ރާއްޖޭގެ ވެރިންނަށް ފިޔަވަޅު އަޅާނެ ގޮތުގެ ފްރޭމްވޯކެއް އީޔޫން ފާސްކޮށްފި

ހާލަތު މިހާރަށް ވުރެ ރަނގަޅު ނުވާ ނަމަ، ރާއްޖޭގެ ވެރިންނަށް ދަތިކުރުމުގެ ފިޔަވަޅު އަޅާނެ ގޮތުގެ އޮނިގަނޑެއް ޔޫރަޕިއަން ޔޫނިއަން (އީޔޫ) ގެ ފޮރިން އެފެއާޒް ކައުންސިލުން މިއަދު ފާސްކޮށްފި އެވެ.

މި އޮނިގަނޑުގައި ބުނާ ކަންކަން، އީޔޫން ކަނޑައަޅާ މުއްދަތުތަކުގެ ތެރޭގައި ރާއްޖެ އިން ނުކުރާ ނަމަ، އެކި ގައުމުތަކުގައި ހުރި، ރާއްޖޭގެ ވެރިންގެ މުދާތައް ހިފަހައްޓައި، ޔޫރަޕްގެ އެކި ގައުމުތަކަށް ދަތުރުކުރުން މަނާ ކުރުން ފަދަ ފިޔަވަޅުތައް އަޅާނެ ކަމަށް އޭގައި ވެ އެވެ.

އީޔޫ ކައުންސިލުން ދިވެހި ސަރުކާރަށް މިއަދު ގޮވައިލީ ސިޔާސީ އިދިކޮޅު ލީޑަރުން ބައިވެރިވެވޭ ގޮތަށް މަޝްވަރާތައް ފެށުމަށާއި ދެ ފުށް ފެންނަ، މިނިވަން އިންސާފުވެރި ރިޔާސީ އިންތިހާބެއް ބޭއްވުމަށެވެ. އަދި ރާއްޖޭގެ ކަންކަން ރަނގަޅު ނުކުރާ ނަމަ، ވެރިންނަށް ދަތިކުރުމުގެ ފިޔަވަޅު އަޅާނެ ކަމަށް ކައުންސިލުން ބުންޏެވެ.

އީޔޫގެ ކައުންސިލުން ކުރިން ނިންމާފައި އޮތީ މިއަދުގެ ބައްދަލުވުމުގައި، ރާއްޖޭގެ ބައެއް އިސް ވެރިންނާއި ސަރުކާރަށް އެހީތެރިވާ ވިޔަފާރިވެރިންތަކެއްގެ އިތުރުން ބައެއް މުއައްސަސާތަކުގެ ވެރިންނަށް ފިޔަވަޅު އަޅާ ގޮތަށެވެ. އެކަމަކު، މިއަދުގެ ބައްދަލުވުމުގައި އެ ނިންމުން ބަދަލުކޮށް، ރާއްޖޭގެ އެއްވެސް މީހަކާ މެދު ފިޔަވަޅު އެޅުމަށް އަދިއެއް ނުނިންމަ އެވެ. އަދި، ކުރިން ފިޔަވަޅު އަޅަން ނިންމި ކަމަށް ބުނާ، ސަރުކާރުގެ އިސް ވެރިންގެ ލިސްޓު ވެސް އީޔޫގެ ކައުންސިލްގައި މިއަދު ފާހެއް ނުކުރެ އެވެ.

އީޔޫގެ ކައުންސިލްގެ ބައްދަލުވުމެއް ދެން ބާއްވާނީ ދެ މަސް ދުވަހުގެ ޗުއްޓީއަކަށް ފަހު އެވެ. ބެލެވޭ ގޮތުގައި، ދެ މަސް ފަހުން ބާއްވާ ބައްދަލުވުމުގައި ރާއްޖޭގެ ހާލަތު މިހާރަށް ވުރެ ރަނގަޅު ނުކުރާ ނަމަ، އީޔޫ އިން ރާއްޖޭގެ ވެރިންގެ ލިސްޓެއް އެކުލަވާލައި އެމީހުންނާ ދެކޮޅަށް ފިޔަވަޅު އެޅުން ގާތެވެ.

ކުރިން އީޔޫ އިން ސަރުކާރަށް ހުށަހެޅި ކަންކަން:

- ރާއްޖޭގައި އިއުލާނު ކުރި ކުއްލި ނުރައްކަލުގެ ހާލަތު ވަގުތުން އުވާލުމަށާއި ރައްޔިތުންގެ ހިފަހައްޓާފައިވާ ހުރިހާ ހައްގުތަކެއް ގާނޫނުއަސާސީގައި ވާ ގޮތަށް ކަށަވަރު ކޮށްދިނުން.

- ހައްޔަރުކޮށްފައިވާ އަދި ހުކުމްކޮށްފައިވާ ސިޔާސީ ބޭފުޅުން ވަގުތުން މިނިވަން ކުރުން.

- ރައްޔިތުންގެ މަޖިލީހުގެ 12 މެމްބަރުންގެ ވާޖިބަށް ހުރަސް ނޭޅުމަށާއި ރައްޔިތުންގެ މަޖިލީހާއި ޝަރުއީ ދާއިރާ އާއި މިނިވަން މުއައްސަސާތައް، ގާނޫނުއަސާސީގައިވާ ގޮތަށް މިނިވަންކަމާ އެކު ހިންގަން ފެށުން.

- ޑިމޮކްރަސީގެ މަގަށް ރާއްޖެ އަލުން އިއާދަވުމަށް، ސަރުކާރުން ޕާޓީތަކާ އެކު މަޝްވަރާތައް ފެށުން.

ފިޝަރީޒް މިނިސްޓަރު އަދި އީޔޫގެ ނިންމުންތަކާ ގުޅޭ ގޮތުން ސަރުކާރުގެ ފަރާތުން އިސްވެ ލޮބީ ކުރެއްވި ޑރ. މުހައްމަދު ޝައިނީ "މިހާރު" އަށް އިއްޔެ ވިދާޅުވީ ރާއްޖޭގެ އިސް ބައެއް ވެރިންނާ ދެކޮޅަށް ދަތިކުރުމުގެ ފިޔަވަޅު އެޅިޔަ ނުދޭން ކުރެވުނުހާ މަސައްކަތެއް ކުރެއްވި ކަމަށެވެ.

ޝައިނީ ވިދާޅުވި ގޮތުގައި ރާއްޖޭގައި މި އަހަރު ރިޔާސީ އިންތިޚާބެއް ނުބާއްވަން މަސައްކަތް ކުރާ ކަމަށް ބުނެ އީޔޫގެ ގައުމުތަކަށް އިދިކޮޅު ފަރާތްތަކުން ވަނީ ދޮގު މައުލޫމާތު ދީފަ އެވެ. އެއާ އެކު، އިންތިޚާބަށް ކުރިމަތިލާ ކޮންމެ މީހަކު ވެސް ޖަލަށް ލާނެ ކަމަށް އިދިކޮޅު ފަރާތްތަކުން އީޔޫގައި ބުނެފައިވާ ކަމަށް ޝައިނީ ވިދާޅުވި އެވެ. ޝައިނީ ވިދާޅުވި ގޮތުގައި ރާއްޖޭގެ މައްސަލަ އެޖެންޑާ އަށް ލީ ދޮގު ވާހަކަ ފަތުރައިގެންނެވެ.

ރާއްޖޭގެ އިސް ވެރިންނާ މެދު ފިޔަވަޅު އަޅަން މި ނިންމީ، ރާއްޖޭގައި އިންސާނީ ހައްގުތައް ގެއްލޭ ގޮތަށް ހިންގާ އަމަލުތައް ހުއްޓާލައި، ޑިމޮކްރަސީގެ މަގަށް ރުޖޫއަވުމަށް އަންގައި މިދިޔަ ފެބުރުއަރީ މަހުގެ ތެރޭގައި އީޔޫގެ ކައުންސިލުން ފާސްކުރި ގަރާރާ ގުޅިގެންނެވެ. ރާއްޖެއާ ދެކޮޅަށް ގަރާރު ފާސްކުރި އީޔޫގެ ކައުންސިލަކީ ގައުމުތަކުގެ އިސް ވެރިން ނުވަތަ އެ ބޭފުޅުންގެ މަންދޫބުން ތިއްބަވާ، އީޔޫގެ އެންމެ ބާރުގަދަ ތަނެވެ.

އެ ގަރާރުގައި ވަނީ، އިސްލާހު ކުރަން ރާއްޖެ އަށް ހުށަހަޅާ ކަންކަން ނުކޮށްފި ނަމަ، ރާއްޖޭގައި އިންސާނީ ހައްގުތައް ގެއްލޭ ގޮތަށް ހިންގާ އަމަލުތަކުގައި ބައިވެރިވާ، ސަރުކާރުގެ ވެރިންނާއި ދިވެހި ސަރުކާރާ ގުޅިފައި ތިބި ވިޔަފާރިވެރިންނާ މެދު ފިޔަވަޅު އެޅުމަށް އީޔޫ އިން ފާސް ކުރި ގަރާރުގައި ވެސް ހިމަނާފައިވެ އެވެ.