ހޮނިހިރު ދުވަހު ބޭއްވި ރައްޔިތުންގެ މަޖިލީހުގެ އިންތިހާބުގައި ބާރަށު ދާއިރާ އާއި ފޮނަދޫ ދާއިރާގެ ފޮށިތަކުގެ ތެރިން ބާތިލް ވޯޓު ހުރި ހުރިހާ ފޮއްޓެއްގެ ބާތިލް ވޯޓު އަލުން ގުނަން އިލެކްޝަންސް ކޮމިޝަން (އީސީ) އިން ނިންމައިފި އެވެ.
އީސީން ބުނީ މިގޮތަށް ނިންމީ ބާރަށު ދާއިރާ އާއި އިނގުރައިދޫ ދާއިރާ އާއި ފޮނަދޫ ދާއިރާގެ ވޯޓު ފޮށިތައް ގުނަން، އެ ދާއިރާތަކުން އިންތިހާބުގައި ނާކާމިޔާބިއާ ކުރިމަތިވި ޕީޕީއެމާއި ޕީއެންސީން ހުށަހެޅުމުން ކަމަށެވެ.
ބާތިލް ވޯޓުތައް ގުނަން ނިންމި ދާއިރާތަކުގެ ތެރެއިން ބާރަށު ދާއިރާގެ ގޮނޑި ކާމިޔާބުކުރެއްވީ އެމްޑީޕީގެ ކެންޑިޑޭޓް އަހްމަދު އަބްދުﷲ އެވެ. އޭނާ އަށް 1،524 ވޯޓު ލިބިވަޑައިގެންފައި ވާއިރު އެންމެ ގާތުން ވާދަކުރައްވަނީ ބާރަށު ދާއިރާގެ މިހާރުގެ މެންބަރު އިބްރާހިމް ސުޖާއު އެވެ. ޕީއެންސީން ވާދަކުރެއްވި ސުޖާއު އަށް ލިބިވަޑައިގެންފައި ވަނީ 1،482 ވޯޓެވެ.
ފޮނަދޫ ދާއިރާގެ އިންތިހާބުގައި މިހާރުގެ މެންބަރު، ވަގުތީ ލީޑަރު އަބްދުއްރަހީމް އަބްދުﷲ (އަދުރޭ) އަށް ނާކާމިޔާބީއާ ކުރިމަތިވެ ވަޑައިގަތީ އެމްޑީޕީގެ ކެންޑިޑޭޓް މޫސާ ސިރާޖާ ވާދަކުރައްވައިގެންނެވެ. ސިރާޖަށް 1،007 ވޯޓު ލިބިވަޑައިގެން އިރު އަދުރޭ އަށް ލިބިވަޑައިގަތީ 963 ވޯޓެވެ.
އިއްޔެ ވެސް ބައެއް ފޮށިތައް އަލުން ގުނާފައި ވާއިރު މިއަދާއި މިރޭ ވެސް އަންނަނީ ބައެއް ފޮށިތައް ގުނަމުންނެވެ. ވޯޓު ކަރުދާހުގައި ރަނގަޅު ފާހަގަ ޖެހުން ފިޔަވައި އެހެން ފާހަގައެއް ޖަހައި ކުރަހައި ނުވަތަ ކަރުދާހަށް ގެއްލުން ދިނުން ފަދަ ކަމެއް ކޮށްފި ނަމަ ވޯޓު ބާތިލްވާ ގޮތަށް ވަނީ އިންތިހާބުތަކާ ބެހޭ ގާނޫނު އިސްލާހުކޮށްފަ އެވެ. މި ބަދަލާ އެކު މިފަހަރު ބާތިލް ވޯޓުގެ އަދަދު އެހެން ފަހަރުތަކާ އަޅާބަލާއިރު ގިނަ އެވެ.