މިދިޔަ ޖޫން މަހު ރިލީޒް ކުރި "ވީރޭ ދީ ވެޑިން" ކުޅެވުނީތީ އުފާވާ ކަމަށާއި އެއީ މީގެ ކުރިން ފިލްމެއްގައި ނުކުޅޭ ކަހަލަ ތަފާތު ރޯލެއް ވެސް ކުޅެން ލިބުނު ފިލްމެއް ކަމަށް ބަތަލާ ކަރީނާ ކަޕޫރު ބުނެފި އެވެ.
ފިލްމުގައި ހިމެނޭ ބައެއް މަންޒަރުތަކާއި ޑައިލޮގްތަކަށް ވަރަށް ބޮޑަށް ފާޑު ކިޔުންތައް އަމާޒުވި ނަމަވެސް ކަރީނާ ބުނި ގޮތުގައި މި ފިލްމަށް ބެލުންތެރިން ވަރަށް ގަޔާވި އެވެ.
"އެ ފިލްމު ކުޅެން އެއްބަސްވުމަކީ އަހަންނަށް ނިންމުނު ވަރަށް ރަނގަޅު ނިންމުމެއް. އަހަރެން ގަބޫލުކުރާ ގޮތުގައި އެއީ މީގެ ކުރިން އަހަރެން ނުކުޅޭ ކަހަލަ ރޯލެއް ވެސް ކުޅެން ލިބުނު ފިލްމެއް،" ދަރިފުޅު ތައިމޫރު ވިހެއުމަށް ފަހު، ކުޅުނު ފުރަތަމަ ފިލްމާ ބެހޭ ގޮތުން ކަރީނާ ބުންޏެވެ.
އޭނާ ބުނި ގޮތުގައި އާންމުކޮށް އެކްޓަރުންނަށް ހާއްސަކޮށްފައި ހުންނަ ފިލްމުތަކާ ހިލާފަށް "ވީރޭ ދީ ވެޑިން" އަކީ ހަޔާތުގެ އެކި މަރުހަލާތަކުގައި އަންހެން ހަތަރު ރައްޓެއްސަކަށް ދިމާވާ ކަންތައްތަކެއް ކިޔައިދިން ފިލްމަކަށްވާތީ މިއީ ބޮލީވުޑަށް ތަފާތެއް ވެސް ގެނުވައި ދިން ފިލްމެކެވެ.
"މީގެ ސްކްރިޕްޓް ކިޔާލި ހިސާބުން ވެސް އަހަންނަށް އެނގުނު ފިލްމު ހިނގާނެކަން. އެކަމަކު ފުރަތަމަ މިއަށް އެއްބަސްވާން ޖެހިލުންވި. ސަބަބަކީ މީގެ ކޮންސެޕްޓް ތަންކޮޅެއް ބޯލްޑްވީމަ،" ކަރީނާ ބުންޏެވެ. "އަހަރެން ބުނާނީ މި ފިލްމު ބެލުންތެރިންނަށް އެހާ ކަމުދިޔައީ މުޅި ޓީމް މިއަށް ކޮށްފައި ހުރި މަސައްކަތްތައް ރަނގަޅުވީމައޭ. ވަކިން ހާއްސަކޮށް ޑައިރެކްޓަރު ޝަޝަންކާ ގޯޝް ވަނީ ވަރަށް ވެސް ފުރިހަމަ ފިލްމެއް ގެނެސް ދޭން މަސައްކަތްކޮށްފައި."
އެކްތާ ކަޕޫރާއި ރިއާ ކަޕޫރް ޕްރޮޑިއުސްކޮށް ޖޫން 1 ގައި ރިލީޒް ކުރި "ވީރޭ ދީ ވެޑިން" ގެ މުހިއްމު ރޯލުތައް ކުޅުނީ ކަރީނާގެ އިތުރުން ސޯނަމް ކަޕޫރް، ސްވަރާ ބާސްކާރް އަދި ޝިކާ ތަލްސާނިއާ އެވެ.
މި އަހަރުގެ އެންމެ ވިޔަފާރި ރަނގަޅު ފިލްމުތަކުގެ ތެރޭގައި ހިމެނުނު މި ފިލްމަށް ބޮކްސް އޮފީހުގައި ޖުމްލަ 138.80 ކްރޯޑް ރުޕީސްގެ އާމްދަނީއެއް ލިބުނު އިރު، ފިލްމު ހަދަން ހޭދަ ކުރީ 42 ކްރޯޑް ރުޕީސް އެވެ.
"ވީރޭ ވީ ވެޑިން" ގެ ކާމީޔާބީއާ ގުޅގެން މި ފިލްމުގެ ދެވަނަ ބައެއް ހަދަން ވެސް ވަނީ ނިންމައިފަ އެވެ.
ކަރީނާގެ ކުރިއަށް ހުރި ފިލްމުތަކުގެ ތެރޭގައި ހިމެނެނީ "ގުޑް ނިއުސް" އާއި "ތަހުތު" އެވެ.