ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަދި ގާނޫނީ ވަކީލް އަލީ ހުސައިން ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އަށް ހާޒިރުވާން އަންގައިފި އެވެ.
މާދަމާ ހެނދުނު ޑީޖޭއޭ އަށް ހާޒިރުވާން އަންގައި، އަލީ ހުސައިނަށް މިއަދު ފޮނުވި ލިޔުމުގައިވަނީ އޭނާ ހާޒިރު ކުރަނީ ސުޕްރީމް ކޯޓުގެ ބޭނުމަކަށް ކަމަށެވެ. އެކަމަކު އޭނާ ހާޒިރު ކުރަނީ ކޮން ކަމަކާ ގުޅިގެން ކަމެއް ސާފެއް ނުވެ އެވެ.
މީގެ ކުރިން އަލީ ހުސައިން ދެއްކެވި ބައެއް ވާހަކަތަކާ ގުޅިގެން ދެ ފަހަރެއްގެ މަތިން އޭނާ ސަސްޕެންޑް ކޮށްފައިވެ އެވެ.
އަލީ ހުސައިން މާދަމާ ޑީޖޭއޭ އަށް ހާޒިރުވާން އެންގިއިރު، ކުރީގެ ބަންޑާރަ ނައިބު ހުސްނުއް ސުއޫދު ހަތަރު މަހަށް ސަސްޕެންޑް ކުރަން މިއަދު ވަނީ ނިންމައިފަ އެވެ. ސުއޫދު ސަސްޕެންޑް ކުރީ މިދިޔަ މަހު އޭނާ ކުރެއްވި ޓްވީޓަކާއި އޭނާއާ ހަވާލާދީ މީޑިއާއެއްގައި ލިޔުނު ޚަބަރަކާ ގުޅިގެންނެވެ.