ރާއްޖޭގައި ވަޒީފާ އަދާކުރުމަށް ބިދޭސީންނަށް ދޫކުރާ އެމްޕްލޯއިމަންޓް އެޕްރޫވަލްގެ ހިދުމަތް ދިނުން ވެސް އިކޮނޮމިކް މިނިސްޓްރީގެ ދަށަށް ބަދަލުކޮށްފި އެވެ.
އެ މިނިސްޓްރީން ބުނިގޮތުގައި އިމިގްރޭޝަނުން ކުރިން ދިން މި ހިދުމަތް މާދަމާއިން ފެށިގެން ދޭނީ، ހުރަވީ ބިލްޑިންގެ ތިން ވަނަ ބުރީގައި ހުންނަ އެތަނުގެ އޮފީހުންނެވެ.
ރާއްޖޭގައި ވަޒީފާ އަދާކުރުމަށް އަލަށް ގެންނަ ބިދޭސީންނަށް ދޫކުރާ ހުއްދަ ދެ ދުވަހުގެ ތެރޭގައި ދިނުމަށް އިމިގްރޭޝަނުން ނިންމީ މިދިޔަ ހަފުތާގަ އެވެ. ކުރިން އެ ހުއްދަ ދެނީ ދެ ހަފުތާގެ ތެރޭގަ އެވެ.
އެކަމަކު އިމިގްރޭޝަނުގެ މި ހިދުމަތް އިކޮނޮމިކް މިނިސްޓްރީ އަށް ބަދަލު ކުރުމުން، ހުއްދަ ދޫކުރަން ނިންމި މުއްދަތަށް ބަދަލު އަންނާނެ ކަން ސާފެއް ނުވި އެވެ.
އިމިގްރޭޝަނުން ކުރިން ދެމުން އައި ބިދޭސީންގެ ހުރިހާ ހިދުމަތްތަކެއްހެން މިހާރު ވަނީ އިކޮނޮމިކް މިނިސްޓްރީގެ ދަށަށް ބަދަލުކޮށްފަ އެވެ.
