާލުވެވަޑައިގަތުމެވެ. އަދި އަކްރަމް ވެސް ކޮމިޝަންގެ މެމްބަރުކަން އަދާކުރައްވަމުން ގެންދަވަނީ އެމްޑީޕީގެ ޑެޕިއުޓީ ސެކްރެޓަރީ ޖެނެރަލް ކަން ދެ އަހަރެއްހާ ދުވަސް ވަންދެން ކުރެއްވުމަށް ފަހުގައި ކަން އޭނާ ފާހަގަކުރެއްވި އެވެ.
"އަޅުގަނޑުމެން މިތަނުގައި މަސައްކަތް ކުރާނީ އިންތިހާބު ވިޔަސް، އެހެން ކަންކަމުގައި ވިޔަސް، ރައްޔިތުންނަށް ލާބަ އާއި މަންފާ ހުރި ގޮތަކަށް ގާނޫނުތައް ތަންދޭ ގޮތެއްގެ މަތިން،" އަކްރަމް ވިދާޅުވި އެވެ.
ކުރިން ތިމަރަފުށީ ދާއިރާގެ މެމްބަރުކަން ވެސް ކުރައްވާފައިވާ، އަދި ތައުލީމީ ދާއިރާގެ އިސް މަގާމުތަކެއް ވެސް ފުރުއްވި ޝަރީފް އިލެކްޝަންސް ކޮމިޝަނަށް އައްޔަން ކުރުމާ ގުޅިގެން އިދިކޮޅު ފަރާތްތަކުން ދަނީ ފާޑު ކިޔަމުންނެވެ. އިދިކޮޅު ފަރާތްތަކުން ބުނި ގޮތުގައި ޝަރީފްގެ ބެލުމުގެ ދަށުން ހިންގާ ކޮމިޝަނުގެ މަސައްކަތްތައް ހިނގާނީ ވަކި ކޮޅަކަށް ބުރަވެގެންނެވެ. އަދި މި އަހަރު އޮންނަ ރިޔާސީ އިންތިހާބު އިންސާފުވެރިކަމާއެކު ބޭއްވޭނެ ކަމަށް ގަބޫލު ނުކުރާ ކަމަށް އެ ފަރާތްތަކުން ބުންޏެވެ.
ނަމަވެސް، ނޫސްވެރިންގެ ބައްދަލުވުމުގައި އީސީން ވަނީ ރިޔާސީ އިންތިހާބު މިނިވަން އަދި އިންސާފުވެރިވާނެ ކަމުގެ ޔަގީންކަން ރައްޔިތުންނަށް ދީފަ އެވެ.
ޝަރީފް ވިދާޅުވީ އެ ކޮމިޝަނުން މިހާރު އެންމެ ބޮޑު އިސްކަމެއް ދީގެން ކުރަމުން އަންނަ ކަމަކީ އިންތިހާބާ ބެހޭ ތަފާތު ގާނޫނުތަކަށް ރިކޮމެންޑް ކުރެވިފައި ހުރި ބައެއް އިސްލާހުތައް ގެނައުމެވެ. ނަމަވެސް، ގާނޫނުތަކަށް ގެންނަން އުޅޭ އިސްލާހުތަކުގެ ތަފްސީލެއް ޝަރީފް ނުދެއްވަ އެވެ.
އިލެކްޝަންސް ކޮމިޝަންގެ މެމްބަރުންގެ ގޮތުގައި މިހާރު ތިއްބަވަނީ ޝަރީފާއި އަކްރަމްގެ އިތުރުން ކޮމިޝަންގެ ނައިބު ރައީސް އަމްޖަދު މުސްތަފާ އާއި އިސްމާއިލް ހަބީބާއި މުހައްމަދު ޝަކީލެވެ. އީސީގެ މެމްބަރަކަށް ޝަރީފް އައްޔަން ކުރުމަށް ރައްޔިތުންގެ މަޖިލީހުން ފާސްކުރީ، މިއަދު ބޭއްވި އެ މަޖިލީހުގެ ޖަލްސާގައި ޕީޕީއެމް/އެމްޑީއޭ ކޯލިޝަންގެ 33 މެމްބަރުންގެ ވޯޓުންނެވެ.
ޝަރީފް އިލެކްޝަނަށް އައްޔަން ކުރީ އެ ކޮމިޝަންގެ ރައީސްގެ މަގާމުގައި ކުރިން ހުންނެވި އަހުމަދު ސުލައިމާން މިދިޔަ މަހު އިސްތިއުފާ ދެއްވުމުންނެވެ. ސުލައިމާން މިހާރު ވަނީ ނެޝަނަލް އިންޓެގްރިޓީ ކޮމިޝަން (އެންއައިސީ) ގެ ރައީސް ކަމަށް އައްޔަން ކޮށްފަ އެވެ.