ރަންބީރް ކަޕޫރް ސަންޖޭގެ ދަތުގެ ރޯލް ކުޅޭ ފިލްމްގެ ޓްރެއިލާ މިއަދު ދައްކާލައިފި އެވެ.
ޓީޒާއިން ސަންޖޭގެ އެކި ދުވަސްވަރު ދައްކަ އެވެ. އޭނާގެ އެންމެ ޒުވާން އުމުރުން ފެށިގެން ގޮސް، މިހާރު ހުރި ގޮތެވެ. "ސަންޖޫ" ގެ ނަން ދީފައިވާ މި ބައޮގްރަފިކަލް ޑްރާމާއަކީ ރާޖްްކުމާރް ހިރާނީ ލިޔެ، ޑައިރެކްޓްކޮށްފަައިވާ ފިލްމެކެވެ.
ޓީޒާ އިން ވެސް ފިލްމް ވަރަށް ޝައުގުވެރިވެފައި މަޖާ ވާނެ ކަމަށް ބެލެވެ އެވެ. އަދި ޓީޒާގެ ބައެއް މަންޒަރުތަކުގައި ރަންބީރު ސަންޖޭއާ ހަމަ ވަރަށް ވައްތަރެވެ. އަދި ވާހަކަ ދައްކާ ގޮތް ވެސް ވައްތަރެވެ. އެކަމަކު ފިލްމްގައި ހުރި ވަރެއް އެނގޭނީ ސިނަމާ އިން ބަލައިލަން ލިބޭ އިރަކުންނެވެ. ޓީޒާ އިން ސަންޖޭގެ ކެރެކްޓާ ނޫން ތަރިއެއް ނުދައްކާތީ، ދެން ހުރި ކެރެކްޓާތަކުގައި ކިހާ އެއްގޮތް ކަމެއް ހުންނާނެ ކަމެއް ނޭނގެ އެވެ.
ޖޫން މަހުގެ 29 ގައި ރިލީޒް ކުރާ "ސަންޖޫ" ގައި މަނީޝާ ކޮއިރަލާ ފެނިގެން ދާނީ ސަންޖޭގެ މަންމަ އަދި ކުރީގެ ބަތަލާ ނަރްގިސްގެ ރޯލުންނެވެ. ޕަރޭޝް ރާވަލް ކުޅެފައި ވަނީ ސަންޖޭގެ ބައްޕަ އަދި ކުރީގެ އެކްޓަރު ސުނިލް ދަތުގެ ރޯލެވެ. އަދި ދިއާ މިރްޒާ ފެނިގެން ދާނީ ސަންޖޭގެ މިހާރުގެ އަންހެނުން މަންޔަތާ ދަތުގެ ރޯލުންނެވެ.
"ސަންޖޫ" ގެ އިތުރު ކާސްޓުންގެ ތެރޭގައި ސޯނަމް ކަޕޫރް، އަނުޝްކާ ޝަރްމާ، ތައްބޫ، ވިކީ ކޯޝަލް، ޖިމް ސަރްބް އަދި ޓީވީ ބަތަލާ ކަރިޝްމާ ތަންނާ ހިމެނެ އެވެ.