ޑައިރެކްޓަރު ރާޖްކުމާރު ހިރާނީގެ މައްޗަށް ކުރި ޖިންސީ ގޯނާގެ ތުހުމަތާ ގުޅިގެން، ޕްރޮޑިއުސަރު/ޑައިރެކްޓަރު ވިދޫ ވިނޯދު ޗޯޕްޅާ ޑައިރެކްޓް ކުރަން ނިންމާފައި އޮތް ފިލްމުގެ މަސައްކަތް ހުއްޓުމަކަށް އައިސްފައިވާ ކަމަށް މީޑިއާތަކުން ބުނެފި އެވެ.
މި ފިލްމު ހަދަން ނިންމާފައި އޮތީ ހިރާނީ ވެސް ހިއްސާވާ ވިދޫ ވިނޯދް ޗޯޕްޅާ (ވީވީސީ) ފިލްމްސް އާއި ފޮކްސް ސްޓާ ސްޓޫޑިއޯ ގުޅިގެންނެވެ. މި ދެ ސްޓޫޑިއޯ ގުޅިގެން ތިން ފިލްމެއްގެ އެއްބަސްވުން ހަދާފައިވާ އިރު، އޭގެ ތެރެއިން އެއް ފިލްމަކީ ވިންދޫ ޑައިރެކްޓް ކުރާ ފިލްމެކެވެ.
އަނެއް ދެ ފިލްމުގެ ތެރެއިން ފުރަތަމަ ފިލްމު އަދި ހިރާނީ ޑައިރެކްޓް ކުރި "ސަންޖޫ" މިދިޔަ އަހަރު ރިލީޒްކޮށްފައިވާ އިރު، ދެވަނަ ފިލްމަކީ އަންނަ މަހުގެ 1 ގައި ރިލީޒްކުރާ "އޭކް ލަޅްކީ ކޮ ދޭކާ ތޮ އޭސާ" ލަގާ" އެވެ. ހިރާނީގެ ބޮލުގައި އެޅުނު ޖިންސީ ތުހުމަތާ އެކު، ވީވީސީ ފިލްމްސް އަށް ކުރިމަތިވި ޕްރެޝަރުތަކާ ގުޅިގެން، އެ ފިލްމުގެ ކްރެޑިޓުން ވެސް އޭނާގެ ނަން ވަނީ އުނިކޮށްފަ އެވެ.
ފޮކްސް ސްޓާގެ އޮފިޝަލަކާ ހަވާލާދީ ބޮލީވުޑް ލައިފުން ބުނި ގޮތުގައި ވިންދޫ ޑައިރެކްޓް ކުރާ ފިލްމުގައި ހިރާނީގެ ބައިވެރިވުން އޮންނަ ގޮތަކަށް ކުރިއަށް ގެންދާކަށް އެ ސްޓޫޑިއޯ އިން ތާއީދެއް ނުކުރެ އެވެ. އެހެންވެ އެއް ގޮތަކީ ހިރާނީގެ މައްޗަށް ކުރެވުނު ޖިންސީ ފުރައްސާރައިގެ ތުހުމަތުން އޭނާ ބަރީއަވެ، ކުށެއް ނެތްކަން ސާބިތު ވަންދެން މަޑުކުރުމެވެ. އަނެއް ގޮތަކީ ފޮކްސް ސްޓާ ހިއްސާ ނުވާ ގޮތަށް ވިންދޫ ފިލްމު ހެދުމެވެ.
ނަމަވެސް ހިރާނީ އާއި ފޮކްސް ސްޓާގެ ވެސް ހިއްސާ އޮވެގެން ނޫނީ ފިލްމު ނަހަދަން ވިދޫ ބޭނުން ނުވާތީ މި ވަގުތު އޭގެ މަސައްކަތް ކުރިއަށް ނުގެންދަން ވަނީ ނިންމައިފަ އެވެ. ވިންދޫއަކީ ވަރަށް ރީތި އެހާމެ މޮޅެތި ފިލްމުތަކެއް ބެލުންތެރިންނަށް ގެނެސް ދިފައިވާ ޑައިރެކްޓަރެކެވެ. އޭގެ ތެރޭގައި ޕަރިންދާ (1989)، 1942: އަ ލަވް ސްޓޯރީ (1994) އަދި މިޝަން ކަޝްމީރު (2000) ހިމެނެ އެވެ. އޭނާ އެންމެ ފަހުން ޑައިރެކްޓް ކުރި ހިންދީ ފިލްމަކީ 2007 ގެ "އެކްލަވިޔާ" އެވެ.
ވިދޫ، 66، އެންމެ ފަހުގެ ޑައިރެކްޝަނަކީ 2015 ގެ ހޮލީވުޑް ފިލްމު "ބްރޯކެން ހޯސެސް" އެވެ.
"ޕީކޭ" އާއި "3 އިޑިއަޓްސް" ފަދަ ފިލްމުތައް ގެނެސް ދިން ހިރާނީގެ މައްޗަށް ޖިންސީ ގޯނާގެ ތުހުމަތު ކުރުމާ ގުޅިގެން އޭނާ މި އަހަރު ޝޫޓިން ފަށަން ތައްޔާރުވަމުން ދިޔަ "މުންނާ ބާއީ" ސީރީޒްގެ ތިން ވަނަ ފިލްމުގެ ވެސް ވަނީ މަޑު ޖައްސާލައިފަ އެވެ.
ހިރާނީ، 56، އަށް "ސަންޖޫ" ގައި އެސިސްޓަންޓެއްގެ ގޮތުގައި މަސައްކަތް ކުރި އަންހެނަކު ޖިންސީ ގޯނާގެ ތުހުމަތު އެޅުވުމުން މުޅި ބޮލީވުޑަށް ޝޮކެއް ލިބި، ގިނަ ފަންނާނުން ވަނީ އެ ވާހަކަ ގަބޫލު ކުރަން ދަތި ކަމަށް ބުނެފަ އެވެ.
ސަބަބަކީ އޭނާއަކީ ބޮލީވުޑްގެ ޑައިރެކްޓަރުންގެ ތެރެއިން އެންމެ ޑިސިޕްލިންގެ އެކެއްގެ ގޮތުގައި ގިނަ ބަޔަކަށް ފާހަގަ ކުރެވިފައި އޮތުމެވެ. އެހެންވެ ހިރާނީ އެކަހަލަ ދަށު ދަރަޖައިގެ އަމަލެއް އޭނާއާ އެކު މަސައްކަތް ކުރި މީހަކާ ދޭތެރޭ ހިންގާނެ ކަމަށް ނުބެލެވޭ ކަމަށް ގިނަ ބޮލީވުޑްގެ ގިނަ ފަންނާނުންތަކެއް ބުނެފައިވެ އެވެ.