އާންމު ނޫން ބައްޔެއް ޖެހިފައިވާ ކަމަށާއި އެ ބައްޔަށް ފަރުވާކުރަމުން އަންނަ ކަމަށް ބޮލީވުޑްގެ އެކްޓަރު އިރްފާން ހާން ބުނެފި އެވެ.
އޭނާ ކުރި ޓްވީޓެއްގައި ބުނީ ފާއިތުވި ދެ ހަފުތާއެއްހާ ދުވަހު އޭނާގެ ހަޔާތަށް ވަރަށް ބޮޑު ބަދަލެއް އައިސްފައިވާ ކަމަށެވެ. އަދި މިހާތަނަށް އެނގުނު ގޮތުގައި އާންމު ނޫން ބައްޔެއްގެ ޝިކާރައަކަށްވެފައިވާކަން އެނގިފައިވާ ކަމަށް ބުންޏެވެ.
ހޮލީވުޑްގައި ވެސް މަސައްކަތް ކުރާ ބޮލީވުޑްގެ މަދު އެކްޓަރުންގެ ތެރޭގައި ހިމެނޭ އިރްފާން، 51، ބުނީ އޭނާގެ ބައްޔާ ބެހޭ ގޮތުން އިތުރަށް ބަލަމުން އަންނަ ކަމަށާއި އޭނާގެ ބައްޔަކީ ކޮބައިކަން 10 ވަރަކަށް ދުވަހުގެ ތެރޭގައި ހިއްސާ ކުރާނެ ކަމަށެވެ. އިންޑިއާގެ އެންމެ ހުނަރުވެރި އެކްޓަރުންގެ ތެރޭގައި ހިމެނޭ އިރްފާން ބުނީ ހިތްވަރަށް އެއްވެސް ބަދަލެއް ނާންނަ ކަމަށާއި އާއިލާ އާއި ގާތް ރައްޓެހިން ތިބީ އޭނާއާ އެކުގައި ކަމަށެވެ.
ބައްޔަކަށް ފަރުވާ ހޯދަމުން އަންނަކަން އިރްފާން ހިއްސާކޮށްފައި ވަނީ އޭނާގެ އެންމެ ފަހުގެ ފިލްމް "ބްލެކްމެއިލް" ވެސް ރިލީޒް ކުރަން ތައްޔާރުވަމުން ދަނިކޮށެވެ.
އަންނަ މަހުގެ 6 ގައި ރިލީޒް ކުރަން ތާވަލްކޮށްފައިވާ ފިލްމްގެ ޑައިރެކްޓަރު އަބިނޭ ޑިއޯ ބުނީ "ބްލެކްމެއިލް" ގެ މަސައްކަތް ކުރަމުން ދިޔަ، އިރްފާނަށް އެއްވެސް ބައްޔެއް ޖެހިފައިވާކަމުގެ އަލާމާތެއް ފެނިފައި ނުވާ ނޭނގޭ އަދި އޭނާ ހިއްސާ ކުރި ވާހަކަތަކާ އެކު ބޮޑު ހައިރާން ކަމެއް ލިބިފައިވާ ކަމަށް އަބިނޭ ބުންޏެވެ.
އިރްފާންގެ ޓްވީޓާ ގުޅިގެން ބޮލިވުޑްގެ ވަރަށް ގިނަ ފަންނާނުން ވަނީ އޭނާ އަށް އަވަސް ޝިފާއަކަށް އެދި ޓްވީޓްކޮށް، ހިތްވަރު ވެސް ދީފަ އެވެ. އިރްފާނަކީ ފިރިހެން ދެ ކުދިންގެ ބައްޕައެކެވެ.