ވަރަށް ބޮޑު ބައި ޝޫޓްކޮށް ނިމިފައިވާ ފިލްމު "ހައުސްފުލް 4" ގެ ޑައިރެކްޓަރު ސާޖިދު ހާނަށް ތުހުމަތުކޮށްފައިވާ ޖިންސީ ގޯނާގެ މައްސަލަތަކާ ގުޅިގެން، އެ ފިލްމުގެ މަސައްކަތް ހުއްޓުމަކަށް ގެންނަން އެކްޓަރު އަކްޝޭ ކުމާރު ވެސް ގޮވާލައިފައި ވަނިކޮށް، ސާޖިދު ފިލްމު ދޫކޮށްލައިފި އެވެ.
ސާޖިދަކީ ބޮލީވުޑްގެ މަޝްހޫރު ކޮރިއޮގްރާފަރު އަދި ޑައިރެކްޓަރު ފަރާ ހާންގެ ކޮއްކޮ އެވެ. އޭނާގެ މައްޗަށް ދެ ބަތަލާއަކާއި ނޫސްވެރިޔަކު، ޖިންސީ ގޯނާގެ މައްސަލަތަކެއް ތުހުމަތުކުރުމާ ގުޅިގެން "ހައުސްފުލް 4" ގެ ޕްރޮޑިއުސަރު ސާޖިދު ނަދިއަދްވާލާ ވެސް މިހާރު ވަނީ ސާޖިދާ އެކު ފިލްމުގެ މަސައްކަތް ކުރިއަށް ނުގެންދަން ނިންމައިފި އެވެ.
ސާޖިދު، 47، ގެ ފަރާތުން ޖިންސީ ގޯނާ ލިބުނު ކަމަށް ބުނެ އެ ވާހަކަތައް މީޑިއާތަކަށް ތިލަކޮށްފައި ވަނީ ސަލޯނީ ޗޯޕްޅާ އާއި ރެޗެލް ވައިޓްގެ އިތުރުން ނޫސްވެރިޔާ ކަރިޝްމާ އުޕަދެޔޭ އެވެ.
ސަލޯނީ ވަރަށް ތަފުސީލުކޮށް، ސާޖިދުގެ ފަރާތުން ލިބުނު ގޯނާތަކުގެ ވާހަކަތައް މީޑިއާތަކަށް ކިޔައި ދީފައިވާ އިރު، އޭނާ ބުނީ ޑައިރެކްޓަރު ވިކާސް ބާލް އާއި އެކްޓަރު ޒައިން ދުއްރާނީގެ ފަރާތުން ވެސް ޖިންސީ ގޯނާ ތަޖުރިބާކުރަން ޖެހުނު ކަމަށެވެ.
އަންހެނުންތަކެއްގެ ފަރާތުން ސާޖިދަށް ކުރި ތުހުމަތުތަކާ ގުޅިގެން، ސާޖިދުގެ 2014 ގެ ފިލްމު "ހަމްޝަކަލްސް" ގައި މަސައްކަތްކުރި ބަތަލާ ބިޕާޝާ ބާސޫ ވެސް ވަނީ ސާޖިދަކީ ވަރަށް އަހުލާގީ ފެންވަރު ދަށް، އަންހެނުންނަށް "ރޫޑް" މީހެއް ކަމަށް ބުނެފަ އެވެ. އަދި އެކަން އެ ފިލްމުގެ މަސައްކަތުގެ ތެރޭގައި ތަޖުރިބާކޮށްފައިވާ ކަމަށް ބުންޏެވެ.
ސާޖިދުގެ މައްޗަށް ތުހުމަތު ކުރި ޖިންސީ ގޯނާގެ މައްސަލަތަކާ އެކު، އޭނާ ހޫނު ފެނަށް ވެއްޓިފައިވާ އިރު، ބޮލީވުޑްގައި ޖިންސީ ފުރައްސާރަތަކާ ދެކޮޅު ހަރަކާތެއް ފެށިފައި ވަނީ "ހައުސްފުލް 4" ގެ ކާސްޓްގައި ހިމެނޭ ނާނާ ޕަޓޭކަރް އަށް، ކުރީގެ ބަތަލާ ތަނުޝްރީ ދައްތާ އަށް ކުރި ފުރައްސާރައިގެ ވާހަކަ ނުކުމެ ފާޅުގައި ދެއްކި ވާހަކަތަކާ ގުޅިގެންނެވެ.
ސާޖިދަށް ކުރި ތުހުމަތުތަކާ އެކު އޭނާގެ ދައްތަ ފަރާ ކުރި ޓްވީޓެއްފައި ބުނީ މުޅި އާއިލާގެ "ހިތް ހަލާކުވެފައިވާ" ކަމަށެވެ. އަދި ސާޖިދުގެ ފަރާތުން އެފަދަ ކަމެއް ހިނގާފައިވާކަން ކުރިއަކުން ނޭނގޭ ކަމަށާއި އެކަމާ ހިތާމަ ކުރާ ކަމަށް ބުންޏެވެ.
ސާޖިދު ކުރި ޓްވީޓް ވަނީ "ހައުސްފުލް 4" ގެ ޑައިރެކްޓަރުގެ މަގާމު މި ވަގުތު ދޫކޮށްލަން ނިންމާފައިވާ ކަމަށާއި އޭނާއާ ބެހޭ ގޮތުން ފެތުރި ވާހަކަތަކާ ބެހޭ ގޮތުން އެއްވެސް އެއްޗެއް މި ވަގުތު ބުނަން ބޭނުން ނުވާ ކަމަށް ބުނެފަ އެވެ.
އަކްޝޭ ކުރި ޓްވީޓެއްގައި ބުނީ އެއްވެސް ކަހަލަ ތުހުމަތެއް އެޅިފައިވާ ބަޔަކާ އެކު އޭނާ މަސައްކަތް ނުކުރާނެ ކަމަށެވެ.
ސާޖިދަށް ކުރެވުނު ތުހުމަތުތަކާ އެކު އަންނަ އަހަރުގެ އޮކްޓޯބަރު 25 ގައި ރިލީޒް ކުރަން ތާވަލުކޮށްފައިވާ "ހައުސްފުލް 4" ގެ މަސައްކަތް ހުއްޓުމުން މީގެ މަސައްކަތަށް ދެން ވާނެ ގޮތެއް ނޭނގެ އެވެ. މި ފިލްމުގެ ކާސްޓުންގެ ތެރޭގައި އަކްޝޭ އާއި ނާނާ ޕަޓޭކަރްގެ އިތުރުން، ބޮބީ ޑިއޯލް، ރިތޭޝް ދޭޝްމުކް، ކިރިތީ ސެނަން، ކިރިތީ ކަރްބަންދާ އަދި ޕޫޖާ ހެގްޅޭ ހިމެނެ އެވެ.
ސާޖިދަކީ ހައުސްފުލް (2010) އާއި 2012 ގެ "ހައުސްފުލް 2" ގެ ވެސް ޑައިރެކްޓަރެވެ. އެކަމަކު 2016 ގައި ރިލީޒް ކުރި "ހައުސްފުލް 3" ޑައިރެކްޓްކޮށްފައި ވަނީ ސްކްރީން ރައިޓަރުން ކަމަށްވާ ސާޖިދު-ފަރްހާދެވެ.