ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ ޕޮލިޓިކަލް އެޑްވައިޒަރަކަށް އަލީ ވަހީދު ހަމަޖައްސައިފި އެވެ.
އެމްޑީޕީން ވަކިވެ، އަލީ ވަހީދު ޖުމްހޫރީ ޕާޓީއާ ގުޅިވަޑައިގަތް ކަން އިއުލާންކުރެއްވީ ޖަރުމަނުގައި ގާސިމާ އެކު ބޭއްވި ޖަލްސާގަ އެވެ. އަލީ ވަހީދުގެ އިތުރުން ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދަކީ ވެސް ގާސިމްގެ އެޑްވައިޒަރެކެވެ.
ގާސިމް ކުރެއްވި ޓުވީޓެއްގައި އަލީ ވަހީދަށް މަރުހަބާ ދަންނަވައި ވިދާޅުވީ، އޭނާ ޖުމްހޫރީ ޕާޓީއާ ގުޅިވަޑައިގަތުމަކީ ލިބުނު ވަރަށް ބޮޑު އުފަލެއް، އަދި ހިތްވަރެއް ކަމަށެވެ. ޕޮލިޓިކަލް އެޑްވައިޒަރުގެ މަގާމުގައި، ޖޭޕީ އަށް އިތުރު ބުންވަރާއި ޖޯޝް އަލީ ވަހީދު ގެނުވާނެ ކަމަށް ވެސް ގާސިމް ވިދާޅުވި އެވެ.
އަލީ ވަހީދު ސިޔާސީ ދާއިރާ އަށް ނުކުންނެވީ، ކުރީގެ ރައީސް މައުމޫން އަބްދުލްގައްޔޫމްގެ ފަހަތްޕުޅުގަ އެވެ. އެ ޕާޓީން ވަކިވެ، އެމްޑީޕީއާ ގުޅިވަޑައިގަތްއިރު، އޭނާ އަކީ ރައްޔިތުންގެ މަޖިލީހުގެ ތޮއްޑޫ ދާއިރާގެ މެމްބަރެވެ. އޭގެ ފަހުން އެމްޑީޕީގެ ޗެއާޕާސަން ކަމަށް އިންތިހާބުވެވަޑައިގެން ސިޔާސީ ގޮތުން އިސްކޮށް ހަރަކާތްތެރިވެވަޑައިގެންނެވި އަލީ ވަހީދު އެ ޕާޓީ ދޫކޮށްލެއްވީ، ލީޑަޝިޕާ އުފެދުނު ޚިޔާލު ތަފާތުވުންތަކުގަ އެވެ.
އޭރު އޭނާ ހުންނެވީ، މެއި، 1، 2015 ގައި ސަރުކާރާ ދެކޮޅަށް އިދިކޮޅު ފަރާތްތަކުން ކުރި މުޒާހަރާއާ ގުޅިގެން ޓެރަރިޒަމްގެ ދައުވާ އުފުލުމުން، އަމިއްލަ އަށް އަރުވާލެވިގެން އިނގިރޭސިވިލާތުގަ އެވެ.
އަލީ ވަހީދު ރޭ ވިދާޅުވި ގޮތުގައި ރާއްޖެ އަށް ބޭނުންވަނީ ބައިބައި ވެފައި އޮތް އިޖުތިމާއީ ފޭރާން މެދަށް ގެނެސް، އަމުނާލެވޭނެ ވެރިކަމެކެވެ. ރައްޔިތުންގެ ފިކުރާއި ހިޔާލާތަށް ތަސައްލީއެއް ގެނެވޭނީ ޖޭޕީ އަށް ކަމަށް އޭނާ ވިދާޅުވި އެވެ.
ގާސިމަށް ތައުރީފް ކުރައްވައި އަލީ ވަހީދު ވިދާޅުވެފައި ވަނީ މިހާރު އަމަލު ކުރަމުން އަންނަ ގާނޫނުއަސާސީގެ ފުރިހަމަ މިނިވަންކަން ރައްޔިތުންނަށް ގެނެސް ދިނުމުގައި އެންމެ ބޮޑަށް މަސައްކަތް ކުރެއްވީ ވެސް ގާސިމް ކަމަށެވެ. ސިޔާސީ ގޮތުން ގާސިމް ވެވަޑައިގެންނެވި ގުރުބާނީތަކާއި ގައުމަށް ކުރެއްވި ޚިދުމަތްތަކަށް ބަލާއިރު، "އެންމެ އިސް ތާޖު" ހައްގު ވަނީ ވެސް ގާސިމަށް ކަމަށް ވިދާޅުވި އެވެ.