އެންސީއޭ އިން ބަލަހައްޓަމުން އައި އޮލިމްޕަސް ހިންގުން ޕަބްލިކް ސާވިސް މީޑިއާ (ޕީއެސްއެމް)ގެ ދަށަށް ބަދަލުކޮށް، ފިލްމު ދެއްކުމަށް އެތަން ކުއްޔަށް ދޭ އަގު 50 ޕަސެންޓް ކުޑަކޮށްފި އެވެ.
ޕީއެސްއެމް އިން މިއަދު ނެރުނު ބަޔާނުގައި ބުނީ ފިލްމު ދެއްކުމަށް ޝޯއަކަށް 4000ރ. ނަގަމުން އައި ނަމަވެސް އާދިއްތަ ދުވަހުން އެތަން ކުއްޔަށް ދޫކުރާނީ 2000ރ. އަށް ކަމަށެވެ.
އޮލިމްޕަހުގެ އެތެރެ ވަރަށް ބޮޑަށް ހަލާކުވެފައިވާ ކަމަށާއި އެހެންވެ މަރާމާތުކޮށް، ޒުވާނުންނަށް ހާއްސަ ވަސީލަތްތައް ތަނަވަސްކުރުމުގެ މަސައްކަތް ފަށާފަައިވާ ކަމަށް ޕީއެސްއެމް އިން ބުންޏެވެ.
"..މި ޒަމާނުގެ ކޮލެޓީގައި ފިލްމު ދެއްކުމަށް ބޭނުންކުރާ ޕްރޮޖެކްޓާ ވެސް ހަލާކުވެފައި ހުންނަތާ އެތައް މަހެއް ވެފައިވާތީ، ޕްރޮޖެކްޓަރާއި ސައުންޑް ސިސްޓަމް ޒަމާނީ ފެންވަރަށް ގެނައުމުގެ މަސައްކަތާއި އަދި ޒުވާނުންނަށް ހާއްސަ ވަސީލަތްތައް ތަނަވަސްކުރުމުގެ މަސައްކަތް، ޕީއެސްއެމުން މިހާރު ވަނީ ފަށައިފަ އެވެ. އަދި އޮންލައިންކޮށް އޮލިމް ޕަސް ބުކްކުރުމާއި ޓިކެޓު ގަތުުމުގެ ވަސީލަތްތައް ތަނަވަސްކުރުމުގެ މަސައްކަތް ވެސް މިހާރު ވަނީ ފަށައިފަ އެވެ،" ބަޔާނުގައި ބުންޏެވެ.
ހެނދުނާއި މެންދުރާއި ހަވީރު އަދި ރޭގަނޑު ވެސް ފިލްމު ދައްކާ ސިނަމާއެއްގެ ގޮތުގައި އޮލިމްޕަސް ބަދަލުކުރުމަކީ އުންމީދެއް ކަމަށާއި ދިވެހިންގެ މެދުގައި މަގުބޫލު އެކި ސަގާފަތްތަކާއި ބަސްބަހުގެ ފިލްމާއި ކުޑަކުދިންނަށް ހާއްސަ ފިލްމު ވެސް އޮލިމްޕަހުގައި އޭރުން ދައްކާނެ ކަމަށް ވެސް ޕީއެސްއެމުން ބުންޏެވެ.
ޒަމާނީ ފެންވަރަށް ތަރައްގީކޮށް ބޮޑު ބަދަލަކާ އެކު އޮލިމްޕަސް އަލުން ހުޅުވީ 2013 ވަނަ އަހަރު އެވެ. ނަމަވެސް މި ޒަމާނުގެ އެންމެ ރަނގަޅު ސައުންޑް ސިސްޓަމެއް ނެތުން ފަދަ ބައެއް ކަންކަން ނެތުމުން، ފިލްމު އުފައްދާ މީހުން އެ ކަންބޮޑުވުން ފާޅުކުރެ އެވެ.