ރަންބީރު ކަޕޫރް ސަންޖޫ ދަތުގެ ރޯލް ކުޅެފައިވާ ފިލްމް "ސަންޖޫ" ގެ ޓްރެއިލާ އަށް ކުރަމުން އައި އިންތިޒާރު މިއަދު ނިމުމަކަށް ގެނެސް ދީފި އެވެ.
އަންނަ މަހުގެ 29 ގައި ރިލީޒްކުރާ ފިލްމްގެ ޓްރެއިލާ އިން ސަންޖޭގެ ހަޔާތުގެ މުހިއްމު އެކި ސޮފުހާތައް ފެނިގެންދެ އެވެ. އޭގެ ތެރޭގައި އޭނާ 300 އެއްހާ ލޯބިވެރިން ގެންގުޅުނު ވާހަކަ އާއި މަސްތުވާތަކެތީގެ ޝިކާއަރަކަށްވި ވާހަކަ އާއި އޭކޭ 47ގެ ރައިފަލެއް ގެންގުޅެ، އޭގެ ސަބަބުން ކުރިމަތިވި ގާނޫނީ މައްސަލަތަކާއި އަންޑަވޯލްޑާ އޮތް ގުޅުމާއި އާއިލީ ގުޅުންތަކަށް ވެސް ޓްރެއިލާގެ ތެރެއިން ހިސާބަކަށް ވަނީ އަލިއަޅުވާލައިފަ އެވެ.
މިހާރު އުމުރުން 58 އަހަރުގެ ސަންޖޭގެ ރޯލް ކުޅެން ރަންބީރު ވަރަށް މަސައްކަތްކޮށްފައިވާކަން ޓްރެއިލާ އިން އެނގެ އެވެ.
މީގެ އެންމެ ހާއްސަ ކަމަކީ ބައްޕަ ސުނިލް ދަތު ޑައިރެކްޓް ކުރި ފިލްމް ރޮކީ (1981) އިން ބޮލީވުޑަށް ނުކުމެ، 2016 ވަނަ އަހަރުގެ ޖަލު ހުކުމް ތަންފީޒުކޮށް މިނިވަންވުމާ ހަމައަށް ސަންޖޭގެ ހަޔާތުގައި ހިނގާފައިވާ މުހިއްމު ކަންތައްތައް ޑައިރެކްޓަރު ރާޖްކުމާރް ހިރާނީ "ސަންޖޫ" ގައި ދައްކުވައި ދޭނެ ކަމެވެ.
ވަކިން ހާއްސަކޮށް ސަންޖޭގެ އެކި ދައުރުތަކުގައި އޭނާ ހުރި ސިފަ، ރަންބީރު ވަރަށް ވެސް ފުރިހަމަ އަށް ބޮޑު ސްކްރީނުން ދައްކުވައިި ދޭނެ އެވެ.
ފިލްމަށް އިންތިޒާރު ކުރެވޭ އެއް ސަބަބަކީ ވެސް އެއީ އެވެ. އަނެއްކޮޅުން މިއީ ފިލްމްގެ ޓެގް ލައިން "ވަން މޭން...މެނީ ލިވްސް" ގައި ބުނާހެން ސަންޖޭގެ ހަފަރާތް ބެލުންތެރިންނަށް ތަޖުރިބާކޮށްލަން ލިބޭނެ ފިލްމެކެވެ.
"ސަންޖޫ" ގެ ކާސްޓުންގެ ތެރޭގައި ސޯނަމް ކަޕޫރް، އަނުޝްކާ ޝަރްމާ، ޖިމް ސަރްބް، މަނީޝާ ކޮއިރަލާ، ވިކީ ކޯޝަލް، ޕަރޭޝް ރާވަލް، ދިއާ މިރްޒާ އަދި ޓީވީ ބަތަލާ ކަރިޝްމާ ތައްނާ ހިމެނެ އެވެ.
މި ފިލްމަކީ 2014 ގައި ބޮކްސް އޮފީހުގައި ރެކޯޑްތައް ހެދި އާމިރް ހާންގެ "ޕީކޭ" އަށް ފަހު ހިރާނީ ގެނެސްދޭ ފުރަތަމަ ފިލްމެވެ.
ހިރާނީއަކީ މިހާރު ބެލުންތެރިން އެންމެ އިތުބާރު ކުރާ އެއް ޑައިރެކްޓަރެވެ. އެހެންވެ އޭނާގެ ފިލްމެއްމަ މޮޅުވެފައި، ފުރިހަމަ ވާނެކަމާ ދޭތެރޭ އެއްވެސް މީހަކު ޝައްކެއް ނުކުރާނެ އެވެ.