ފޮރިން މިނިސްޓަރު އިންޑިއާ ދަތުރަށް ފަހު، އަބޫދާބީ އަށް

ފޮރިން މިނިސްޓަރު އަބްދުﷲ ޝާހިދު އިންޑިއާ އަށް ކުރެއްވި ރަސްމީ ދަތުރުފުޅަށް ފަހު، މިރޭ އަބޫދާބީ އަށް ވަޑައިގަންނަވާ ގޮތަށް ހަމަޖައްސަވައިފި އެވެ.

މިނިސްޓަރުގެ ހައިސިއްޔަތުން ފުރަތަމަ ދަތުރުފުޅު އިންޑިއާ އަށް ކުރައްވައި، ދެ ގައުމުގެ ގުޅުން ބަދަހިކުރުމާ ގުޅޭ މަޝްވަރާތައް ކުރެއްވި އެވެ. މި ދަތުރަށް ފަހު މިރޭ އަބޫދާބީ އަށް ކުރައްވަނީ ވެސް ރަސްމީ ދަތުރުފުޅެކެވެ.

ކާމިޔާބު ދަތުރަކަށް ފަހު އަބޫދާބީ އަށް ވަޑައިގަންނަވާ ކަން މިނިސްޓަރު ޓުވީޓް ކުރައްވާފައިވީ ނަމަވެސް ތަފްސީލެއް ނުދެއްވަ އެވެ.

މިނިސްޓަރު ޝާހިދު އަބޫދާބީ އަށް ވަޑައިގަންނަވާއިރު، މާފަރު އިންޓަނޭޝަނަލް އެއާޕޯޓް ހަދަނީ ޔޫއޭއީގެ އަބޫދާބީ ފަންޑުން ސަރުކާރަށް ދިން 60 މިލިއަން ޑޮލަރު (927 މިލިއަން ރުފިޔާ) އިންނެވެ.

މާފަރު އެއާޕޯޓު ތަރައްގީ ކުރަން ނިންމާފައި ވަނީ ޓްރާންސިޓް ހޮޓަލަކާއި ރިސޯޓެއް ވެސް ހިމެނޭ ގޮތަކަށެވެ. އަދި އެއާޕޯޓަށް އެއްފަހަރާ ހަ ޖެޓަށް ހިދުމަތް ދެވޭ އިރު އެންމެ ޒަމާނީ ވަސީލަތްތައް ހުންނާނެ އެވެ. މާފަރު އެއާޕޯޓަށް މިދިޔަ އޯގަސްޓް، 14ގައި، ވަނީ ޓެސްޓް ފްލައިޓު ޖައްސައިފަ އެވެ. އަދި މިއަހަރު ފަހު ކޮޅު މާފަރަށް ޝެޑިއުލް ފްލައިޓްތައް ފަށާނެ ކަމަށް ރީޖަނަލް އެއާޕޯޓްސް އިން ވަނީ ބުނެފަ އެވެ. މީގެއިތުރުން، ހަތް މިލިއަން ފަސެންޖަރުންނަށް ހިދުމަތް ދޭ ގޮތަށް، ލޯނު ނަގައިގެން ތަރައްގީ ކުރާ ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލަށް 680 މިލިއަނަށް ވުރެ ގިނަ ރުފިޔާ ލިބޭނެ ކަމަށް ލަފާކޮށްފައިވާއިރު، އޭގެތެރޭގައި އަބޫދާބީ ފަންޑުން 188.6 މިލިއަން ރުފިޔާ ހިމެނެ އެވެ.