މި އަހަރުގެ ހޮޓެލް އޭޝިއާ އެގްޒިބިޝަންގެ ތެރެއިން ބޭއްވި ކަލިނަަރީ ޗެލެންޖުގެ އެންމެ މޮޅު ދިވެހި ޝެފުގެ އެވޯޑު ބަނޑޮސް އައިލެންޑް ރިސޯޓުގެ އަހުމަދު ފަތީން ހޯދައި އެ މަގާމު ދިފާއުކޮށްފި އެވެ.
ށ. ފޯކައިދުއަށް އުފަން ފަތީން ކެއްކުމުގެ ދާއިރާއިން ތަމްރީން ހާސިލް ކޮށްފައި ވަނީ ކެނެޑާއިންނެެވެ. ކުރިން ފޯ ސީޒަންސް ކުޑަހުރާ އާއި ލަނޑާގިރާވަރު، ލަކްސް މޯލްޑިވްސް އަދި އަނަންތަރާގައި ވެސް އޭނާ މަސައްކަތް ކޮށްފައިވެ އެވެ.
ކަލިނަރީ ޗެލެންޖުގެ މި އަހަރުގެ މުބާރާތުގައި ހިމެނުނު 20 ކެޓަގަރީގެ ތެރެއިން ހަނީމޫން ކޭކު ކެޓަގަރީން ވެސް ފަތީން ވަނީ ތިން ވަނަ ހޯދައިފަ އެވެ. ހޮޓެލް އޭޝިއާ ފެއާ ނިންމާލުމަށް، ފެއާ އިންތިޒާމް ކުރި މޯލްޑިވްސް އެގްޒިބިޝަން އެންޑް ކޮންފަރެންސް ސާވިސަސް (މެކްސް) އިން ރޭ ހުޅުލޭ އައިލެންޑް ހޮޓަލުގައި ބޭއްވި ހަފުލާއެއްގައި ވަނީ ކެއްކުމުގެ މުބާރާތުން ވަނަތައް ހޯދި މީހުންނާ އިނާމު ހަވާލުކޮށްފަ އެވެ.
މި އަހަރުގެ މުބާރާތުގައި ރެކޯޑު އަދަދަކަށް، ރާއްޖޭގައި މަސައްކަތް ކުރާ ދިވެހި އަދި ބިދޭސީ ޝެފުން ބައިވެރިވި އެވެ. އެގޮތުން، 550 ބައިވެރިންނަށް އަމާޒުކުރި ޗެލެންޖަށް ބޮޑު ތަރުހީބެއް ލިބި، މީހުންގެ އަދަދު 566 އަށް އެރި އެވެ.
"އޭގެ ތެރެއިން 200 އަށް ވުރެ ގިނަ ބައިވެރިންނަކީ ދިވެހި ޝެފުން. މި މުބާރަތް މެދުވެރިކޮށް ދިވެހި ޝެފުންގެ ފެންވަރު ރަނގަޅުވެ، ހުނަރު އިތުރު ހަރުފަތަކަށް ގެންދިއުމުގެ ފުރުސަތު ލިބިގެން ގޮސްފައި ވާނެ،" މެކްސްގެ ޖެނެރަލް މެނޭޖަރު ހުސްނީ ރައޫފް ވިދާޅުވި އެވެ.
މުބާރާތުގައި ފަނޑިޔާރުކަން ކޮށްފައި ވަނީ އެކި ގައުމުތަކުގައި މިފަދަ މުބާރާތްތައް ޖަޖުކުރާ 16 ފަނޑިޔާރުން ހިމެނޭ ހާއްސަ ޕެނަލަކުންނެވެ. އޭގެ ތެރޭގައި ދުނިޔޭގެ މަޝްހޫރު ޝެފް އެލަން ޕާމާ ވެސް ހިމެނެ އެވެ.
މީގެ އިތުރުން، މި އަހަރުގެ ހޮޓެލް އޭޝިއާ ފެއާގައި ރާއްޖެ އާއި ބޭރުގެ 175 ކުންފުނިން ބައިވެރިވި އެވެ.
ހުސްނީ ވިދާޅުވީ މި އަހަރު މި ބޭއްވީ މިހާތަނަށް އެންމެ ކާމިޔާބު ހޮޓެލް އޭޝިއާ ފެއާ ކަމަށެވެ. އެ ގޮތުން، މިފަހަރު 3،876 މީހުން ފެއާ އަށް ޒިޔާރަތް ކުރި ކަމަށް އޭނާ ވިދާޅުވި އެވެ.
"ޒިޔާރަތް ކުރި މީހުންނާއި، އެގްޒިބިޝަން އަދި ކަލިނަރީ ޗެެލެންޖުގައި ބައިވެރިންގެ އަދަދަށް ބެލިޔަސް، މި އަހަރުގެ ފެއާ އަކީ މިހާތަނަށް އިންތިޒާމް ކުރެވުނު އެންމެ ވަރުގަދަ ފެއާ،" ހުސްނީ ވިދާޅުވި އެވެ.
ހުސްނީ ވިދާޅުވީ މިއަހަރުގެ ކާމިޔާބީއަށް ބަލާފައި އަންނަ އަހަރު ވެސް މިއަށް ވުރެ ބޮޑު އަދި ފުރިހަމަ ފެއާއެއް ބާއްވާނެ ކަމަށެވެ. މިއީ މި ފެއާ ބޭއްވި 12 ވަނަ އަހަރެވެ.