ކަރީނާ ކަޕޫރް ދަރިފުޅު ތައިމޫރް ލިބުނު ފަހުން، ބޮޑު ސްކްރީނަށް އަންނަ ފުރަތަމަ ފިލްމް "ވީރޭ ދީ ވެޑިން" ގެ ޓްރެއިލާ މި ވަނީ ދައްކާލައިފަ އެވެ. ޗިކް ފްލިކްސްއެއްގެ ގޮތުގައި ސިފަކުރެވޭ ފިލްމްގެ ޓްރެއިލާ އަށް ގިނަ ބަޔަކު އެންމެ ބޮޑަށް އިންތިޒާރު ކުރި އެއް ސަބަބަކީ ކަރީނާ ފެންނާނެ ގޮތް ދެކިލުމެވެ. ތައިމޫރަށް ބަނޑުބޮޑުވެ، ވިހެއުމާ ހަމައަށް ކަރީނާ ހުރީ ވަރަށް ބޮޑަށް ފަލަވެފަ އެވެ.
އެކަމަކު "ވީރޭ ދީ ވެޑިން" ކުޅެން އޭނާ ވަނީ ހަށިގަނޑު ވަރަށް ބޮޑަށް ހިއްކާލައި "ޒީރޯ ފިގާ" އެކޭ ބުނާހާ ވަރަށް ލޫޅާފަތިވެފަ އެވެ. ފިލްމްގެ ޓްރެއިލާ އިން ވެސް އެ ބަދަލު ފެނެ އެވެ.
"ވީރޭ ދީ ވެޑިން" އަކީ ސޯނަމާއި ފަވާދް ހާން 2014 ގައި ކުޅުނު ކާމިޔާބު ފިލްމް "ހޫބްސޫރަތު" ގެ ޑައިރެކްޓަރު ޝަޝަންކާ ގޯޝް ޑައިރެކްޓްކޮށްފައިވާ ފިލްމެވެ.
ކަރީނާ އެކު، ފިލްމްގެ މުހިއްމު ރޯލްތަކުން ސޯނަމް ކަޕޫރް، ސްވަރާ ބާސްކަރް އަދި ޝިކާ ތަލްސާނިއާ ފެނިގެން ދާނެ އެވެ. މި ފިލްމުގައި މި މީހުންގެ ފަރިކަމާއި ތުއިކަން ފެންނާނެ އެވެ. އަދި ހަމަމިއާ އެކު، މިއީ އަނެއްކާ ވެސް ފެޝަންގެ އާ ޓެރެންޑެއް ވެސް ގެނެސް ދޭނެ ފިލްމެއް ކަމަށް ގަބޫލުކުރެވެ އެވެ. ކަރީނާ އާއި ސޯނަމް ފަދަ ބަތަލާއިންނަކީ އެކްޓިން އަށް ވުރެ ބޮޑަށް ރީތި ކޮސްޓިއުމްތަކަށް ސަމާލުކަން ދޭ ބަތަލާއިންނެވެ.
މިއީ މި ޒަމާނުގެ އަންހެނުންތަކެއްގެ ވާހަކަ ކިޔައިދޭ ފިލްމެކެވެ. މި ފިލްމުން، މަޝްހޫރު އެއްވެސް ބަތަލަކު ނުފެންނާނެ އެވެ. މީގައި ކަރީނާގެ ލޯބިވެރިޔާގެ ރޯލު ކުޅޭނީ ޓީވީ އެކްޓަރު އަދި މިހާރު ފިލްމްތަކުން ވެސް މަދުމަދުން ފެންނަ ސުމީތު ވިޔާސް އެވެ.
ސޯނަމްގެ ކޮއްކޮ ރިއާ ކަޕޫރާއި އެކްތާ ކަޕޫރް ގުޅިގެން ގެނެސްދޭ މި ފިލްމު ސިނަމާތަކަށް އަންނާނީ ޖޫން މަހުގެ 1 ގަ އެވެ.