ހޮޓެލް އޭޝިއާ ފެއާ ބާއްވާ މޯލްޑިވްސް އެގްޒިބިޝަން އެންޑް ކޮންފަރެންސް ސާވިސަސް (މެކްސް) އާއި ފެއާގެ މައި ސްޕޮންސަރު ބެސްޓްބައި މޯލްޑިވްސް (ބީބީއެމް) ގުޅިގެން އިންތިޒާމް ކުރާ ކެއްކުމުގެ މުބާރާތުގެ މާސްޓާ ކްލާސް މިއަދު ހެނދުނު ފަށައިފި އެވެ.
ހުޅުލެ އައިލެންޑް ހޮޓަލުގައި ފެށި މި ކްލާހަކީ، ކެއްކުމުގެ މުބާރާތުގެ ބައިވެރިވެރިން މުބާރާތަށް ތައްޔާރުވާނެ ގޮތްތައް ކިޔައިދިނުމަށް ބާއްވާ ކްލާހެކެވެ.
މި ކްލާސް ފެށުމަށް ބޭއްވި ރަސްމިއްޔާތުގައި، ކެއްކުމުގެ މުބާރާތުގެ ޕްރޮޖެކްޓް ޑިރެކްޓަރު އެލެން ޕާމާ ވިދާޅުވީ މި ކްލާސް މެދުވެރިކޮށް ބައިވެރިންނަށް އެކި ކަހަލަ ކެއުންތައް ތައްޔާރު ކުރާނެ ގޮތާއި މުބާރާތްތަކުގައި ކައްކާއިރު ގެންގުޅޭނެ އުކުޅުތައް ކިޔައިދޭނެ ކަމަށެވެ.
"އަޅުގަނޑުމެން މިއީ މިފަދަ ގިނަ މުބާރާތްތަކެއް ޖަޖްކޮށް، ބައިވެރިވާ ކޮންޓެސްޓުން ތަމްރީން ކުރާ ބައެއް. އަޅުގަނޑުމެން ބޭނުން ވަނީ މި ދާއިރާ ކުރިއަރުވައި، އަޅުގަނޑުމެންނަށް ދަސްވެފައި ހުރި ހުނަރުތައް އެހެން މީހުންނަށް ކިޔައިދޭން،" ކެއްކުމުގެ ދާއިރާއިން މީހުން ތަމްރީން ކުރުމުގައި 20 އަހަރު ހޭދަކުރައްވާފައިވާ އެލެން ޕާމާ ވިދާޅުވި އެވެ.
މި މާސްޓާ ކްލާހުގައި އެލެން ޕާމާގެ އިތުރުން ތިން ޝެފެއް ބައިވެރިިވެ އެވެ. އޭގެތެރޭގައި ދުބާއީގެ ޝެފް ތޯރިގް އިބްރާހިމާއި ދެކުނު އެފްރިކާގެ ޝެފް ޖޯޑީ އޭން ޕިއާޓަންގެ އިތުރުން ގާޓް ކޮލޮޓްޒްކް ބައިވެރިވި އެވެ.
"މި މުބާރާތަކީ ވާދަ ކުރުމުގެ އިތުރުން، މި ދާއިރާއިން އިތުރަށް ކުރިއެރުމަށް ރާއްޖޭގެ ޝެފުންނަށް ލިބޭނެ ވަރަށް ބޮޑު ފުރުސަތެއް. ކްލާސް ނަގައިދޭން މި ތިބި ޝެފުންނަކީ ދުނިޔޭގެ އެކި ހިސާބުތަކަށް ގޮސް، އެކި ކަހަލަ ތަޖުރިބާތައް ކޮށްފައިވާ ބައެއް. އެހެންވެ، އެ ތަޖުރިބާތައް ހިއްސާކޮށް، ދިވެހި ޝެފުން މިހާރު ހުރި ހިސާބަށް ވުރެ ކުރިއެރުމުގެ ފުރުސަތު ހޯދައިދޭން ބޭނުން،" ޝެފް ތޯރިގް ވިދާޅުވި އެވެ.
ތޯރިގް ވިދާޅުވީ ކެއްކުމުގެ ދާއިރާއަކީ އަބަދު ވެސް އިތުރު ކުރިއެރުންތައް ހޯދައި، އާ ކަންތައްތަކެއް ދަސްކުރުމުގެ ފުރުސަތު އޮތް ދާއިރާއެއް ކަމަށެވެ. އަދި ވޭތުވެދިޔަ ދެ ތިން އަހަރުގެ ތެރޭގައި ދިވެހި ޝެފުންގެ ފެންވަރު މަތިވެފައިވާ ކަމަށާއި، އެއީ ރާއްޖޭގެ އިގްތިސާދަށް ވެސް ލިބޭނެ ބޮޑު ކުރިއެރުމެއް ކަމަށް އޭނާ ވިދާޅުވި އެވެ.
މި ރަސްމިއްޔާތުގައި މެކްސްގެ ޖެނެރަލް މެނޭޖަރު ހުސްނީ ރައުފް ވިދާޅުވީ މި މުބާރާތުގައި ރާއްޖޭގައި މަސައްކަތް ކުރާ ދޭސީ އަދި ބިދޭސީ 516 އަށް ވުރެ ގިނަ ޝެފުން، 20 ކެޓަގަރީގައި ވާދަކުރާނެ ކަމަށެވެ. އަދި އެކި ވަނަވަނަ އަށް ދާ ބައިވެރިންނަށް އަގުހުރި އިނާމުތަކެއް ހުށަހަޅާފައި ވާނެ ކަމަށް ވެސް އޭނާ ވިދާޅުވި އެވެ. އޭގެތެރޭގައި ފައިސާގެ އިނާމާއި، ލަންކާ، ސިންގަޕޫރު އަދި މެލޭޝިއާ ދެކޮޅު ޓިކެޓާއި މެޑަލް އަދި ސެޓްފިކެޓް ހިމެނެ އެވެ.
އަންނަ އާދީއްތަ ދުވަހުން ފެށިގެން ބުދަ ދުވަހުގެ ނިޔަލަށް ކުރިއަށްދާ މި މުބާރާތް ޖަޖު ކުރާނީ ބޭރުގެ މަޝްހޫރު 16 ޖަޖަކު ހިމެނޭ ހާއްސަ ޕެނަލްއަކުންނެވެ.
މި އަހަރުގެ ހޮޓެލް އޭޝިއާ ފެއާ ފަށާނީ އަންނަ ހޯމަ ދުވަހު އެވެ. ސެޕްޓެމްބަރު ހަތެއްގެ ނިޔަލަށް ދަަރުބާރުގޭގައި ކުރިއަށްދާ މި ފެއާގައި 115 ކުންފުނިން 175 ސްޓޯލް ހުންނާނެ އެވެ. އަދި މި ކުންފުނިތަކުން 4،000 އަށް ވުރެ ގިނަ ބްރޭންޑު އިސްތިހާރު ކުރާނެ ކަމަށް ހުސްނީ ވިދާޅުވި އެވެ. މި އަހަރުގެ ފެއާގައި ބޭރުގެ 28 ކުންފުނިން ވެސް ބައިވެރިވެ އެވެ.