ރާއްޖޭގެ ޓޫރިޒަމް ސިނާއަތުގައި ހަރަކާތްތެރިވާ ހުރިހާ ފަރާތްތަކަށް މިއީ ވިޔަފާރީގެ ބޮޑު އީދެކެވެ. ރާއްޖޭގެ އެންމެ ބޮޑު ވިޔަފާރީގެ މައުރަޒު، ހޮޓެލް އޭޝިއާ އެގްޒިބިޝަން ކުރިއަށް ދާއިރު، ޓޫރިޒަމް ދާއިރާގެ އެންމެންހެން ވަނީ ދަރުބާރުގެ އަށް ޖަމާވެފަ އެވެ. ރިސޯޓުތަކާއި ހޮޓާތައް ހިންގާ ފަރާތްތަކާއި އެ ތަންތަނަށް ބޭނުންވާ ތަކެތި ހޯދާ މީހުންނެވެ. އެހެންވެ، އެ މީހުންނަށް އެއްޗެހި ވިއްކާ ކުންފުނިތަކަށް މިއީ އަދި ވަކިން ހާއްސަ ދުވަސްކޮޅެކެވެ.
ރާއްޖެ އާއި ބޭރުގެ އެކި ގައުމުތަކުގެ 175 ފަރާތަކުން ބައިވެރިވާ މި ފެއާ އިން އެއް ނަމެއް ފާހަގަކޮށްލެެވެ އެވެ. ފެއާގެ މައި ސްޕޮންސަރު ކަމަށްވާ ބެސްޓް ބައި މޯލްޑިވްސް (ބީބީއެމް)ގެ ސްޓޯލެވެ. ފެއާގައި ހުރި އެންމެ ބޮޑު ސްޓޯލުގައި ދައްކާލަން ބަހައްޓާފައި ހުރި ތަފާތު އުފެއްދުންތައް ބަލާލަން އެތައް ބަޔަކު އެއްވެ އެވެ. އަނެއް ބަޔަކު އެ ސްޓޯލަށް ދަނީ އެ ތަނުން ލިބެން ހުރި މީރު ކެއުންތަކުގެ ރަހަ ބަލައިލާ ހިތުންނެވެ.
އެކި ގައުމުތަކުގެ އުފެއްދުންތައް ރާއްޖެ ގެނެސް، ރިސޯޓުތަކަށް ސަޕްލައިކުރާ ބީބީއެމް ސްޓޯލުގައި އަށް ސްޓޭޝަން ބަހައްޓާފައި ހުއްޓެވެ. އެއިން ކޮންމެ ސްޓޭޝަނަކުން ތަފާތު އުފެއްދުމެއްގެ ރަހަ ބަލައިލަން ލިބެ އެވެ. ހިތުހުރި ވަރަކަށް ކާންވީ އެވެ.
އެންމެ ފުރަތަމަ ޖެހޭ ސްޓޭޝަނުގައި ފެންނަން ހުރީ ތަފާތު ވައްތަރުތަކުގެ ޕާނާއި ބަނަސް އަދި ފޮނި ކާތަކެއްޗެވެ. މިއީ ބީބީއެމް އިން ވިއްކާ ޖަރުމަނުގެ އައިރެކްސް ބްރޭންޑުގެ ފުށަށް ހާއްސަ ކޮށްފައިވާ ސްޓޭޝަނެކެވެ. އެ ބްރޭންޑުގެ ފުށް ބޭނުންކޮށްގެން ހަދާފައި ހުރި މަފިން އާއި ޕާނުގެ ރަހަ ބަލައިލެވެ އެވެ.
ދެވަނަ ސްޓޭޝަންގައި ހުރީ އެކި ކަހަލަ ބަދަނެވެ. ސްމޯކްޑް އަދި ރޯސްޓް ކޮށްފައި ހުރި ބަދަނުގެ އިތުރަށް، ޗޮކްލެޓް ލާފައި ހުރި ބަދަން ވެސް ލިބެ އެވެ. ތިން ވަނަ ސްޓޯލާއި ހަތަރު ވަނަ ސްޓޯލް ހާއްސަ ކޮށްފައި ވަނީ އެކި ކަހަލަ ބުއިންތަކާއި ދަޅުގައި ބަންދުކޮށްގައި ހުރި ޖޭމް ފަދަ އެއްޗެއްސަށެވެ. މީގެ އިތުރުން، ބީބީއެމް އިން ރާއްޖޭގައި ވިއްކާ އެކި ވައްތަރުގެ ސައިފަތަށް ހާއްސަ ސްޓޭޝަނެއް ވެސް ހުއްޓެވެ. އެކި ރަހަތަކުގެ ހޫނު އަދި ފިނި ސައި ލިބެން ހުރި ސްޓޭޝަނަށް ގިނަ ބައެއްގެ މަގުބޫލުކަން ލިބުނެވެ.
"މި ހުރިހާ އެއްޗަކީ ވެސް އަޅުގަނޑުމެން ރިސޯޓުތަކަށް ޓާގެޓުކޮށްގެން ޑިސްޕްލޭ ކޮށްފައި ހުރި އެއްޗެހި،" ބީބީއެމްގެ އެފް އެންޑް ބީ ސޭލްސް އެންޑް މާކެޓިން ބިޒްނަސް އެގްޒެކެޓިވް ނިޝާ މުހައްމަދު ވިދާޅުވި އެވެ.
އޭނާ ވިދާޅުވި ގޮތުގައި ބީބީއެމްގެ ސްޓޯލަށް ޒިޔާރަތްކޮށް އެ ތަނުގައި ހުރި އުފެއްދުންތައް ރަހަ ބެލި ވަރަށް ގިނަ ބަޔަކު ދެވަނަ ފަހަރަށް ވެސް ސްޓޯލަށް ޒިޔާރަތްކުރި އެވެ. އެއްޗެހި ލިބޭނެ ގޮތުގެ މައުލޫމާތު ހޯދާ މީހުން ވެސް ގިނަކަން ނިޝާ ފާހަގަކުރެއްވި އެވެ.
"ވަރަށް ގިނަ ކަސްޓަމަރުން އައިސް މި ތަކެތި ގަންނަން އޯޑަރު ވެސް ދީފައި ވަނީ. މި ތަނުގައި ހަރަކާތްތެރިވާ އަޅުގަނޑުމެންގެ އެފް އެންޑް ބީ މީހުންނާ ވާހަކަ ދައްކައިގެން އެކަން ހަމަޖެއްސޭނެ،" އޭނާ ވިދާޅުވި އެވެ.
ބީބީއެމް އިން ވިއްކާ ތަކެތި ދައްކާލުމުގެ އިތުރަށް، ފެއާ އަށް ޒިޔާރަތް ކުރާ އެންމެންގެ ހިތްހަމަޖެހޭ ކަހަލަ ކަމެއް ވެސް އެ ސްޓޯލުން ކުރި އެވެ. އެ ގޮތުން ލުއި ކެއުންތައް ވަގުތުން ތައްޔާރުކޮށް، އާއްމުންނަށް ބެހި އެވެ.
ރާއްޖޭގެ ޓޫރިޒަމް ސިނާއަތް ތަރައްގީވެ، އާ ގިނަ ރިސޯޓުތަކެއް ހުޅުވަމުން އަންނައިރު، އެ ތަންތަނުގެ އެންމެ ގާތް އެއް އެކުވެރިއަކަށް ބީބީއެމް ވަނީ ވެފަ އެވެ. ވިއްސަކަށް އަހަރު ވީ ކުންފުނިން ރާއްޖޭގެ 70 ޕަސެންޓް ރިސޯޓަށް އެއްޗެހި ސަޕްލައިކޮށްދެ އެވެ. އެއީ ހަމައެކަނި ހޮޓެލް އޭޝިއާ ފެއާގެ އެންމެ ބޮޑު ނަމެއް ނޫނެވެ. ދުނިޔޭގެ ހުރިހާ ކަންކޮޅުތަކެއްގައި ހުރި ބޮޑެތި ކުންފުނިތަކާއި ރާއްޖޭގެ ރިސޯޓުތައް ގުޅުވާލައި މުޅި ސިނާއަތުގައި ވެސް ބީބީއެމްގެ ނަން ވަނީ ފުޅާކޮށްފަ އެވެ.
ހޮޓެލް އޭޝިއާ ފެއާ އިން ފެނުނީ އޭގެ ހެއްކެކެވެ.