ޖިންސީ ފުރައްސާރައިގެ ގިނަ ތުހުމަތުތަކަކާ އެކު މިހާރު ބޮލީވުޑުން އެކަހަރިކޮށްފައިވާ ޑައިރެކްޓަރު ސާޖިދު ހާނުގެ ފަރާތުން އެފަދަ އެއްވެސް ކަމެއް ކުރިމަތިވެފައި ނުވާ ކަމަށާއި އޭނާއާ އެކު އަދިވެސް މަސައްކަތްކުރަން ތައްޔާރަށް ހުރި ކަމަށް ބަތަލާ ތަމަންނާ ބާޓިއާ ބުނެފި އެވެ.
ބޮލީވުޑަށް ވުރެ ބޮޑު ސައުތު ފިލްމު އިންޑަސްޓްރީގައި މަޝްހޫރު ބަތަލާ ވަނީ ސާޖިދާ އެކު ދެ ފިލްމެއްގައި މަސައްކަތްކޮށްފަ އެވެ. އެއީ 2013 ގެ "ހިންމަތުވާލާ" އާއި 2014 ގެ "ހަމްޝަކަލްސް" އެވެ.
ތަމަންނާ، 29، ޑެކަން ކްރޮނިކަލް އަށް ބުނި ގޮތުގައި ސާޖިދުގެ ފަރާތުން އޭނާ އަށް އެއްވެސް އިރެއްގައި އެއްވެސް ކަހަލަ ހިތްހަމަނުޖެހޭ ކަހަލަ ކަމެއް ކުރިމައްޗެއް ނުވެ. އަދި އޭނާ އާއި ސާޖިދާ ދޭތެރޭ އަބަދު ވެސް އޮތީ ބަތަލާއަކާ ޑައިރެކްޓަރަކާ ދޭތެރޭ އޮންނަން ޖެހޭ ގުޅުން ކަމަށް ބުންޏެވެ.
"ފަހަރެއްގައި އަހަރެންގެ ތަޖުރިބާ އާއި އެހެން ބަތަލާއިންނަށް ސާޖިދާ އެކު ކުރަން ޖެހުނު ތަޖުރިބާ ތަފާތު ވެދާނެ. އެއީ މައްސަލައެއް ވެސް ނޫން. އެކަމަކު އަހަރެން ބުނަން އޮތްހާ ވެސް ވާހަކައަކީ އޭނަގެ ފަރާތުން ނެތޭ އެއްވެސް ކަހަލަ ހިތްހަމަނުޖެހޭ ކަމެއް އަހަންނަށް ދިމާވެފައެއް،" ބާހްބަލީގައި ވެސް ރޯލެއް ކުޅުނު ބަތަލާ ބުންޏެވެ. "އެހެންވެ އަދިވެސް ސާޖިދާ އެކު މަސައްކަތް ކުރުމަކީ އަހަންނަކަށް މައްސަލައެއް ނޫން."
ތަމަންނާ މި މޭރުމުން ވާހަކަ ދެއްކި އިރު، ސާޖިދުގެ ފަރާތުން އެކި ގޮތްގޮތަށް ޖިންސީ ފުރައްސާރަ އާއި އަހުލާގީ ގޮތުން ފެންވަރު ދަށް ކަންތައްތަކެއް ކުރިމަތިލާން ޖެހުނު ކަމަށް ބުނެ ވަރަށް ގިނަ ބަޔަކު އޭނާއާ ދެކޮޅަށް ވާހަކަ ދައްކާފައިވެ އެވެ.
އޭގެ ތެރޭގައި ތަމަންނާއާ އެކު "ހަމްޝަކަލްސް" ގެ ކާސްޓުގައި ހިމެނުނު ބަތަލާ ބިޕާޝާ ބާސޫ ވެސް ހިމެނެ އެވެ. އޭނާ އަށް އެ ފިލްމުގެ ސެޓުން ކުރަން ޖެހުނު ހިތްދަތި ތަޖުރިބާތަކާ ގުޅިގެން، ސާޖިދާ އޮތް ގުޅުން ގޯސްވުމުން، ސާޖިދު ވަނީ ފިލްމުން ބިޕާޝާގެ ވަރަށް ގިނަ މަންޒަރުތަކެއް ވެސް ކަނޑާލައިފަ އެވެ. މި މައްސަލައާ ގުޅިގެން އޭނާ ބުނެފައި ވަނީ އެއީ ކެރިއަރުގައި ކުރަން ޖެހުނު ގޯސް ތަޖުރިބާ ކަމަށާއި ދެން ދުވަހަކު ވެސް ސާޖިދާ އެކު މަސައްކަތް ނުކުރާނެ ކަމަށެވެ.
މަޝްހޫރު ކޮރިއޮގްރާފަރު އަދި ޑައިރެކްޓަރު ފަރާ ހާންގެ ކޮއްކޮ ސާޖިދުގެ މައްޗަށް ޖިންސީ ގޯނާގެ މައްސަލަ އެންމެ ފުރަތަމަ ފާޅުގައި ކުރީ ސަލޯނީ ޗޯޕްޅާ އާއި ރެޗެލް ވައިޓްގެ އިތުރުން ނޫސްވެރިޔާ ކަރިޝްމާ އުޕަދެޔޭ އެވެ. މި ތުހުމަތުތައް ކުރީ ސާޖިދު މިދިޔަ އަހަރު "ހައުސްފުލް 4" ގެ ޝޫޓިންގައި އުޅެނިކޮށެވެ.
އެ ތުހުމަތުތަކާ އެކު އެ ފިލްމުގެ ޑައިރެކްޓަރުގެ މަގާމުން އޭނާ ވަކިކޮށް، ފިލްމު ވަނީ ސްކްރީން ރައިޓަރު/ޑައިރެކްޓަރު ފަރުހާދު ސަމްޖީއާ ހަވާލުކޮށްފަ އެވެ. "ހައުސްފުލް 4" އަކީ މި އަހަރުގެ އޮކްޓޯބަރު 25 ގައި ރިލީޒް ކުރަން ތާވަލުކޮށްފައިވާ ފިލްމެކެވެ.
ސާޖިދު، 48، ގެ މައްޗަށް ކުރެވުނު ތުހުމަތުތަކާ އެކު އޭނާގެ އަޑެއްބަޑެއް މިހާރު އެއްގޮތަކަށް ވެސް ނީވެ އެވެ.